Read Imbabura Highland Quichua APOCALIPSIS 9 Bible Online

APOCALIPSIS 9 - Imbabura Highland Quichua bible

APOCALIPSIS 9

¹Chuscupaj cati ángel trompetata huacachijpica, jahua pachamanda cai pachaman, shuj luzero urmamujtami ricurcani. Chai luzeromanmi, manllanayai ucu ucu utujupaj llaveta curca.

²Shina cujpimi, chai manllanayai ucu ucu utujuta pascajpi, jatun jornomanda cushni llujshimunshna cushni llujshijurca. Chai utujumanda llujshimuj cushnimi, inditapash, huairatapash yanayachirca.

³Chai cushnimandami, langosta jurucuna llujshishpa, alpapi purinajurca. Chai jurucunamanmi, cai alpapi tiaj alacrangunashna canichun, ushaita curca.

⁴Paicunataca, cashnami nirca: “Cai alpapi tiaj jihuacunata, imapash verdellacunata, ima quirucunatapash, na huaglichinachu canguichi. Ashtahuangarin frentepi Taita Diospaj sellota na charij gentecunatalla llaquichinguichi” nishpami mandarca.

⁵Chai gentecunataca, na huañuchishpa, ashtahuangarin picha quillacamanmi canishpalla llaquichinajuchun ushaita curca. Langostacuna canijpica, genteta alacrán canijpi nanachinshnallatami nanachinajurca.

⁶Chai punllacunapi causanajuj gentecunaca, huañushcaiman yanajushpapash, na huañui ushangachu. Paicuna huañungapaj ninanda munajpipash, huañuica na japishpami anchuringa.

⁷Chai langostacunaca, jatun macanajuiman ringapaj alichishca caballocunashnami ricurirca. Umacunapica, oro coronatashnami churajushca carca. Paicunapaj ñavica, gentepaj ñavishnami carca.

⁸Paicunaca, huarmipaj ajchatashnami charirca. Quirucunapash, leonbaj quirushnami carca.

⁹Paicunaca, jirru churajunata churajushcashnami carca. Paicunapaj alascunapash, ashtaca caballocuna carretacunata aisashpa, jatun macanajuiman rijunshnami, huajlla huacanajurca.

¹⁰Chupacunapash, alacranbaj chupashna tujsinallami carca. Paicunapaj chupacunapica, gentecunata picha quillacaman llaquichina ushaitapashmi charirca.

¹¹Chaicunataca, manllanayai ucu ucu utujuta mandaj angelmi mandajurca. Chai angelpaj shutica, hebreo rimaipica, Abadón nishca shutimi. Griego rimaipica, Apolión nijunmi.

¹²Punda llaqui tucurijpipash, caipaj cati ishcai llaqui tianrami.

¹³Chai pichapaj cati ángel trompetata huacachijpica, Taita Diospaj ñaupajpi oro altarpaj chuscundi lado cachu chaupimanda rimajtami uyarcani.

¹⁴Chai rimajujca, trompetata charijuj pichapaj cati angelmanmi, cashna nirca: “Eufrates shuti jatun yacu ladopi huatai tucushca shayanajuj chuscu angelcunata cachagriri” nircami.

¹⁵Shina nijpimi, chai chuscu angelcunataca cacharigrirca. Paicunami, cai pachata quimsapi shicanyachishca gentecunata huañuchingapaj ushaita charirca. Paicunaca chai horas, chai quilla, chai huata pactajpi ringapajmi shuyanajurca.

¹⁶“Caballopi tiarishca soldadocunaca, ishcai patsaj millonmi tian” nijtami uyarcani.

¹⁷Chai caballocunata, caballopi tianajujcunatapash, muscuipishnami ricurcani. Paicunaca puca, azul, quillu jirrucunata churajushcami tianajurca. Chai caballocunapaj umapash, leonbaj umacunashnami carca. Paicunapaj shimimandaca ninandi, cushnindi, azufrendimi llujshijurca.

¹⁸Chai caballocunapaj shimimanda ninandi, cushnindi, azufrendi llujshinajuj, chai quimsa llaquichinacunahuanmi, cai pachapi causaj, quimsapi chaupishpa churashca chai quimsamanda shuj chaupi gentecunataca huañuchinajurca.

¹⁹Chai caballocunaca, chashna huañuchina ushaitaca shimipipash, chupapipashmi charirca. Chupacunapash, culebrapaj umashnami ricurirca. Chaicunahuanmi ninanda llaquichinajurca.

²⁰Shina llaquichijujpipash, na huañushpa puchushca gentecunaca, paicuna nalita rurashcamandapash na llaquirishpa, Diospajman na tigrarircachu. Ashtahuangarin orota, culquita, bronceta, rumita, caspita rurashca dioscunata, ayacunata mañanatapash napacha saquircachu. Chai dioscunaca ñausacunami. Rinripash na uyaj, puritapash na purijcunami.

²¹Chai gentecunaca huañuchishpa, brujurishpa, huainayashpa, shuhuashpa causanatapash napacha saquishpami, Diospajman na tigrarirca.