Read Imbabura Highland Quichua APOCALIPSIS 17 Bible Online

APOCALIPSIS 17 - Imbabura Highland Quichua bible

APOCALIPSIS 17

¹Chai jipami, canchis copacunata charinajushca canchis ángel puracunamanda, shuj ángel shamushpa, cashna nihuarca: “Huainayaj huarmica, ashtaca yacu jahuacunapimi tiajun. Caiman shamui. Paita llaquichinata canman ricuchisha.

²Cai pachapi tiaj jatun mandajcunapash, chai huarmihuanmi huainayashpa causanajurca. Shinallata tucui llactacunapi causajcunapash, vinota ufiashpa machanshnami, chai huarmihuan huainayashpami causanajurca” nihuarcami.

³Chaita ricushca jipallami, Diospaj Espirituca, jichushca pambaman pushahuarca. Chai pambapimi, yana puca manllanayai animalpaj jahuapi, shuj huarmi tiajujta ricurcani. Chai animalpaj cuerpopica, Diosta nali shimicunata rimajuj shuticunami junda carca. Chai animalca, canchis umacunata, chunga cachucunatami charirca.

⁴Chai huarmica morado, yana pucata churajushcami carca. Shinallata orohuan, juyailla rumicunahuan, perlascunahuan alichirishcami tiajurca. Huainayashpa causajushpami, millanayai mapataca, oro copapi jundata charijurca.

⁵Chai huarmipaj frentepimi, pipash na yachai ushanallata, cashna escribishca tiajurca: “BABILONIA SHUTI JATUN PUEBLO CASHPAMI, HUAINAYASHPA CAUSAJCUNAPAJ, CAI PACHAPI IMATAPASH MILLANAYAICUNATA RURAJCUNAPAJ MAMA CANI” nishcatami charirca.

⁶Chai huarmica, Diospajlla causajcunata Jesusmanda villajcunata huañuchishca yahuarhuan machashca tiajujtami ricurcani. Chaita ricushpaca, ninandapacha manllarishpami ricujurcani.

⁷Shina manllarijpimi angelca, cashna nihuarca: “¿Imashpata chashna manllaringui? Canchis umacunata, chunga cachucunata charij manllanayai animal ima cashcata, chai animalpaj jahuapi tiajuj huarmi ima cashcatapash, pipash na yachanllu. Ñucami, chaitaca canman villagrini.

⁸Can ricujushca manllanayai animalca causarcami, cunanga illanmi. Paica, chingaita chingaringapaj ringapajmi, manllanayai ucu ucu utujumandaca llujshimugrijun. Chai animalta ricushpami, cai pachapi causajcunaca, ninanda manllaringa. Paicunapaj shuticunaca, causaita causanata villajuj libropica, cai pachata rurashca punllamandapacha na escribishcachu. Chai punda causajushca animalca, cunanga illanmi, cutinmi shamugrin.

⁹Caitaca, yuyaipi ali yachaita charijcunallami yachai ushan: Chai canchis umacunataca, canchis urcucunatami ricuchijun. Chai urcu jahuacunapimi, chai huarmica tiajun.

¹⁰Shinallata chai canchis umacunaca, canchis jatun mandajcunami. Chai canchis mandaj puracunamanda pichaca urmashcami. Shujca cunambi mandajunmi, shujca nara shamunllu. Pai shamushpaca, ashatallami mandai ushanga.

¹¹Punda causajushca, cunambi illaj chai manllanayai animalca, cutinmi shamunga. Chaihuanmi, pusaj mandaj tucunga. Chashna canchis mandajpura tucushpapash, chai animalca chingaitami chingagringa.

¹²Shinallata can ricujushca chunga cachucunaca, chunga jatun mandajcunami. Paicunaca, nara mandanataca japinllu. Paicunami, chai manllanayai animalhuan shuj horascamanlla mandai ushanga.

¹³Chai chunga mandajcunaca, shujlla yuyai tucushpami ushaitapash, mandanatapash, chai manllanayai animalman cunga.

¹⁴Chai mandajcunaca, Llamahuanmi macanajunga. Ashtahuangarin Llamami, paicunataca mishanga. Paica, amocunapaj Amomi, jatun mandajcunatapash Jatun Mandajmi. Paihuan causajcunaca, Dios cayashpa agllashcacuna cashpami, paita aliguta cazunajun” nihuarcami.

¹⁵Shinallata chai angelca, cashnatapashmi nihuarca: “Chai huainayaj huarmitaca, yacu jahuacunapi tiajujta ricurcanguimi. Chai yacucunaca, ashtaca ashtaca gentecunata, llactacunata, shuj shuj shimita parlajcunatami ricuchijun.

¹⁶Can ricushca manllanayai animalpaj chunga cachucunaca, chai huainayaj huarmita millanayachishpami, jichushpa lluchullata saquinga. Paipaj aichatapash micushpami, ninapi rupachinga.

¹⁷Taita Diosca, pai munashcata rurachunmi, paicunaman yuyaita curca. Pai rimashca shimicuna pactangacamanmi, shujlla yuyai tucushpa, paicuna mandajushcataca, chai manllanayai animalman cuchun saquirca.

¹⁸Can ricujushca huarmica, jatun pueblotami ricuchijun. Chai pueblomi, cai pachapi tiaj jatun mandajcunataca mandajun” nihuarcami.