Read Imbabura Highland Quichua APOCALIPSIS 20 Bible Online

APOCALIPSIS 20 - Imbabura Highland Quichua bible

APOCALIPSIS 20

¹Jahua pachamanda, shuj ángel urai shamujtami ricurcani. Paica, manllanayai ucu ucu utujupaj llavetapash, jatun cadenatapash apashpami shamurca.

²Chai angelmi, dragón nishca, pundamandapacha causajuj culebrataca japishpa, huaranga huatacaman huatarca. Chai culebrami, diablo nishcapash, Satanás nishcapash carca.

³Chai diablotaca, manllanayai ucu ucu utujuman shitashpami, pungutapash vichashpa sellashpa saquirca. Llactacunapi causajcunataca, huaranga huata pactangacaman ama ashtahuan umachijuchunmi, chashna shitarca. Huaranga huata pactashca jipami, ashacamanlla cacharishpa saquinga.

⁴Chai jipallami, mandangapaj tiarinacuna tianajujta ricurcani. Chai tiarinacunapimi, Dios ushaita carashcacunaca ima rurashcatapash tapuchingapaj tiarinajurca. Jesusmandapash, Diospaj Shimimandapash villanajushpa, cungata fiti tucushpa huañuchi tucushcacunapaj almacunatapashmi ricurcani. Paicunaca, manllanayai animaltapash, chai animalman rijchata rurashcatapash, na mañashcachu carca. Chai animalpaj ricuchinataca, maquipi cashpa, frentepi cashpapash, na churai tucushcacunachu carca. Paicunami, huaranga huatacaman Cristohuan mandanajurca.

⁵Paicunami, punda causarina chayajpi punda causarirca. Ashtahuangarin caishuj huañushcacunaca, huaranga huata pactangacamanmi, nara causarirca.

⁶Punda causarina chayajpi causarinata charij, Diospajlla causajcunaca, ninanda cushijunguichi. Cangunataca, jipa huañuica na llaquichi ushangachu. Ashtahuangarin paicunaca Taita Diospajta, Cristopajta ruraj curacunami canga. Paicunami, huaranga huatacaman Cristohuan mandanajunga.

⁷Huaranga huata pactajpica, prezu tiajuj Satanasca cachari tucungami.

⁸Shina cacharijpica, cai pacha tucui chuscundi ladocunapi tiaj Gog nishca, Magog nishca llactacunapi causajcunata umachingapajmi llujshimunga. Chai llactacunapi causanajuj soldadocunatami, macanajugrichun tandachijunga. Chaicunaca, mama cucha manñapi tiaj t'iyu alpashna, na cuentai ushanalla ashtacacunami.

⁹Chaicunaca, tucui ladomanda shamushpami, Diospajlla causajcuna tianajuj pambatapash, pai juyashca pueblotapash, chaupipi churashpa shayanajurca. Shina shayanajujpimi paicunataca, Taita Dios jahua pachamanda ninata cachamushpa tucuchirca.

¹⁰Umachishpa causaj diablotaca, azufrehuan rupajuj nina cuchamanmi shitarca. Chaimanllatami, manllanayai animalpash, llullashpa villajpash, shitai tucushca carca. Paicunaca, chaipimi tutapash, punllapash causaita causaicaman, ninanda llaquichi tucunajunga.

¹¹Chai jipami, mandangapaj yuraj tiarinatapash, chai tiarinapi tiajujtapash ricurcani. Chai tiajujpaj ñaupamandaca, cai pachandi, jahua pachandi tucurijpimi, paicuna maipi causana pushtupash na tiarca.

¹²Shinallata chai jipaca, huañushcacunaca jatungunapash, uchillacunapash, Taita Diospaj ñaupajpi shayanajujtami ricurcani. Librocunatapash pascashcami carca. Shinallata shuj librotapash pascashcami carca. Chai libroca, causaita causagrinata villajuj libromi carca. Causajushpallata imata rurashcatapash, chai librocunapi escribishpa churashcatami, paicuna imashna rurashcashnallata Diosca, huañushcacunaman ricuchijurca.

¹³Shinallata mama cuchapashmi, chaipi huañushcacuna tiashcataca tigrachirca. Huañuipash, Hades nishcapash, paicunapi huañushcacuna tiashcataca tigrachircami. Tucui paicuna imatalla rurashcacunatami ricuchijurca.

¹⁴Huañuitapash, Hadestapash, nina rupajuj cuchamanmi shitarca. Chaiman shitai tucunaca, jipa huañuimi.

¹⁵Causaita causagrinata villajuj libropi shutita na escribishcacunaca, nina rupajuj cuchamanmi shitai tucunajurca.