Read Imbabura Highland Quichua APOCALIPSIS 8 Bible Online

APOCALIPSIS 8 - Imbabura Highland Quichua bible

APOCALIPSIS 8

¹Suctapaj cati sellashcata Llama fitijpica, chaupi horastashnami jahua pachapica chulunlla quedarca.

²Chai jipallami, canchis angelcuna Taita Diospaj ñaupajpi shayanajujta ricurcani. Paicunamanmi, canchis trompetacunata curca.

³Chai jipa shuj ángel shamushpaca, inciensota cushnichina oro copata apashpami, altar ñaupajpi shayarirca. Diospajlla causajcuna tucuicuna mañashcacunahuan mirachishpa, oro altar jahuapi cushnijuchun churachunmi, ashtaca inciensotapash chai angelman curca. Chai altarca, mandangapaj tiarina ñaupajpimi carca.

⁴Chai angelpaj maquimanda incienso cushnijuj cushni llujshishpaca, Diospajlla causajcuna mañashcacunahuan chapurishpami, Taita Diospaj ñaupajman vichai rirca.

⁵Chai angelca, inciensota cushnichij copata japishpami, altarpi rupajuj ninata jundachishpa, cai pachaman shitamurca. Shina shitamujpimi, ninanda culun nijpash, caparinajujpash uyarirca. Shinallata punchapamba shitajcunapashmi ricurirca. Alpa mamapash, ninanda cuyushpami tucuchijurca.

⁶Chai canchis angelcunaca, paicuna charinajuj trompetata huacachingapajmi alichirinajurca.

⁷Punda ángel trompetata huacachijpica runduhuan, ninahuan, yahuarhuan chapurishpami, ninaman tigrarca. Chaita cai pachaman shitamujpimi, cai pachata quimsapi chaupishpa churashca chai quimsamanda shuj chaupi cai pacha alpapi tiaj quirucunapash, verdella jihuacunapash tucuilla rupajurca.

⁸Jipa ángel trompetata huacachijpica, jatun urcuman rijchaj rupajuj ninatami, mama cuchaman shitamurca. Shina shitamujpimi, quimsapi shicanyachishca mama cuchaca, yahuarman tigrarca.

⁹Shina tucujpimi, quimsapi shicanyachishca caishuj mama cuchapi causanajuj animalcuna huañurca. Shinallatami quimsapi shicanyachishca chaishuj mama cuchapi purinajuj barcocunapash faquirishpa tucurirca.

¹⁰Ishcaipaj cati ángel trompetata huacachijpica, jahua pachamandami michun rupajunshna, jatun luzero urmamurca. Chai luzeromi, quimsapi shicanyachishca jatun yacucunapipash, pugyu yacu jahuacunapipash urmarca.

¹¹Chai luzeroca, Jayaj shuti cashpami, quimsapi shicanyachishca caishuj yacucunata jayajyachirca. Chashna jayaj yacuta ufiashpami, ashtaca gentecuna huañurca.

¹²Quimsapaj cati ángel trompetata huacachijpica, quimsapi shicanyachishca indita, lunata, luzerocunatapashmi yanayachun huaglichirca. Shinamandami, quimsapi shicanyachishca chaupi punllapash, tutapash yana yana tucurca.

¹³Chai jipallami, shuj ángel jahuata rishpa, jahua pacha chaupita rijujta ricurcani. Chai angelca, cashna nishpami caparijurca: “¡Aij, aij, aij, cai pachapi causajcunaca, imachari tucunga! Caishuj quimsa angelcuna trompetata huacachijpica, ninan llaqui tiangarami” nijtami uyarcani.