Read Imbabura Highland Quichua APOCALIPSIS 21 Bible Online

APOCALIPSIS 21 - Imbabura Highland Quichua bible

APOCALIPSIS 21

¹Mushuj jahua pachata, mushuj cai pachatapashmi ricurcani. Ashtahuangarin punda tiashca jahua pachapash, cai pachapash illarcami. Mama cuchapash, na ashtahuan tiarcachu.

²Juan ñucami, cashnatapash ricurcani: Taita Dios alichishca, paipajlla tiajuj mushuj Jerusalén puebloca, jahua pachamandami urai shamurca. Chai puebloca, cusata cazarangapaj juyailla alichirishca cuitsagushnami carca.

³Shinallata jahua pachamandaca, cashna nishpa ninanda caparijtami uyarcani: “Ricuichi, Taita Diospaj jatun carpa huasiguca, gentecunahuanmi. Paicunaca, Taita Diospaj huahuacunapachami canga. Diosca, paillata paicunapaj Taita Dios cangapajmi, paicunahuanga causajunga.

⁴Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami” nircami.

⁵Mandangapaj tiarinapi tiajujca, cashnami nijurca: “Ricui, ñucami imatapash tucuita mushujta rurani” nishpami, cashnatapash nihuarca: “Cai ñuca villajushca shimicunataca na llullashpa pactachij cajpi escribingui” nihuarcami.

⁶Cashnatapashmi nihuarca: “Cashna nishcataca, ña pactachircanimi. Ñucami, A letrashna tucuita callarichijpash, Zeta letrashna tucuchimujpash cani. Maijambash yacunayachijpica, ñucami causaita cuj pugyumanda yacuguta, yanga carasha.

⁷Maijambash nalita mishashpaca, ñuca carajushcataca tucuitami japinga. Shinallata ñucami, paipaj Taita Dios casha, paipash ñuca huahuami canga.

⁸Ashtahuangarin gentecunata manllajcuna, ñucata na crijcuna, millanayaita rurajcuna, huañuchijcuna, huainayajcuna, yumbucuna, yanga dioscunata mañajcuna, tucui llullacunapash, azufrehuan rupajuj nina cuchapi causagrinatami japinga. Chaiman rinaca, jipa huañuimi canga” nihuarcami.

⁹Chai jipallami, tucurimui punllapi llaquichinacunata, canchis copa jundata charinajuj canchispura angelcunamanda, shuj ángel ñucapajman shamurca. Paica: “Caiman shamui, ñucami Llamahuan cazaragrijuj huarmiguta ricuchisha” nihuarcami.

¹⁰Shinallata Diospaj Espirituhuanmi, shuj jatun urcu jahuaman chai angelca apahuarca. Chaiman apashpami, Diospajlla Jerusalén jatun pueblotaca, jahua pachamanda urai shamujujta ricuchihuarca.

¹¹Taita Dios punchapambagu cajpimi, chai pueblopash punchapambagu ricurijurca. Paica, ninan juyailla rumishna, jaspe nishca rumishna, punchapamba espejoshnami ricurijurca.

¹²Chai pueblota muyushca jatun pircapica, chunga ishcai pungumi tiarca. Chai pungucunapica, chunga ishcai angelcunami shuj shujlla shayanajurca. Chai pungucunapica, taita Israelpaj chunga ishcai churicunapaj shuticunatami escribishca carca.

¹³Quimsa punguca, indi llujshimuj ladoman, shuj quimsa pungucunaca, jahua ladomanmi carca. Shinallata quimsa punguca, urai ladoman, shuj quimsa punguca, indi huashajuj ladomanmi tiarca.

¹⁴Pueblota muyushca jatun pircataca, chunga ishcai mulun rumi jahuapimi shayachirca. Chai rumicunaca, Llama villachun cachashca chunga ishcaicunapaj shuticunahuanmi carca.

¹⁵Ñucaman villaj angelca pueblotapash, pueblota muyushca jatun pircatapash, pungucunandi medingapajmi, shuj oro varata charijurca.

¹⁶Chai puebloca, chuscundi ladomanmi chashnallata carca. Chai varahuan medijpica, ishcai huaranga ishcai patsaj kilometrotami charirca. Uraimambash, vichaimambash, jahuamambash, chashnallatami carca.

¹⁷Pueblota muyushca jatun pircatapashmi medijurca. Runacuna alpata varahuan medinshnallata ángel medijujpica, sucta chunga chuscu metrotami charirca.

¹⁸Chai jatun pircataca, jaspe nishca juyailla rumicunahuan rurashcami carca. Ashtahuangarin puebloca, oro cashcahuan rurashca, punchapamba shitajuj, maillashca espejoshnami carca.

¹⁹Pueblota muyushca jatun pircapaj mulun rumicunaca, tucui tiashca juyailla rumicunata churashpa, juyaillaguta rurashcami carca. Chai punda mulun rumica, jaspe nishcami carca. Cati rumica, zafiro nishcami, ishcaipaj cati rumica, ágata nishcami, quimsapaj cati rumica, esmeralda nishcami carca.

²⁰Chuscupaj cati rumica, ónice nishca, pichapaj cati rumica, cornalina nishca, suctapaj cati rumica, crisólito nishca, canchispaj cati rumica, berilo nishca, pusapaj cati rumica, topacio nishca, iscumbaj cati rumica, crisopraso nishca, chungapaj cati rumica, jacinto nishca, chunga shujpaj cati rumica, amatista nishca rumicunatami churashca carca.

²¹Chai chunga ishcai pungucunaca, chunga ishcai perlascunami carca. Chai pungucunaca, shujlla perlasta rurashcami carca. Shinallata pueblopi tiaj ñambash, ashtahuan ali orota rurashcami, punchapamba espejoshna ricurijurca.

²²Chai pueblopi Diospaj huasi tiajujtaca, na ricushcanichu. Ashtahuangarin Tucui Ushaita Charij, Mandaj Taita Diospash, Llamapashmi, Diospaj huasishna carca.

²³Chai pueblota punchayachijuchunga inditapash, lunatapash na minishtinllu. Chai pueblotaca, Taita Diospash, Llamapashmi punchapamba michashna punchayachijun.

²⁴Tucui llactacunamanda quishpirishca gentecunaca, chai pueblopaj michapimi purinajunga. Shinallata cai pachapi jatun mandajcunapash, paicuna ninanda alicachi tucushcataca, chaimanmi apashpa rinajunga.

²⁵Chaipica, tutapash na tiajpimi, ima punllapash pungucunataca, ima horaspash na vichanga.

²⁶Shinallata tucui llactacunapi causajcuna ninanda alicachi tucushcatami, chaiman apanajunga.

²⁷Ima mapapash, millanayaita rurashcapash, llullashpa causajcunapash, chai pueblopica napacha yaicungachu. Ashtahuangarin causaita causagrinata villajuj libropi paicunapaj shuticunata escribishcata charijcunallami yaicugringa. Chai librotaca, Llamami charijun.