Read Imbabura Highland Quichua RUT 2 Bible Online

RUT 2 - Imbabura Highland Quichua bible

RUT 2

¹Noemí huarmiguca, paipaj cusa Elimelecmandami, shuj familiata charirca. Chai runaca, ninan charijmi carca. Paica, Booz shutimi carca.

²Shuj punllami, moabitapura Rutca, Noemita cashna nirca: —Pambaman richun saquihuayari nipanimi. Maijambaj ñavipipash ali ricurishpaca, paipaj huashata catishpa pallajushallami— nijpimi Noemica: —Rilla, ñuca huahua— nirca.

³Shina nijpi rishpa pambaman chayashpami, cebadata cuchunajujta catishpa pallajujurca. Ashtahuangarin chai alpaca, Booz runagupajmi carca. Paica, Elimelecpaj familiami carca.

⁴Booz runaca, Belenmanda chayamushpami, cebadata cuchuj runacunataca: —Mandaj Dios cangunahuan cachun— nirca. Shina nijpimi paicunaca: —Mandaj Diosca, candapash bendiciapachun— ninajurca.

⁵Booz runaguca, cebadata cuchujcunapaj mayordomo paita servijtami: —¿Caica, pipaj cuitsaguta?— nishpa tapurca.

⁶Shina tapujpimi, cuchujcunapaj mayordomo paita servij runaca, cashna nishpa tigrachirca: —Paica, moabita cuitsagumi. Paica, Moab pambacunamandami, Noemí huarmihuan tigramurca.

⁷Ñucatami, cashna nishpa mañahuarca: ‘Cebadata cuchujcunata catishpa tandachijuchun, marcai cebada ladocunapi tandachijuchun saquihuai’ nihuarcami. Tutamandatapacha yaicushpami, ashagullatapash na samashpa, cunangaman pallajujun— nircami.

⁸Shina nijpimi Booz runaguca, Rut huarmigutaca cashna nirca: —Uyai, ñuca huahualla. Shuj alpacunapi pallajungapaca, ama ringuichu. Caimandapash ama yalinguichu, ñucata servij huarmicunahuan caipi canguilla.

⁹Pambapi cebadata maipi cuchunajujpipash, aliguta ricushpa catinguilla. Ñuca servijcunataca, candaca ama imatapash nichunmi mandarcani. Can yacunayachishpaca, ñucata servijcuna llujchimushca yacuhuan tianajuj funducunamanda japishpa ufiagringuilla— nircami.

¹⁰Shina nijpimi Rut huarmiguca, urai cumurishpa alpapi cungurishpa, cashna nirca: —Ñucaca, shuj llactamanda cashpapash can alicachishpa ricuchunga, ¿imashpata cambaj ñaupajpica ali ricuripashcaniyari?— nircami.

¹¹Shina nijpimi Booz runaca, cashna nishpa tigrachirca: —Cambaj cusa huañushca jipa, cambaj suedramanda tucui imatalla rurashcatapash yachanimi. Cambaj taitata, mamatapash, cambaj huacharishca llactatapash saquishpami, ima horapash na rijsishca llactaman shamushcangui.

¹²Can chashna rurashcamandaca, Mandaj Diosllata imaguta cashpapash cupachun. Can japina cashcataca, israelcunata Mandaj Taita Diosllata pactachipachun. Paipaj alas ucupi pacajungapajmi shamushcangui— nircami.

¹³Shina nijpimi Rutca, cashna nirca: —Ñucata mandajlla, cambaj ñaupajpica ali ricuripashcaiman. Cambaj rimashca shimicunapash cushichihuanmi. Canda servij ñucaca, canda servij huarmi puramanda maijan huarmishnallapash na capanichu. Chashna cajpipash ali shimihuan rimashpami, ñuca shungupi cushichishcangui— nircami.

¹⁴Micuna horas chayajpica, Booz runaguca: —Caiman shamui. Tandata japishpa, vinagrepi mutiyachishpa micui— nircami. Shina nijpimi Rut huarmiguca, cebadata cuchujcunahuan tandanajushpa, micungapaj tiarirca. Chaipimi Booz runaguca, micunata cararca. Shina carajpi, na munangacaman micujpipash puchurcarami.

¹⁵Rut jatarishpa, cutin pallajungapaj rijpimi Booz runaca, paipaj servijcunataca, cashna nishpa mandarca: —Marcai mundunmanda japijpipash, ama pingaichishpa saquinguichilla.

¹⁶Ashtahuangarin pai tandachishpa japichun, cangunapaj maquimandapash asha asha urmachinguichilla. Paitaca, pipash na jarcashpa rimanachu canguichi— nircami.

¹⁷Tutayangacamanmi, chai pambapica pallajujurca. Pai pallajushca cebadata jacujpica, ishcai chunga ishcai kiloshna cebadami llujshirca.

¹⁸Chai cebadata apashpami, puebloman rirca. Chaiman apajpimi paipaj suedra Noemica, pai tandachishcata ricurca. Chai jipaca, pai micujushpa na ushashpa puchuchishcatapashmi llujchishpa, paiman cararca.

¹⁹Chaita ricushpami paipaj suedraguca, cashna nirca: —¿Cunanga, maipita pallajurcangui? ¿Maipita trabajarcangui? Canda chashna ayudashcamandaca, paitapash bendiciapachun— nircami. Shina nijpimi Rutca, pihuan trabajashcatapash paipaj suedraman villashpa, cashna nirca: —Maipimi cunan ñuca trabajarcani, chai runaguca Booz shutimi— nircami.

²⁰Shina nijpimi Noemica, paipaj jachundaca cashna nirca: —Paitaca, Mandaj Dios bendiciapachun. Punda huañushcacunatapash juyashca cashpami, cunan ñucanchi causajtapash llaquishca— nircami. Chai jipaca, Noemica cashnatapashmi nirca: —Chai runaguca, ñucanchipaj familiamari. Paimi, ñucanchita ayudai ushanga— nircami.

²¹Shina nijpimi moabitapura Rutca, cashna nirca: —Ashtahuan cashnatapashmi nihuarca: ‘Cebada cozechai tucuilla tucuringacaman, ñucata servij huarmicunahuan tandanajushpa purijuilla’ nihuarcami— nircami.

²²Shina nijpimi Noemica, paipaj jachun Rut huarmigutaca, cashna nirca: —Ñuca huahualla, ama shuj alpacunaman rishpa, paipaj servij huarmicunahuanlla tandanajushpa purijushpami, ali canguiman— nircami.

²³Chaipimi Rutca, cebadata, trigota cozechai tucuchingacaman pallajushpa, Booz runata servij huarmicunahuan tandanajushpa purijurca. Paica, paipaj suedrahuanmi causajurca. Booz shuti runaguca, trillana pambapimi Ruthuan parlajushca