Read Imbabura Highland Quichua APOCALIPSIS 7 Bible Online

APOCALIPSIS 7 - Imbabura Highland Quichua bible

APOCALIPSIS 7

¹Chaicunata ricushca jipami, cashnatapash ricurcani: Cai pachapi tiaj chuscundi manña tigranacunapimi, angelcunaca shuj shujlla shayanajurca. Paicunaca alpamambash, mama cuchamambash, quirucunamambash huaira ama shamuchunmi, huaira shamunata chuscundi manña tigranacunapi jarcashpa shayanajurca.

²Shinallata indi llujshimuj ladomanda shuj ángel vichai shamujujtapashmi ricurcani. Chai angelca, causajuj Taita Diospaj sellotami charirca. Paica alpatapash, mama cuchatapash huaglichingapaj, ushaita charij caishuj chuscu angelcunatami, cashna nishpa ninanda caparijurca:

³“Alpatapash, mama cuchatapash, quirucunatapash nara huaglichinachu canguichi. Ñucanchi Taita Diosta servijcunapaj frentecunapi, sellanarami canchi” nijurcami.

⁴Chai jipaca, sellashcacunapaj numerocunatapashmi uyarcani: “Tucuilla Israel aillu puramandaca, patsaj chuscu chunga chuscu huarangatami ña sellashca” nijurcami.

⁵Judá aillumandaca, chunga ishcai huarangatami sellashca carca. Rubén aillumandapash, chunga ishcai huarangatami sellashca carca. Gad shuti aillumandapash, chunga ishcai huarangatami sellashca carca.

⁶Aser aillumandapash, chunga ishcai huarangatami sellashca carca. Neftalí aillumandapash, chunga ishcai huarangatami sellashca carca. Manasés aillumandapash, chunga ishcai huarangatami sellashca carca.

⁷Simeón aillumandapash, chunga ishcai huarangatami sellashca carca. Leví aillumandapash, chunga ishcai huarangatami sellashca carca.

⁸Zabulón aillumandapash, chunga ishcai huarangatami sellashca carca. José aillumandapash, chunga ishcai huarangatami sellashca carca. Benjamín aillumandapash, chunga ishcai huarangatami sellashca carca.

⁹Chaita ricushca jipami, pipash na cuentai ushanalla, ashtaca gentecunata ñapash ricurcani. Paicunaca, cai pachapi tiaj tucui llactacunamanda, aillu puracunamanda, gente puracunamanda, shuj shuj shimita parlajcunamandapash shamushcami carca. Paicunami, mandangapaj tiarinapi tiajujpaj ñaupajpi, Llamapaj ñaupajpipash shayanajurca. Paicunaca, yurajta churajushcami, ramostapash chariaj shayanajurca.

¹⁰Paicunaca, cashna nishpami ninanda caparinajurca: “Quishpichinaca, mandangapaj tiarinapi tiajuj ñucanchi Taita Diospaj, maltun Llamapajpashmi” ninajurcami.

¹¹Mandangapaj tiarinatapash, rucucunatapash, causaita charij chai chuscu animalcunatapash, chaupipi churashpami, tucuilla angelcuna muyundi shayanajurca. Paicunaca, mandangapaj tiarina ñaupajpi alpaman chayajta urai cumurishpami, Taita Diostaca ninanda alicachishpa,

¹²cashna ninajurca: “Shina cachun. Ñucanchi Taita Diosca, causaita causaicaman aligumi cangui nishpa, punchapambagumi cangui, ali yachaitami charingui nishpami pashi ninajurca. Shinallata ninanda alicachi tucushcami cangui, ninan ushaitami charingui, ninan shinllimi cangui. Shina cachun” ninajurcami.

¹³Shina ninajujpimi, chai rucu puracunamanda shujca, cashna nihuarca: “¿Chai yuraj churajunata churajushcacunaca maijangunata, maimandata shamushca?” nihuarcami.

¹⁴Shina nijpimi ñucaca: “Canmari yachapangui, taitalla” nircani. Shina nijpica, cashnami nihuarca: “Paicunaca, ninanda llaquichijujmanda shamushcacunami. Churajunatapash tajshashpami, Llamapaj yahuarpi yurajyachishca.

¹⁵Shina cashpami tutapash, punllapash paicunaca, mandangapaj tiarinapi tiajuj Taita Diospaj ñaupajpi, Diospaj huasipi paita servinajun. Paicunataca, mandangapaj tiarinapi tiajujmi, paipaj ñaupajpi alichishpa charijunga.

¹⁶Paicunaca, ña na ashtahuan yacunayachingachu, na ashtahuan yarjachingachu. Indipash, na ashtahuan rupachingachu. Ima rupaillapash, na rupachingachu.

¹⁷Mandangapaj tiarina chaupipi tiajuj Llamami, paicunataca michijunga. Paillatami, causaita caraj yacu tugyajuj pugyucunapi ufiachumbash pushanga. Paicunapaj ñavi viquitapash, Taita Diosmi tucuilla fichanga” nihuarcami.