Read Imbabura Highland Quichua APOCALIPSIS 18 Bible Online

APOCALIPSIS 18 - Imbabura Highland Quichua bible

APOCALIPSIS 18

¹Chai jipami, jahua pachamanda shuj ángel ninan ushaihuan urai shamujta ricurcani. Chai angelca, punchapamba cashpami, cai pachatapash punchayachijurca.

²Paimi, shinllitapacha cashna nishpa ninanda caparijurca: “Babilonia jatun puebloca, ñami urmashca, ñami urmashpa tucurishca. Shina tucurishpami ayacuna, tucui nali espiritucuna causana huasi tucushca. Alasyu mapa, millanayai animalcuna tazinda rurashpa causanapashmi tucushca.

³Tucui llactacunapi causajcunataca, machana vinota ufiachinshnami, ninanda huainayachishpa causarca. Cai pachapi tiaj jatun mandajcunapash, paihuanmi huainayashpa causanajurca. Paica, imatapash juyaillatami ninanda charirca. Shina cajpimi, cai pachapi randishpa jatujcunapash ninanda charijyanajurca” nijurcami.

⁴Chai jipami, jahua pachamanda cutin shuj rimashpa cashna nijujta uyarcani: “Ñuca agllashcacuna, chai pueblomanda llujshimuichi. Ama paishnalla juchacunata rurashpa, paihuan llaquichi tucungapaj llujshimuichilla.

⁵Paipaj juchacunaca, jahua pachacamanmi chayagrishca. Pai ima nalita rurashcatapash, Taita Diosca yarishcami.

⁶Cangunaman chai huarmi imashna cushcashnallata, cangunapash chai huarmiman cunguichilla. Pai imata rurashcatapash, chaupi yalihuan tigrachinguichi. Copapi chapushpa pai ufiachishcamandaca, chashnallata chaupi yalita tigrachishpa ufiachinguichi.

⁷Paica, pai munashcata rurashpami, ninanda cushijujurca. Shinamanda cangunapash, ninanda llaquichishpa huacachinguichi. Paipaj shungupica, cashnami yajurca: ‘Ñucaca, jatun mandanshnami tiajuni. Na sapalla huarmichu cani, huacaitapash na huacanachu cani’ yajurcami.

⁸Chaimandami paitaca, shuj punllapilla jatun llaquicuna ñapash japinga: Huañuipash, huacaipash, yarjaipashmi japinga. Ninapimi rupachi tucujunga. Paita llaquichij Mandaj Taita Diosca, ninan ushaita charij Diosmi” nijurcami.

⁹Cai pachapi tiaj jatun mandajcunaca, chai huarmihuanmi huainayashpa, paicuna munashcata rurashpa, ninanda cushijushpa causanajurca. Chai pueblo rupashpa cushni llujshijujta ricushpaca, ninandami llaquirishpa huacanajunga.

¹⁰Shina llaquichijujta ricushpa manllarishpami, carullapi shayarishpa cashna ninajunga: “¡Aij, aij, ninan ushaita charij Babilonia jatun pueblolla! Canda llaquichinaca, shuj horaspimi ñapash japimushca” ninajungami.

¹¹Shinallata cai pachapi jatujcunapash, jatungapaj imatalla apamushcacunatapash, chai pueblopica pipash na randij tiajpimi, ninanda llaquirishpa huacanajunga.

¹²Paicunaca orota, culquita, juyailla rumicunata, perlascunata, juyailla linota, yana puca morado seda telacunatami jatungapaj apamunajunga. Shinallata tucui tiashca mishquillagu ashnajuj caspicunata, marfilta, juyailla caspita imacunatapash rurashcacunata, cobreta, jirruta, marmol nishca rumicunata, chaicunata imamambash tigrachishpa rurashcacunatami apamunajunga.

¹³Canelata, mishquillagu ashnajujcunata, inciensota, mirra nishcata, mishqui mishqui ashnajujcunata, vinocunata, aceiteta, cutashca ali jacuta, trigrota, huasipi charina animalcunata, llamacunata, caballocunata, carretacunata, gañangunatapashmi jatungapaj apamumajunga.

¹⁴Chai pueblotami, cashna ninajunga: “Fucushcata tucui shunguhuan can munashpa micunapash tucurishcami. Can juyailla ricurijujpash, ninanda charishcapash tucurishcami. Cunanmandaca, cutinga na imatapash japinguichu” ninajurcami.

¹⁵Chai jatujcunaca, chai pueblopi jatushpami, ninanda charijyanajurca. Paicuna chashna llaquichijujta ricushpami, manllarishpa carupi shayashpa, ninanda llaquirishpa huacanajunga.

¹⁶Paicunaca cashnami ninajunga: “¡Aij, aij, chai jatun pueblolla! Juyailla linota, morado, yanalla puca churajunata churajushca huarmishnami, chai puebloca tiajurca. Shinallata orohuan, juyailla rumicunahuan, perlascunahuan, aligutapacha alichirishcami carca.

¹⁷Pai juyailla ninanda charishcacunapash, shuj horaspillami ñapash tucurishca” ninajungami. Shinallata barcocunata purichij tucui runacunapash, chai barcocunapi tucui gentecunapash, chai barcocunata purichijcunata mandajcunapash, mama cuchapi imatapash rurajcunapash, tucuillami carupi shayanajurca.

¹⁸Chai pueblo rupashpa, cushni llujshijujta ricushpami: “¿Maijan pueblota, cai jatun puebloshna tiarcayari?” nishpa, ninanda caparinajurca.

¹⁹Shinallata alpata umapi churarishpa, ninanda llaquirishpa huacashpami, cashna nishpa caparinajurca: “¡Aij, aij, chai jatun pueblolla! Pai ninanda charij cajpimi, mama cuchapi barcocunata tucui charijcunapash charijyarca. ¡Cunanga, shuj horaspillami ñapash llaquinayaita tucuchi tucushca!” ninajurcami.

²⁰Paita tucuchishcamandaca, jahua pachapi causajcuna, Diospajlla causajcuna, villachun cachashcacuna, Dios ima nishcata villajcunapash, ninanda cushijuichi. Cangunata llaquichij cashcamandami Taita Diosca, imatapash cashcatapacha rurashpa paitapash tucuchishca.

²¹Chai jipallami, ninan ushaita charij angelca, molino rumishna jatun rumita japishpa, mama cuchaman cashna nishpa shitarca: “Cashnallatami Babilonia jatun pueblopash, ucuman shitai tucunga. Shina shitajpica, cutinga na ricuringachu.

²²Shinallata arpata, gaitata, trompetata huacachijcunapash, candajcunapash, cambaj ñangunapica, na cutinga uyaringachu. Cambi causanajuj imata yachajushcata rurajcunapash, na ashtahuan tiangachu. Cutajujpash, cambica na ashtahuan uyaringachu.

²³Shinallata michata japichishcapash, candaca na ashtahuan punchayachingachu. Cazaranajuipi cushijushpa parlanapash, cambica na ashtahuan tiangachu. Cambi jatushpa causajcunaca, tucui llactacunata yalimi charijyanajurca. Canga brujushpami, tucui llactacunapi causajcunataca, llullashpa umachijurcangui” nijurcami.

²⁴Shinallata Dios ima nishcata villajcunapaj, paipajlla causajcunapaj, cai pachapi huañuchi tucushca tucuicunapaj yahuarmi, chai pueblopica jicharirca.