Read Imbabura Highland Quichua 1 SAMUEL 10 Bible Online

1 SAMUEL 10 - Imbabura Highland Quichua bible

1 SAMUEL 10

¹Chai jipami Samuelca, pai charijushca uchilla fundumanda aceiteta, Saulpaj umapi talishpa mucharca. Chai jipaca, cashnami nijurca: —Candaca, Mandaj Diosmi pai agllashca israelcunata mandachun, aceiteta talishpa javirca.

²Cunan ñucapajmanda can rijpica, ishcaipura runacunami, Raquel shuti huarmi huañujpi pambashca ladopi tuparinga. Chaica, Benjamín llactapi tiaj Selsa shuti pueblopimi canga. Paicunami, cashna ninajunga: ‘Chingashca burrocunataca, ñami tarishca. Cunanga, cambaj taitaca, chingashca burrocunamandaca na llaquillachu. Ashtahuangarin cangunamandami llaquirishpa: Ñuca churica na shamunga, imatata rurashayari nijun’ ninajungami.

³Chaimanda ashtahuan ña rishpaca, Tabor shuti pambapi shayajuj encina nishca quiru ladopimi, Bet-el shuti pueblopi Taita Diosta mañangapaj vichai rinajuj, quimsapura runacunahuan tuparingui. Paicunaca, shujca quimsa chivota, chaishujca quimsa mishqui tandata, caishujca fundupi vinota apashpami rinajunga.

⁴Paicunaca: ‘¿Alillachu capangui?’ nishpami, ishcai tandata caranga. Shina carajpica, japinguilla.

⁵Chaimanda rishpaca, filisteo soldadocuna cuidanajuj, Taita Diospaj lomamanmi chayangui. Chai puebloman ña yaicushpaca, profetacuna tandanajushpa, chai lomamanda urai shamunajujtami tuparingui. Paicunapaj ñaupajpica salteriota, panderota, gaitata, arpata tocashpami shamunajunga. Paicunaca, Dios ima nishcata villashpandimi shamunajunga.

⁶Chaipimi, Mandaj Diospaj Espíritu ninan ushaihuan cambajman shamujpi, cambash paicunashnallata villangui. Shinallata mushuj runami tucungui.

⁷Ñuca villashca cai shimicuna chashna pactajpica, can imata aliguta rurasha yashcata ruranguilla. Taita Diosca, canhuanmi canga.

⁸Chai jipaca, Gilgal puebloman ñucata ñaupashpa urai ringuilla. Ñucaca, jipallami Diosman carashpa tucuillata rupachinatapash, shinallata paihuan ali cangapaj carashpa huañuchinatapash, apashpa cambajman shamusha. Chaipica, cambajman ñuca shamungacaman canchis punllata shuyanguilla. Chaipimi, can imatalla rurana cashcataca yachachisha— nijurcami.

⁹Samuelta, Saúl cayacaman nishpa tigrarijhuanmi, cashna tucurca: Taita Diosmi, Saulpaj shungutaca mushujta rurarca. Chai punllallatami, paiman villashca shimicunaca, tucuilla pactarca.

¹⁰Paicuna chai lomaman ña chayajpica, profeta runacunami tandanajushpa, paihuan ñapash tuparimunajurca. Chaipimi, Taita Diospaj Espíritu ninan ushaihuan Saulpajman shamujpi, paicunashnallata Dios ima nishcata villai callarirca.

¹¹Profetacunahuan chashna villajujpimi, cashna tucurca: Punda paita tucui rijsij gentecunaca, caishuj chaishujmi cashna ninajurca: “Cis shuti runapaj churi Saulca, ¿imata tucunyari? ¿Paipash, profetachu tucushca imatayari?” ninajurcami.

¹²Shina ninajujpimi, chaipi purinajuj puramanda shuj runaca: “¿Paicunapaj taitaca pitayari?” nirca. Chaimandami, shuj yarichij shimita rurarca. Chaitaca: “¿Saulpash, profeta purachu?” ninajunmi.

¹³Dios ima nishcata villashca jipami, Saulca lomaman chayarca.

¹⁴Chaipimi Saultapash, paita servijtapash, paipaj taitapaj huauquica: —¿Maimanda rircanguichi?— nishpa tapurca. Shina tapujpimi, Saulca: —Burrocunata mascangapajmi rircanchi. Na taririjpimi, Samuelpajman rircanchi— nirca.

¹⁵Shina nijpimi, paipaj taitapaj huauquica: —¿Samuelca, imatata nirca? Villahuai nipanimi— nirca.

¹⁶Shina nijpimi Saulca, paipaj taitapaj huauquitaca: —‘Burrocunataca ñami tarishca’ nishpami, tucuita villahuarca— nircami. Chaita villashpapash, pai jatun mandaj tucuna cajta Samuel villashcataca, imatallapash na villarcachu.

¹⁷Chai jipami Samuelca, israelcunata cayashpa Mandaj Diospaj ñaupajpi, Mizpa shuti pueblopi tandachirca.

¹⁸Chai tandanajuipimi israelcunataca, cashna nijurca: —Israelcunata Mandaj Taita Diosca, cashnami nin: ‘Ñucami, can israelcunataca, Egiptomanda llujchimurcani. Egiptopi causajcunapaj maquimandapashmi cacharichircani. Shinallata tucui shuj llactacunapi causajcuna llaquichishpa charinajujpaj maquimandapashmi llujchircani’ ninmi.

¹⁹Shina cajpipash cangunaca, tucui llaquicunahuan ninanda llaquichi tucushpa, huacashpa causanajushcamanda llujchimuj cangunapaj Taita Diostami yangapi churarcanguichi. Chashnashpami ñucataca: ‘Ima cachumbash, jatun mandajta churayari’ ninajurcanguichi. Chashna cashcamanda cunanga, cangunapaj aillu puralla shicanyarishpa, huarangapi huarangapi tandanajushpa, Mandaj Diospaj ñaupajpi shayarichi— nijurcami.

²⁰Ña tucuilla tandanajushca jipami Samuelca, tucui Israel aillucunata ashtahuan quimirichun mandarca. Ña tucuilla quimirijpica, Benjamín aillutami agllarca.

²¹Benjamín aillupaj familiacunata cayashpaca, Matri shuti runapaj familiatami agllarca. Chai familiamandaca, Cis shuti runapaj churi Saultami agllarca. Chaipimi Saultaca, mascanajushpapash na tarirca.

²²Chaimandami Saúl ña chayamushcata, nara chayamushcatapash yachangapaca, Mandaj Diosta cutin tapunajurca. Chashna tapujpimi, Mandaj Diosca: “Ricuichi, Saulca macanajungapaj tucuicuna apamushcata tandachishca chaupipimi pacajuriajun” nirca.

²³Shina nijpimi paicunaca, calpashpa rishpa, chaipi tiajujmanda llujchimurca. Chaipimi, tucui israelcunapaj chaupipi shayachijpica, rigramanda vichaiman tucuillata yali jatun carca.

²⁴Chaimandami Samuelca, tucuicunata cashna nirca: —Mandaj Dios agllashca runataca, ñami ricurcanguichi. Tucui Israel puramandaca, paiman rijchajca shujllapash na tianllu— nirca. Shina nijpimi israelcunaca, ninanda cushijushpa: —¡Jatun mandajca causajuchunlla!— nishpa caparinajurca.

²⁵Chai jipami Samuelca, jatun mandaj imashna mandanata yachachijuj shimicunata villarca. Chai villashca shimicunata escribishpami, Mandaj Diospaj ñaupajpi alichirca.

²⁶Chai jipami, Samuelca tucui gentecunata paicunapaj huasicunaman cacharca. Shinallata Saulpashmi, Gabaa llactapi tiaj paipaj huasiman tigrarca. Macanajunata ali yachaj, shinlli runacunatapash, paicunapaj shungupi Taita Dios yarichijpimi, Saulhuan rinajurca.

²⁷Ashtahuangarin nali shunguta charij shuj runacunaca, cashnami ninajurca: “Cai runaca, ¿imashnashi ñucanchitaca, llaquimanda llujchinga?” nishpami yangapi churashpa, imata carangapajpash na apamunajurca. Ashtahuangarin Saulca, na uyaj tucushpa rircallami. Saulca, amonitacunatami mishashca