Read Imbabura Highland Quichua APOCALIPSIS 5 Bible Online

APOCALIPSIS 5 - Imbabura Highland Quichua bible

APOCALIPSIS 5

¹Mandangapaj tiarinapi tiajuj ali lado maquipica, ucumambash, jahuallapash escribishca librota charijujtami ricurcani. Chai libroca, canchis sellocunahuan sellashcami carca.

²Shinallata shuj ninan shinlli ángel ninanda caparishpa, cashna tapujujtami ricurcani: “Chai sellashcacunata fitishpa, librota pascangapaca, ¿pita ali tianga?” nijurcami.

³Ashtahuangarin jahua pachapi, cai pachapi, alpa ucupi tiajcunapash, chai librota pascai ushangapaca, pillapash na tiarcachu. Chaita ricungapajllapash, na tiarcachu.

⁴Chai librota pascashpa, chaipi escribishcata leyingapajpash, ricungapajllapash pipash alica na tiajpimi, ninanda huacajurcani.

⁵Shina huacajujpimi, chai rucucunamanda shujca, cashna nihuarca: “Ama huacaichu. Ricui, Judá aillumanda Leonga, Davidpaj mirai Churimi. Paica, ima nalitapash misharcami. Chashna cashpami chai librotaca, canchispi sellashcata fitishpa pascai ushan” nihuarcami.

⁶Shina ricujushpami, mandangapaj tiarina chaupipi, shinallata causaita charij chuscu animalcunapaj chaupipi, rucucunapaj chaupipipash, huañuchi tucushcaman rijchaj shuj Llama shayajujtami ricurcani. Chai Llamaca, canchis cachucunata, canchis ñavi lulundapashmi charirca. Chai canchis ñavi lulungunaca, tucui cai pachaman cachamushca Diospaj canchis espiritucunami.

⁷Chai Llamami, mandangapaj tiarinapi tiajujpajman shamushpa, paipaj ali lado maquipi charijuj librotaca japirca.

⁸Chai librota japijpimi, causaita charij chai chuscu animalcunapash, ishcai chunga chuscu rucucunapash, chai Llamapaj ñaupajpi cungurirca. Chaicunaca, tucuillami arpacunatapash, oro copacunatapash, inciensohuan jundata charinajurca. Chai inciensoca, Diospajlla causajcuna paita mañashcacunami carca.

⁹Paicunaca shuj mushuj candanatami, cashna nishpa candanajurca: “Canllamari, librota japishpa, sellashcacunatapash pascaitaca ushangui. Canga, huañuchi tucushpami, cambaj yahuarhuan ñucanchitaca tucui aillu puracunamanda, shuj shuj shimita rimaj puracunamanda, gente puracunamanda, llactacunamandapash, Taita Diospaj causachun randircangui.

¹⁰Shina randishpami, ñucanchi Taita Diospajta rurachun, jatun mandajcuna cachun, curacuna cachumbash rurashcangui. Shina cashpami, cai pachapi causajcunataca tucuicunata mandanajushun” ninajurcami.

¹¹Chai jipa ricujpica, mandangapaj tiarinatapash, animalcunatapash, rucucunatapash, chaupipi churashpa ashtaca angelcuna rimanajujtami uyarcani. Chai angelcunaca, ashtaca millón millonmi carca.

¹²Paicunaca, shinllitapachami cashna ninajurca: “Diosman huañuchi tucushca Llama cashpami canga, ninan ushaita charinatapash, ninan charij canatapash, ali yachaitapash, ninan shinlli canatapash, ninanda alicachi tucunatapash, punchapambagumi cangui ni tucunatapash, alicachi tucunatapash chasquinapacha cangui” ninajurcami.

¹³Shinallata jahua pachapi, cai pachapi, alpa ucupi, mama cuchapi ima tiachumbash rurashcacuna. Chaicunapi tucui tiajcunapash, cashna ninajujtami uyarcani: “Mandangapaj tiarinapi tiajujpash, Llamapash, causaita causaicaman alipachamari cangui nishpa, jatunyachishpa, ninanda alicachi tucunatami charin. Shinallata tucui ushaitapash charinmi” ninajurcami.

¹⁴Shina ninajujpimi, causaita charij chai chuscu animalcunaca: “Shina cachun” ninajurca. Shinallata ishcai chunga chuscu rucucunapash, causaita causaicaman causajujtami, alpaman chayajta urai cungurishpa ninanda alicachinajurca.