Read Imbabura Highland Quichua APOCALIPSIS 4 Bible Online

APOCALIPSIS 4 - Imbabura Highland Quichua bible

APOCALIPSIS 4

¹Chai jipami, jahua pachapi pungu pascariajta ñapash ricurcani. Punda ñucaman villajuj shimica, trompeta huacanshnami uyarimurca. Paica ñucahuan parlashpami, cashna nihuarca: “Caiman vichai shamui. Can caicunata ricujushcacunaca, jipamanmi chashna tucunga. Chaicuna imashna tucunatami, canman ricuchisha” nihuarcami.

²Shina nijpica ñapashmi, Diospaj Espíritu junda carcani. Shina cajpimi jahua pachapica, mandangapaj tiarina tiajujta ñapash ricurcani. Chai mandangapaj tiarinapica, shujmi tiajurca.

³Chai tiajujca, jaspe shuti, cornalina shuti juyailla rumicunashna punchapambami ricurijurca. Pai tiajuj tiarina muyundipica, shuj cuichijmi punchapamba shitajuj esmeralda shuti rumishna muyushca tiajurca.

⁴Chai mandangapaj tiarina muyundipimi, ishcai chunga chuscu tiarinacunatapash ricurcani. Chai tiarinacunapica, ishcai chunga chuscu rucucunami, yuraj churajunacunata churajushca, umapipash, oro coronata churajushcacuna tianajurca.

⁵Mandangapaj tiarinamandaca, punchapamba shitamujpash, culun nijujcunapash, caparishcacunapashmi uyarirca. Chai jatun tiarina ñaupajpica, canchis lamparacunami michata japichishca rupajurca. Chaicunaca, Taita Diospaj canchis espiritucunami.

⁶Chai jatun tiarina ñaupajpica, mama cuchapash espejoshnami cristalman rijchaj tiajurca. Shinallata mandangapaj tiarina ladomambash, chai tiarina muyundipipash, causaita charij chuscu animalcunami huashamambash, ñaupamambash ñavi lulungunalla junda tianajurca.

⁷Causaita charij chai punda animalca, leonman richajmi carca, shujpaj catica maltun shicushnami carca. Ishcaipaj catica, gente ñavishna ricujujmi carca. Quimsapaj catica, calpajuj jatun angashnami carca.

⁸Causaita charij chai chuscu animalcunaca, tucuillami sucta alasta charirca. Chai alascunapica jahuallapash, ucumambash, ñavi lulungunalla jundami carca. Paicunaca punllapash, tutapash na samashpami, cashna ninajurca: “Jucha illaj, jucha illaj, jucha illaj, Tucui Ushaita Charij Jatun Taita Dios. Canga, pundapash canllatami causajurcangui, cunambash canllatami causajungui, jipamambash canllatami shamungui” ninajurcami.

⁹Causaita charij chai chuscu animalcunaca, mandangapaj tiarinapi causaita causaicaman tiajujtami ninanda alicachishpa, jatunyachishpa pashi ninajurca.

¹⁰Shina ninajujpimi, chai ishcai chunga chuscu rucucunapash, jatun tiarinapi tiajujpaj ñaupajpi cungurishpa, causaita causaicaman tiajujtaca mañanajurca. Shinallata paicunapaj coronacunatapash llujchishpami, mandangapaj tiarina ñaupajpi churashpa, cashna ninajurca:

¹¹“Jatun Dioslla, canmi tucui imatapash rurashcangui. Can munashcamanda rurashcami, tucui ima cashpapash tian. Chaimandami canga, ninan punchapamba tiajunata, ninanda alicachi tucunata, ninan ushaihuan tiajunata chasquinapacha cangui” ninajurcami.