Read Imbabura Highland Quichua RUT 3 Bible Online

RUT 3 - Imbabura Highland Quichua bible

RUT 3

¹Shuj punllami, Rutpaj suedra Noemica, cashna nijurca: —Ñuca huahualla, can aliguta causachunga, ¿nachu canman cusaguta mascana cani?

²Booz runaca, ¿nachu ñucanchi familiapura? Canga, paita servij huarmigucunahuanmi carcangui. Ricui, paica cunan tutami, tandachishpa mundunashca paipaj cebadata huairachingapaj ringa.

³Armashpa, mishquilla ashnajuj jambiguta javirishpa, ali churajunagutapash churajushpa, trillana pambaman ringui. Ashtahuangarin pai micushpa, ufiashpa tucuchingacaman chai runagupaj ñaupajpica, amara ricuringuichu.

⁴Pai puñungapaj siririjpica, maipi siririjtapash aliguta ricungui. Shina ricushpaca, chaqui pundapi jatanata alsachishpa siriringapaj ringui. Can imata rurana cajpipash, paillata ningallami— nijurcami.

⁵Shina nijpimi, Rutca: —Imata can mandajpipash, tucuita rurapashallami— nishpa tigrachirca.

⁶Trillana pambaman Rut urai rishpaca, paipaj suedra imashna mandashcatami, tucuita rurarca.

⁷Micushpa, ufiashpa, paipaj shungupash cushilla cashpami Booz runaca, cebada mundun ladoman puñungapaj rirca. Chaipi puñujujpimi Rutca, alilla shamushpa, chaqui punda jatanata alsachishpa siririrca.

⁸Chaipica cashnami tucurca: Ña chaupi tuta tucujpi cuyurishpami, chaqui pundapi shuj huarmi sirijujta ñapash ricushpa manllarirca.

⁹Shinamandami Booz runaguca: —¿Pita cangui?— nishpa tapurca. Shina tapujpimi Rutca, cashna nishpa tigrachirca: —Canda servij Rutmi capani. Canga, ladolla familiapura cashcamanda, canda servij ñucataca, jahualla cambaj churajuna pundahuanllapash jatachihuayari— nircami.

¹⁰Shina nijpimi paica, cashna nijurca: —Ñuca huahualla, candaca Mandaj Dios bendiciapachun. Canga, chairalla viñaicunataca, imagupash illajtapash, charijtapash na mascangapaj rishpami, cambaj suedrahuanga ali rurashcangui. Shinallata chaitapash ashtahuan yali ali cajtami ricuchihuashcangui.

¹¹Cunanga, ñuca huahualla, ama manllaichu. Cambaj ima ali canata mañajpipash, ñucaca rurashallami. Ñuca llactapi causajcunapash, candaca ali huarmigu cajtami tucuicuna yachan.

¹²Cunanga, na llullashpami nini. Ñucaca, cambaj familia purami cani. Shina cajpipash, ñucatapash yali ashtahuan ladolla familiami tian.

¹³Cunan tutaca, caipi quedailla. Caya punllayajpimi yachashun. Pai ayudasha nijpica, paihuan quedanguilla. Mandaj Diosca causajumbachami. Imashpapash pai na ayudashachu nijpica, ñucami candaca ayudasha. Cunanga, pacaringacaman samajuilla— nijurcami.

¹⁴Pacaringacaman chaqui pundapi puñushca jipaca, caishujmanda chaishujmanda pitapash nara rijsinalla amsalla cajpillatami, Rutca jatarirca. Booz runaguca: “Trillana pambaman shuj huarmi shamushcataca, pipash na yachanachu” nircami.

¹⁵Shina nishpallami, Booz runaca: —Jahualla can pillurishca baitata ricuchi— nirca. Baitata mandashpa Rut ricuchijpica, suctacaman medishpami cebadata cararca. Shina carashpa apachijpimi, paica puebloman rirca.

¹⁶Ña paipaj suedrapajman chayajpica: —¿Ñuca huahualla, ima nircata?— nishpami tapurca. Rutca, chai runagu imatalla paimanda rurashcatapash, tucuitami villarca.

¹⁷Shina villajushpallatami, cashna nirca: —‘Ama chushaj maqui cambaj suedrapajman tigrapaichu’ nishpami, suctacaman medishpa, cai cebadata carahuarca— nircami.

¹⁸Shina nijpimi Noemica, cashna nirca: —Ñuca huahualla, cunanga chai parlashcacuna aliguta alichirijta yachangacaman shuyailla. Chai runaguca, chai parlashcacuna aliguta alichiringacaman, cunanga na samangachu— nircami. Booz runaguca, Ruthuanmi cazarashca