Read Imbabura Highland Quichua APOCALIPSIS 19 Bible Online

APOCALIPSIS 19 - Imbabura Highland Quichua bible

APOCALIPSIS 19

¹Chai jipami, jahua pachapi ashtaca ashtacacuna cashna nishpa, ninanda caparinajujta uyarcani: “¡Mandaj Diosta alicachinguichi! Canmi quishpichij, alicachi tucuna, punchapambagu cangui, ushaitapash charij, ñucanchita Mandaj Taita Diosmi capangui.

²Pai llaquichinacunaca, na llullaj, imatapash cashcatapacha ruranami. Culquimanda huainayaj huarmitaca, cai pachapi causajcunata huainayachishpa huaglichishcamandami llaquichijungui. Diosta servijcunatapash, chai huarmimi huañuchishpa yahuarta jicharca. Chaimandami paitapash, chashnallata tucuchirca” ninajurcami.

³Shinallata cutinmi, cashna ninajurca: “¡Mandaj Diosta alicachinguichi! Chai huarmita rupachijuj cushnica, causaita causaicaman llujshijungallami” ninajurcami.

⁴Shinallata ishcai chunga chuscu rucucunapash, causaita charij chai chuscu animalcunapash, mandashpa tiarinapi tiajuj Taita Diospaj ñaupajpi alpaman urai cumurishpami: “¡Shina cachun! ¡Mandaj Diosta alicachinguichi!” nishpa ninanda alicachinajurca.

⁵Chai jipami, mandashpa tiarinamandaca, cashna nijuj uyarirca: “Ñucanchi Taita Diosta tucui servijcunapash, paita manllashpa causajcunapash, uchillacuna cashpa, jatunguna cashpa, ninandami alicachina canguichi” nircami.

⁶Chai jipallami, ashtaca ashtaca gentecuna rimanajujtashna, yacucuna ninanda huacajujtashna, ninanda culun nijujtashna, cashna ninajujta uyarcani: “¡Mandaj Diosta alicachinguichi! ¡Tucui Ushaita Charij, ñucanchi Taita Diosmi tucuita mandajun!

⁷Ninandapacha cushijushpa, paitaca ninanda alicachishunchi. Llamahuan cazarana bodami, ña chayamushca. Paipaj huarmipash, ña alichirishcami.

⁸Paipaj huarmimanllami, juyailla linota rurashca, punchapamba yuraj churajunataca carashca” ninajurcami. Chai juyailla linotaca, Diospajlla causajcuna imatapash cashcatapacha rurashpa causashcatami chashna nijun.

⁹Angelca cashnami nihuarca: “Caita escribingui: ‘Llamahuan cazarai bodapi micungapaj cayashcacunaca, ninandami cushijunga’ nijujtaca escribingui” nishpami, cashnatapash nihuarca: “Cai shimicunataca, Taita Diosllatami na llullashpa villarca” nihuarcami.

¹⁰Shina nijpica, angelta ninanda alicachingapajmi, paipaj ñaupajpi cungurircani. Ashtahuangarin paica, cashnami nihuarca: “Ricui, na chashna ruranachu cangui. Ñucapash canshnallata, cambaj huauquicunashnallata, Diosta servijmi cani. Paicunaca, Jesús villajushca shimicunata aliguta catijcunami. Taita Diostallami ninanda alicachina cangui” nihuarcami. Ima tucunatapash villachijuj Diospaj Espiritumi, Jesús villajushca shimicunataca villachijun.

¹¹Chai jipami, jahua pacha pascarijta ricurcani. Chaipimi, shuj yuraj caballota ñapash ricurcani. Chai caballopi tiajuj runaca, imatapash Pactachij, Na Llullaj shutitami charirca. Tucuicuna imatalla rurashcata ricuchishpami, paica imatapash cashcatapacha rurashpa macanajun.

¹²Paipaj ñavipash, nina rupajunshnami carca. Paipaj umapipash, tauca diademacunata churajushcami carca. Pipash na yachashca, pailla yachashca shutita escribishcatami charirca.

¹³Paipaj churajushcapash, yahuarhuan tinirishcami carca. Paipaj shutipash: “TAITA DIOS RIMASHCA SHIMIMI” carca.

¹⁴Paitaca, jahua pachapi causanajuj soldadocunami, yuraj caballocunapi tiarishpa catinajurca. Paicunaca, ali juyailla linota rurashca, na mapayashca yuraj churajunata churajushcami carca.

¹⁵Paipaj shimimandaca, shuj filo filo espadami cai pachapi causajcunata chugrichingapaj llujshijurca. Paica, jirru varahuanmi mandajunga. Shinallata uvasta cutana pushtupi cutashca vinota ufiachinshnami, paica ninanda llaquichijunga. Chaitaca, Tucui Ushaita Charij Taita Dios ninanda fiñashcatami ricuchijun.

¹⁶Paipaj churajushcapipash, changapipash, cashna nishpa escribishca shutimi tiajurca: “JATUN MANDAJCUNATA JATUN MANDAJMI, AMOCUNAPAJ AMOMI” nishcatami charirca.

¹⁷Chai jipami, shuj ángel indipi shayajujta ricurcani. Chai angelca, jahuata rij alasyu animalcunatami, cashna nishpa ninanda caparijurca: “Shamuichi, Taita Dios ninanda carajujta micungapaj tandanajumuichi.

¹⁸Jatun mandajcuna, soldadocunata mandajcuna, ninan ushaita charijcuna, caballocuna, chai caballocunapi tiarishcacuna, gañanguna, na gañanguna, uchillacuna, jatungunapash huañuchi tucushca aichacunata micungapaj shamuichi” nijurcami.

¹⁹Shinallata manllanayai animaltapash, cai pachapi jatun mandajcunatapash, paicunapaj soldadocunatapashmi ricurcani. Paicunaca, yuraj caballopi tiajuj runahuan, paipaj soldadocunahuambash macanajungapajmi tandanajushca carca.

²⁰Ashtahuangarin manllanayai animaltapash, llullashpa villajtapashmi, prezu japirca. Chai llullashpa villajmi, animalpaj ñaupajpica ricuchinacunata rurashpa ricuchijuj carca. Chai ricuchinacunahuanmi, animalpaj ricuchinata charijcunata, chai animalman rijchajta mañajcunataca, umachijurca. Manllanayai animaltapash, llullashpa villajtapash ishcanditami, azufrehuan rupajuj nina cuchaman causajtallata shitarca.

²¹Chai soldadocunataca, yuraj caballopi tiajuj runami, paipaj shimimanda llujshijuj espadahuan huañuchirca. Chai huañuchi tucushcacunapaj aichacunataca, alasyu tucui animalcunami na munangacaman micunajurca.