Read Imbabura Highland Quichua APOCALIPSIS 2 Bible Online

APOCALIPSIS 2 - Imbabura Highland Quichua bible

APOCALIPSIS 2

¹Efeso pueblopi tandanajuj crijcunapaj angelmanmi, cashnatapacha escribingui nini: ‘Canchis luzerota ali lado maquipi charijuj, orota rurashca canchis candelerocunapaj chaupipi purijuj ñucami, cashna nini:

²Shinllitapacha can imata rurajujtapash, na ñapash fiñarijtapash ricujunimi. Canga, nalicunataca na ricunayachij cajtapash ricunimi. Paicunaca, villachun cachashcacunami canchi ninajujpipash, na chashnacuna cajta yacharcanguimi. Paicuna llullacuna cajtami ricurcangui.

³Ninan llaquita apajushpapash, na ñapash fiñarishpami, imata cashpapash na saquishpa, ñucata juyaimanda shinllitapacha rurajushcangui.

⁴Ashtahuangarin cashnamandami, candaca nalicachini: Cambaj punda juyaitaca saquishcanguimi.

⁵Shinamanda punda ali cashcata saquishcataca yarishpa, chaita saquishcamandapash ninanda llaquirishpa, punda rurajushcashnallata cunambash rurangui. Can na chashna rurajpica, cambajman ñapash shamushpami, cambaj candelero tiajujtapash quichushpa anchuchisha.

⁶Ashtahuangarin nicolaíta nishcacuna nalita ruranajujta millanayachishpaca, alitamari rurajungui. Paicuna rurajtaca, ñucapash millanayachinimi.

⁷Maijambash rinrita charijca, tandanajuj crijcunaman Diospaj Espíritu villajujta uyanguichi: Nalita mishajmanmi, causaita caraj quirupi fucushcata carasha. Chaica, Taita Dios causajuj juyailla llacta chaupipimi tiajun’ nishpa escribingui.

⁸Esmirna shuti pueblopi tandanajuj crijcunapaj angelmambash, cashna nishpa escribingui ninimi: ‘Callaripash, tucuripash ñucallatami cani. Huañushpapash cutin causajunimi. Ñucami cashna nijuni:

⁹Can imata rurashpa llaquita apajujta, imagupash illajtapash ricujunimi. (Shina cashpapash, ninanda charijmi cangui). Judea llactamandami canchi nishpa, canda nali shimicunata rimanajujtapash uyanimi. Paicunaca, napacha Judea llactamandachu, ashtahuangarin Satanasta yaringapaj tandanajujcunami.

¹⁰Llaquichi tucushpapash, na manllanachu cangui. Canguna purataca, ali crij cashcata ricungapajmi diablo, huaquingunataca prezuna huasipi churachinga. Chunga punllacamanmi, llaquitaca apanguichi. Ashtahuangarin huañungacaman aliguta cazushpa catihuanguilla. Shina catijujpica, causaita causanata ricuchij coronatami carasha.

¹¹Maijambash rinrita charijca, tandanajuj crijcunaman Diospaj Espíritu villajujta uyanguichi: Ima nalitapash mishajtami, jipa huañuica na llaquichi ushanga’ nishpa escribingui.

¹²Pérgamo shuti pueblopi tandanajuj crijcunapaj angelcunamambash, cashna nishpa escribingui ninimi: ‘Ishcandi ladoman filo filo espadatami charijuni. Ñucami, cashna nini:

¹³Can imata rurajujtapash, maipi causajujta Satanás tiajunatapash ricujunimi. Ashtahuangarin canga, ñucata crishcataca na cungashpami villajungui. Ñucamanda villajuj, ali cazuj Antipas shuti runataca, Satanás mandajpi causanajuj canguna purapimi huañuchirca. Chai punllacunapipash, na saquishcanguichu.

¹⁴Shina cajpipash can rurajushcataca, ashata nalicachinichu: Balaam shuti runa yachachishcata na saquingapaj munajcunatami, chaipica charingui. Chai Balaam runaca, israelcuna pandanajuchunmi, Balac shuti runaman yachachishca carca. Chaimandami, yanga dioscunaman imata carashcatapash micushpa huainayanajurca.

¹⁵Shinallata nicolaíta nishca runacuna yachachishcataca, na saquingapaj munajcunatapashmi charingui. Paicuna yachachinajujtaca, ninandami millanayachini.

¹⁶Chaitara saquishpa ninanda llaquirishpa, ali tucungui. Can na ali tucujpica, ñapashmi cambajman shamusha. Ñuca shimimanda llujshijuj espadahuanmi paicunahuanga macanajusha.

¹⁷Maijambash rinrita charijca, tandanajuj crijcunaman Diospaj Espíritu villajujta uyanguichi: Nalita mishajmanmi, pacashca tiajuj maná nishca micunata carasha. Yuraj rumigutapashmi carasha. Chai rumigupica, pipash na yachashca mushuj shutita churashcami canga. Chai shutitaca, chai rumiguta japijllami yachanga’ nishpa escribingui.

¹⁸Tiatira shuti pueblopi tandanajuj crijcunapaj angelmambash, cashna nishpa escribingui ninimi: ‘Taita Diospaj Churi ñucaca, nina rupajunshna ñavi, rupachishpa punchayachishca broncetashna chaquitami charini. Ñucami cashna nini:

¹⁹Ñucata juyashpami, ñucata crij cashpa, ali servishpa, alitalla rurashpa, ali shunguhuambacha causajungui. Cri callarijushpa rurajushcataca, ashtahuan yalimi cunambica rurajungui. Chaitaca ricujunimi.

²⁰Shina cajpipash can imata rurajujtaca, ashata nalicachinichu: Jezabel shuti huarmi nalita yachachijpipash, imatapash na nishpami saquingui. Chai huarmica, Dios ima nishcata villajmi cani nishpami, ñucata servijcunataca huainayachun yachachishpa urmachijun. Yanga dioscunaman imata carajtapash micunallami nishpapashmi yachachijun.

²¹Ñucami, chai huarmitaca ninanda llaquirishpa Diospajman tigrarichun shuyajurcani. Ashtahuangarin huainayanata saquishpa llaquiringapaj na munanllu.

²²Ricui, jatun ung:uita paiman ñuca cujpimi, paica camapi sirijunga. Chai huarmihuan huainayashpa paishnalla nalita rurashpa, Diospajman na tigrarijpica, ninan llaquitami cachamusha.

²³Chai huarmipaj huahuacunatapash huañuchishami. Shina rurajpimi, yuyaipi, shungupi imata yarinajujta tucuita ñuca yachajtaca, tandanajuj tucui crijcunapash yachanga. Shinallata canguna imatalla rurashcatapash ricushpami, tucuicunaman carasha.

²⁴Tiatira shuti pueblopi causajcuna canguna puramanda huaquingunaca, chashna pandachishpa yachachijtaca, na catishcachu canguichi. Satanaspajtaca alipachami yachajuna nijpipash, cangunaca na catishpami alita ruranguichi. Shinamandami na shuj llashachinata, cangunaman mingani.

²⁵Ashtahuangarin imata aliguta catinajushcataca, ñuca tigramungacaman aliguta charinguichilla.

²⁶Tucurimui punllacaman ñuca munashcatalla rurashpa, imatapash nalita mishajmanmi, llactacunata mandai ushachun carasha.

²⁷Ñuca mandajuchun Taita Dios ñucaman ushaita carashcashnallatami, chai mishajpash llactacunapi causajcunataca, alpa mangata jirru varahuan ñutunshna mandanga.

²⁸Shinallata tutamanda llujshimuj luzerotapash, paimanmi carasha.

²⁹Maijambash rinrita charijca, tandanajuj crijcunaman Diospaj Espíritu villajujta uyanguichi’ nishpa escribingui.