Read Imbabura Highland Quichua 1 SAMUEL 12 Bible Online

1 SAMUEL 12 - Imbabura Highland Quichua bible

1 SAMUEL 12

¹Tucui israelcunatami Samuelca, cashna nijurca: —Ricuichi, canguna tucui imatalla mañashcata uyashpami ñucaca, cangunaman jatun mandajta churarcani.

²Ricuichi, cunanga chai jatun mandajmi, cangunapaj ñaupajpi ringa. Ñucaca, ña rucu cashcamanda, yura ajchapash jundami cani. Shina cajpipash, ñuca churicunaca cangunahuanmi. Ñucaca, huambramandapacha cunan punllacamanmi, cangunataca pushamushcani.

³Cunambash caipimi cani. Canguna imata nina cashpapash, Mandaj Diospaj ñaupajpi, paillata churashca jatun mandajpaj ñaupajpi nihuaichilla. Maijambajtapash huagrata cashpa, burrota cashpapash quichushca cajpica, ñavi ñavi rimahuaichilla. Maijanda cashpapash yangamanda juchachishpa, llaquichishca cajpipash, na cashpaca imatapash pacalla cujpi japishpata ñavita vichanshna, na imata nishpa saquishca cajpipash nihuaichilla. Ñucaca, cangunaman imata tigrachina cajpipash, tigrachishallami— nijurcami.

⁴Shina nijpimi, cashna ninajurca: —Ima horasllapash na yangamanda juchachircanguichu, llaquichitapash na llaquichircanguichu. Pipaj maquimandapash, imatallapash na japircanguichu— ninajurcami.

⁵Shina ninajujpimi Samuelca, cashna nirca: —Canguna nalita rurajpi llaquichingapaca, Mandaj Diosmi ricujun. Ñuca maquihuanga imatallapash na japijushcata cangunallata ricushcataca, paillata churashca jatun mandajpash, cunan cai punllapica ricujunmi— nijpimi, tucuilla: —Ari, chashnami capan— ninajurca.

⁶Shina ninajujpimi Samuelca, israelcunataca cashna nijurca: —Cangunapaj ñaupa taitacunata Egipto llactamanda llujchimuchun Moisesta, Aaronda agllashpa cachaj Mandaj Diosmi ricujun.

⁷Cunanga, ashaguta shuyashpa caita ali uyaichi. Cangunatapash, cangunapaj ñaupa taitacunatapash tucui llaquicunamanda Mandaj Dios imashna quishpichishcataca, Mandaj Diospaj ñaupajpillatami, cangunataca shinllitapacha rimarigrini.

⁸Egiptoman Jacobo rishca jipa, cangunapaj ñaupa taitacunata ninanda llaquichinajujpimi paicunaca, Mandaj Diosta caparishpa mañanajurca. Chaimandami cangunapaj ñaupa taitacunata, Egiptomanda llujchimuchunga Moisesta, Aaronda, Mandaj Diosca cacharca. Paicuna llujchimushpami, cai llactapi causanajuchun churarca.

⁹Ashtahuangarin paicunaca, paicunata Mandaj Taita Diosta cungarcallami. Chaimandami, Hazor shuti pueblomanda soldadocunata mandaj Sísara shuti runapaj maquipi, filisteocunapaj maquipi, Moab llactata jatun mandajpaj maquipi churarca. Chai mandajcunami, macanajungapaj shamunajurca.

¹⁰Chaimandami paicunaca, Mandaj Diostaca caparishpa cashna mañanajurca: ‘Juchatamari rurashcanchi. Mandaj Diosta saquishpami, Baal shuti, Astarot shuti rurashcalla dioscunatara servishpa causanajushcanchi. Cunanga, ñucanchita fiñajcunapaj maquimanda quishpichihuayari. Candallami servishpa causashun nipanchi’ ninajurcami.

¹¹Chaimandami Mandaj Diosca, cangunapaj muyundipi causanajuj, cangunata fiñajcunapaj maquimanda quishpichijuchunga, Jerobaal, Barac, Jefté, Samuel shuti runacunata cachamurca. Shinamandami, ima llaquipash na japijpi causarcanguichi.

¹²Ashtahuangarin amonitacunata jatun mandaj Nahas shuti runa cangunata fiñashpa macanajungapaj shamujta ricushpallami, ñucataca: ‘Ima cachumbash, shuj jatun mandaj ñucanchita mandachunmi munanchi’ nishpa mañahuarcanguichi. Cangunata Mandaj Taita Dios, cangunapaj jatun mandaj cajpitami, chashna ninajurcanguichi.

¹³Ashtahuangarin cunanga, canguna mañashpa agllashca jatun mandajca caipimi. Mandaj Diosllata, cai jatun mandajta churashcataca ñami ricunguichi.

¹⁴Mandaj Diosta manllashpaca, paita servinami canguichi. Pai Mandaj Diospaj Shimicunatapash, cazunami canguichi. Cangunapash, cangunata mandajuj jatun mandajpash, cangunata Mandaj Taita Diosta chashna servishpa causashpaca, alitami ruranguichi.

¹⁵Ashtahuangarin Mandaj Dios rimashca Shimicunatapash na uyashpa, pai Mandaj Diospaj Shimicunatapash na cazujpica, Mandaj Diosllatami cangunataca, cangunapaj ñaupa taitacunata llaquichishcashnallata, paipaj maquihuan llaquichinga.

¹⁶Cunanga, ashaguta shuyashpa ricuichi. Mandaj Diosca canguna ricujtami, ninan manllarinata ruragrijun.

¹⁷Cunanga, ¿nachu trigota cozechana punllacuna? Ashtahuangarin ñucami, Mandaj Diosta mañagrini. Chaimandami, paica ninanda culun nichishpa tamiachinga. Chaita ricushpami cangunaca, jatun mandajta mañashpa, Mandaj Diospaj ñaupajpi jatun nalita rurashcataca yachanguichi— nijurcami.

¹⁸Shina nishca jipa, Mandaj Diosta caparishpa Samuel mañajpimi, Mandaj Diosca culun nichishpa, chai punllapica ninanda tamiachirca. Chaimandami Mandaj Diostapash, Samueltapash, tucui gentecuna ninandapacha manllanajurca.

¹⁹Shinamandami Samueltaca, cashna ninajurca: —Ñucanchita ama huañuchijuchunga, canda servijcunamandaca, canda Mandaj Taita Diosta mañajupairi. Ñucanchica, tucui juchacunata rurashpa causashca jahuami, jatun mandajta churai nishpaca, ashtahuan nalita rurashcanchi— ninajurcami.

²⁰Shina nijpimi Samuelca, tucuicunata cashna nijurca: —Na manllanachu canguichi. Ari, cangunaca cai tucui juchatami rurarcanguichi. Shina cashpapash chai tucuita rurashcamandalla cunanga, Mandaj Diosta catinataca, na saquinachu canguichi. Ashtahuangarin tucui shunguhuan paitalla servishpa causaichi.

²¹Yanga dioscunataca, na catinachu canguichi. Paicunaca, yanga cashcamanda, imata ruraitapash na ushanllu. Quishpichitapash na ushanllu.

²²Ashtahuangarin Mandaj Diosca, paipaj jatun shutimandaca, pai agllashcacunataca na jichungachu. Mandaj Diosca, paipajlla cachun munashpami, cangunataca agllarca.

²³Shina cajpica, cangunamanda mañanata saquishpa, Mandaj Diosta fiñachishpa juchata ruranaca, ima horasllapash ama chayamuchun. Ashtahuangarin ali ñambi aliguta purinajuchun, cangunataca yachachijushallami.

²⁴Mandaj Diostalla manllashpa causaichi. Na llullashpalla, tucui shunguhuan servishpa causaichi. Cangunaman ashtaca alicunata rurashcataca, aligutami yarina canguichi.

²⁵Ashtahuangarin nalitalla rurashpa catishpaca cangunapash, cangunata jatun mandajpashmi huañunguichi— nijurcami. Israelcunaca, filisteocunahuanmi macanajushca