Read Imbabura Highland Quichua 1 SAMUEL 13 Bible Online

1 SAMUEL 13 - Imbabura Highland Quichua bible

1 SAMUEL 13

¹Saulca, ñami shuj huatata mandajushca carca. Ña ishcai huatata israelcunata mandajushpami,

²Paica, Israel puramandaca quimsa huaranga runacunatami agllarca. Paicuna puramandaca, ishcai huaranga runacunaca, Micmas shuti pueblopi, Bet-el shuti urcupimi, Saulhuan carca. Shinallata shuj huaranga runacunaca, Benjamín llactapi tiaj Gabaa pueblopimi, Jonatanhuan carca. Shina agllashca jipami, caishuj runacunataca, paicunapaj carpacunaman tigrachirca.

³Jonatanga, lomapi cuidanajuj filisteo soldadocunahuanmi, cungashcapi macanajui callarigrirca. Chaitami, filisteocunaca yacharca. Chaimandami Saulca, tucui Israel llactapi: “Hebreocuna uyachun” nishpa, trompetata huacachinajuchun mandarca.

⁴Shinallata cashna ninajujtapashmi, tucui israelcunaca uyarca: “Saulca, urcupi cuidanajuj filisteo soldadocunahuanmi, cungashcapi macanajugrishca. Chaimandami filisteocunaca, israelcunata na ricunayachinajun” ninajujtami uyarca. Shinamandami israelcunaca, Saulta catingapaj Gilgal pueblopi tandanajurca.

⁵Chaimandami filisteocunapash, israelcunata fiñashpa macanajungapaj tandanajunajurca. Filisteocunaca, quimsa chunga huaranga macanajuna carretacunahuan, sucta huaranga caballopi tiarishca runacunahuan, shinallata chaquilla rij soldadocunacarin, mama cucha manñapi tiaj t'iyu alpashna, maitapash na cuentai ushanallami tandanajurca. Paicunaca, Micmas shuti puebloman vichai rishpami, carpacunata shayachishpa tianajurca. Chai puebloca, Bet-avén shuti pueblomandaca, indi llujshimuj ladomanmi carca.

⁶Israelcunaca, ninan llaquipi quichiji tucushpami, jatun utujucunapi, zanja huashacunapi, jatun rumi chaupicunapi, jacacunapi, yacu huashajuchun rurashca utujucunapi pacajunajurca. (Tucui soldadocunami, maitapash na llujshi ushanalla llaquipi japi tucunajurca).

⁷Shinallata hebreo puramanda huaquingunaca, Jordán yacuta chimbashpami, Gad shuti, Galaad shuti llactacunaman rinajurca. Ashtahuangarin Saulca, Gilgal pueblopillatami carca. Paihuan purij soldadocunaca, ninanda chujchushpami catinajurca.

⁸Saulca, Samuel mandashcashnallatami, canchis punllata shuyajurca. Ashtahuangarin Gilgal puebloman Samuel na ucha shamujpimi gentecunaca, caita chaita ri callarinajurca.

⁹Chaimandami Saulca, cashna nirca: —Diosman animalta cushpa tucuillata rupachinatapash, Dioshuan ali cangapaj caranacunatapash apamuichi— nishpami, paillata Diosman cushpa tucuillata rupachijurca.

¹⁰Diosman cushpa tucuillata ña rupachishpa tucuchijujpimi, Samuelca chayamurca. Shina chayamujta ricushpami, Saulca: “¿Alillachu capangui?” nishpa tuparingapaj llujshirca.

¹¹Chaipimi Samuelca: —¿Imatata rurarcangui?— nirca. Shina nijpimi Saulca, cashna nirca: —Tucuilla gentecunami, ñucata saquishpa ri callarinajurca. Cambash, shamushami nishca punllapica, na shamurcanguica. Filisteocunapash, Micmas shuti pueblopimi tandanajushca carca. Chaita ricushpami,

¹²cashna yajurcani: Cunanga, filisteocunaca ñucanchihuan macanajungapaj, Gilgal puebloman urai shamungamari. Ñucaca, Mandaj Diosta ayudahuayari nishpa, nara mañanica yajurcanimi. Chaimandami ñucallata, Diosman cushpa tucuillata rupachingapaj shayarircani— nircami.

¹³Shina nijpimi Samuelca, Saulta cashna nijurca: —Canga, juizu illanshnamari rurashcangui. Pai mandashcata cazuchun, canda Mandaj Taita Dios mandashcatami, na cazushcangui. Chaita cazushca cajpica, cunanga causaita causaicaman israelcunata mandajuchunmi, shinllitapacha Mandaj Diosca churanman carca.

¹⁴Ashtahuangarin cunanga, canga na unaita mandanguichu. Mandaj Diosca, pai Diospaj munaita ruraj runata mascashpami, pai Mandaj Dios agllashcacunata mandachun churanga. Ashtahuangarin canllatami, Mandaj Dios mandashcataca, na cazushcangui— nijurcami.

¹⁵Shina nishca jipaca Samuelca, Gilgal pueblomandaca, Benjamín llactapi tiaj Gabaa puebloman vichai rircallami. Shinallata Saulpash, paihuan chaipi purinajuj runacunata cuentashpami, sucta patsaj runacunashna cashcata ricurca.

¹⁶Saulpash, paipaj churi Jonatanbash, paicunahuan purij runacunandimi Benjamín llactapi tiaj Gabaa pueblopillata quedarca. Ashtahuangarin filisteocunaca, Micmas shuti pueblopimi, carpacunata shayachishpa tianajurca.

¹⁷Shuhuashpa purij filisteocunaca, quimsapi shicanyarishpami huaquin runacunaca, Sual shuti llactapi tiaj Ofra shuti puebloman rina ñanda rinajurca.

¹⁸Quimsapi shicanyachishca caishuj runacunaca, Bet-horón shuti puebloman rina ñandami rinajurca. Shinallata quimsapi shicanyachishca chaishuj runacunaca, Zeboim shuti pugru pamba chimba purapi tiaj, jichushca pamba llactamanmi rinajurca.

¹⁹Tucui Israel llactapica, jirrucunata tacashpa imatalla ruraj runaca, shujllapash na tiarcachu. Paicunataca, filisteocunami cashna nishca carca: “Hebreocunaca espadatapash, lanzatapash ama rurachun” nishcami carca.

²⁰Chaimandami tucui israelcunaca, paicunapaj yapuna rejacunata, palacunata, jachacunata, hocescunata filoyachingapaca, filisteocunapajman urai rinajun carca.

²¹Shina rijpimi, yapuna rejamanda, palamandaca, sucta gramota pezaj culquita japinajurca. Shinallata jachacunata filoyachishcamanda, garrocha jirruta alichishcamandaca, quimsa gramota pezaj culquitami japinajurca.

²²Chaimandami, cashna tucurca: Chai macanajuna punllacunapica Saulpaj, Jonatanbaj soldadocunaca shujllapash macanajuna espadata, jirru lanzataca na charinajurcachu. Ashtahuangarin Saulhuan, paipaj churi Jonatanhuanllami charirca.

²³Cuidaj filisteo soldadocunaca, Micmas shuti puebloman rina ñangamanmi shamunajurca.