Read Imbabura Highland Quichua APOCALIPSIS 15 Bible Online

APOCALIPSIS 15 - Imbabura Highland Quichua bible

APOCALIPSIS 15

¹Jahua pachapica, shuj jatun manllarinatami ricurcani. Chaipica, jipalla canchis llaquichinacunatami, canchis angelcuna shuj shujlla charinajurca. Chaicunahuanmi, Taita Dios ninanda fiñashpa llaquichishcapash tucurirca.

²Shinallata ninahuan chapushca espejoshna, punchapamba mama cuchatapashmi ricurcani. Chai espejoshna mama cucha jahuapica, manllanayai animaltapash, paiman rijchajta rurashcatapash, macanajushpa mishashcacunami shayanajurca. Chai animalpaj ricuchinatapash, paipaj shutipaj numerotapash, na churai tucushcachu carca. Paicunaca, Diospaj arpacunata chaririajmi shayanajurca.

³Taita Diosta servij Moisés rurashca candanatapash, Llamapaj candanatapashmi, cashna nishpami candanajurca: “Tucui Ushaita Charij, Mandaj Taita Dios, can rurashcacunaca manllarishpa juyailla ricunayaimi. Imatapash cashcatapacha ruraj, na llullajmi cangui. Canllami, cambajlla causajcunataca, Jatun Mandaj cangui.

⁴Jatun Dioslla, ¿pita candaca na manllashpa, cambaj shutitapash na jatunyachingayari? Canllami, jucha illaj cangui. Chaimandami tucui llactacunamanda shamushpa, candaca ninanda alicachinga. Can llaquichina punllapash, ñamari chayamushca” nishpami candanajurca.

⁵Chaicunata ricushca jipallami, jahua pachapi Diospaj huasi ñapash pascarijta ricurcani. Diospajlla tiajuj chai ucupimi, pai mandashca shimicunaca alichishca tiajun.

⁶Diospaj huasi ucumandaca, canchis llaquichinacunata apashpami, canchis angelcuna llujshinajurca. Paicunaca, punchapamba yurajlla lino churajunata churajushca, pechopipash oro chumbita chumbilishcami carca.

⁷Chai canchis angelcunamanmi, causaita charij chuscu animal puramanda shuj animalca, canchis oro copacunata curca. Chai copacunapica, causaita causajuj Taita Dios ninanda fiñashpa llaquichinacunata jundachishcami carca.

⁸Punchapamba, ninan ushaita charij Taita Diospajmanda shamujuj cushnica, Diospaj huasi ucupimi jundajurca. Chai canchis angelcuna, canchis llaquichinacunahuan tucuchingacamanmi, Diospaj huasi ucuman yaicuitaca, pipash na usharca.