Read Imbabura Highland Quichua 1 SAMUEL 15 Bible Online

1 SAMUEL 15 - Imbabura Highland Quichua bible

1 SAMUEL 15

¹Chai jipami Samuelca, Saulta cashna nirca: —Mandaj Diosmi, pai agllashca israelcunata jatun mandaj cachun, aceiteta talishpa canda javichun cachahuarca. Shina cashcamanda cunanga, Mandaj Diospaj Shimicunata ali uyangui.

²Tucuita Mandaj Diosca, cashnami nirca: ‘Amalecitacuna, israelcunata imatalla rurashcamandaca, ñucami llaquichigrini. Paicunaca, Egiptomanda vichai shamunajujpimi, ñambi jarcanajurca.

³Shina cashcamanda, amalecitacunata chugrichishpa huañuchigri. Paicuna tucui imatalla charishcacunataca, llaquitallapash na llaquishpa, tucuillata tucuchingui. Jaricunata, huarmicunata, huahuacunata, chuchujuj huahuacunata, huagracunata, llamacunata, camellocunata, burrocunatapash na llaquishpa, tucuilla huañuchingui’ ninmi— nijurcami.

⁴Shina nijpimi Saulca, Telaim shuti puebloman tandanajuchun cayashpa, soldadocuna alichirishcata ricushpa yalijurca. Chaipica, chaquilla rij ishcai patsaj huaranga runacunapash, Judá llactamanda chunga huaranga runacunapashmi carca.

⁵Chai jipami Saulca, amalecitacunapaj puebloman rirca. Chai pueblo ladolla pugru pambapimi, pacalla chapajcunata churarca.

⁶Shinallata chaipi causaj ceneocunatami Saulca, cashna nirca: —Cangunapash, paicunahuan ama huañungapaca, amalecitacunapajmanda llujshishpa richi. Cangunaca, israelcuna Egiptomanda shamunajujpica, llaquishpami tucuicunaman alita rurarcanguichi— nircami. Shina nijpimi ceneocunaca, amalecita puracunamanda llujshishpa rinajurca.

⁷Chai jipami Saulca, amalecitacunataca, Havila shuti llactamandaca, Shur shuti llactaman chayangacaman catishpa huañuchijurca. Shur shuti llactaca, Egiptomandaca, indi llujshimuj ladomanmi.

⁸Amalecitacunata jatun mandaj Agag shuti runataca, causajtami japirca. Ashtahuangarin tucui gentecunataca, espadahuanmi huañuchinajurca.

⁹Saulpash, paipaj soldadocunapashmi Agag shuti runataca na huañuchirca. Shinallata ali llamacunata, racu huagracunata, tucui ali racuyashca animalcunata, jari llamacunata, tucui imalla ali cajtaca, na tucuchingapaj munarcachu. Ashtahuangarin imapajpash na valij, na munanayaicunatallami tucuchirca.

¹⁰Mandaj Diosca, cai shimicunatami Samuelman cashna nishpa villarca:

¹¹—Jatun mandaj cachun Saulta churashcamandaca, ninandapachami llaquirini. Ñucata catinata saquishpami, ñuca Shimicunataca na pactachirca— nircami. Shina nijpimi, Samuelca ninanda llaquirishpa, Mandaj Diostaca caparishpa, tucui tuta mañajurca.

¹²Chai jipami Samuelca, nara ali punllayajpillata jatarishpa, tutamandata Saulhuan tuparingapaj rirca. Samuel chaiman chayajpimi, cashna nishpa villanajurca: “Saulca, ñami Carmel shuti puebloman shamurca. Ricuichi, paica yarina shuj rumi pircata shayachishpami, chaita muyushpa Gilgal shuti puebloman ña urai rirca” ninajurcami.

¹³Samuelca, Saulpajmanmi shamurca. Chaipimi Saulca, Samuelta cashna nirca: —Candaca, Mandaj Diosllata bendiciapachun. Mandaj Diospaj Shimitaca, ñami pactachircani— nircami.

¹⁴Shina nijpimi Samuelca, cashna nirca: —Shina cashpaca, ¿imashpata llamacuna, huarmi huagracuna huacanajujta ñuca rinrihuan uyajuni?— nircami.

¹⁵Shina nijpimi Saulca, cashna nirca: —Amalecitacunapaj ashtahuan ali llamacunata, huarmi huagracunatami, soldadocunaca na huañuchishpa apamushca. Canda Mandaj Taita Diosman carashpa, huañuchingapajmi apamushca. Ashtahuangarin shujcunataca, tucuillatami tucuchircanchi— nircami.

¹⁶Shina nijpimi Samuelca, Saultaca: —Cunan tuta, imatalla Mandaj Dios nishcata canman villachun saquihuai— nijpimi Saulca: —Villahuailla— nirca.

¹⁷Shina nijpimi Samuelca, cashna nirca: —Canga, cambaj yuyaipica, yangalla runagumi cani yajujpipash, ¿nachu candaca Israel aillucunata mandaj cachun churarca? Mandaj Diosmi candaca, Israel llactata jatun mandaj cachun, aceiteta talishpa javirca.

¹⁸Shinamandami Mandaj Diosca, candaca: ‘Juchata ruraj amalecitacunataca macanajushpa, huañuchishpa tucuchigri’ nishpa mandashpa cacharca.

¹⁹¿Imashpata Mandaj Dios rimashca Shimicunataca, na cazurcangui? Ashtahuangarin paicuna imatalla charishcacunata apamushpami, Mandaj Diospaj ñaupajpica nalita rurarcangui— nircami.

²⁰Shina nijpimi Saulca, Samueltaca cashna nijurca: —Ashtahuangarin Mandaj Dios rimashca Shimitaca alimi pactachircani. Chaimandami, Mandaj Dios mandashpa cachajpi rishpa, amalecitacunata jatun mandaj Agag shuti runataca apamurcani. Shinallata amalecitacunatapash, tucuillatami tucuchircani.

²¹Ashtahuangarin soldadocunami, amalecitacuna imatalla charishcacunata Dios tucuchingapaj shicanyachishcamandaca, punda huacharishca ashtahuan ali llamacunata, huarmi huagracunata apamurca. Chaicunataca, canda Mandaj Taita Diosman, Gilgal pueblopi cushpa huañuchingapajmi charinajun— nijurcami.

²²Shina nijpimi Samuelca, cashna nijurca: —¿Mandaj Diosca, ¿paiman cushpa tucuillata rupachishcahuan, paiman animalcunata cushpa huañuchishcahuanllu, pai Mandaj Dios rimashca Shimicunata pactachijpishna cushijun? Ashtahuangarin cazunami, animalcunata paiman cushpa huañuchinatapash ashtahuan yali alipacha. Shinallata jari llamacunapaj virata cunapaj randica, paita ali uyanami ashtahuan ali.

²³Paita na cazunaca, brujurishpa juchata ruranshnallatami. Shinlli shungu canapash, yanga dioscunashnalla, chai yanga dioscunata yariajlla causanashnallatami. Chashna rurashpami, Mandaj Diospaj Shimitaca yangapi churarcangui. Chaimandami Diospash, candaca yangapi churashpa, jatun mandaj cashcamandaca anchuchirca— nijurcami.

²⁴Shina nijpimi Saulca, Samueltaca cashna nirca: —Shina cashpaca, juchatami rurapashcani. Mandaj Dios mandashcatapash, can imatalla nishcatapash na cazushcanichu. Gentecunata manllaimandami, paicuna imata mañashcata rurachun saquircani. Cunanga, ñuca juchataca cungapailla.

²⁵Cunanga, Mandaj Diosta alicachishpa mañangapaj, ñucahuan tigrapashunlla— nircami.

²⁶Shina nijpimi Samuelca, Saultaca cashna nirca: —Canhuanga na tigrashachu. Canga, Mandaj Diospaj Shimita yangapi churashpami, na cazurcangui. Chaimandami, Mandaj Diospash candaca yangapi churashpa, Israel llactata jatun mandaj cashcamandaca anchuchirca— nircami.

²⁷Chai jipami Samuelca, tigrashpa ri callarirca. Ña rijujpimi Saulca, Samuelpaj jahualla churajuna ura pundamanda charirca. Chashna charijpimi, chai churajuna pundaca liquirirca.

²⁸Shinamandami Samuelca, Saultaca cashna nirca: —Cunanga, Mandaj Diosca can chashna liquishcashnami, Israel llactata can mandanataca quichurca. Chai mandanataca, cambaj cumba purallata, canda yali ashtahuan ali runamanmi cushca.

²⁹Israelcunapaj punchapamba Diosca, na llullangachu, llaquiritapash na llaquiringachu. Pai llaquiringapaca, na yanga runallachu— nircami.

³⁰Shina nijpimi Saulca, cashna nirca: —Ñucaca, juchatami rurashcani. Shina cajpipash ñuca llacta puracunata mandaj rucucunapaj ñaupajpi, israelcunapaj ñaupajpica alicachihuangui nipanimi. Cunanga, canda Mandaj Taita Diosta alicachishpa mañangapaj, ñucahuan tigrapashun— nircami.

³¹Shina nijpimi Samuelca, Saulta catishpa tigrarca. Shina tigrajpimi Saulca, Mandaj Diosta ninanda alicachirca.

³²Chai jipami, Samuelca: —Amalecitacunata jatun mandaj shuti Agag shuti runata, caiman pushamuichi— nirca. Agag shuti runaca: “Llaquinayaita ñuca huañunamandaca, yalishcapachami cani” yajurcami. Shina yajushpami, Samuelpaj ladoman cushijushpa quimirirca.

³³Ashtahuangarin Samuelca, cashnami nirca: —Canga, cambaj espadahuan huahuacunata huañuchishpami, ashtaca huarmicunata, huahua illajta saquircangui. Chashnallatami cambaj mamapash, huarmi puracunapica, huahua illaj quedanga— nishpami Samuelca, Agag shuti runataca asha asha fitishpa, Gilgal shuti pueblopi Mandaj Diospaj ñaupajpi huañuchirca.

³⁴Chai jipami Samuelca, Ramá shuti puebloman tigrarca. Shinallata Saulpashmi, paipaj huasiman vichai rirca. Chai huasica, Saulpaj Gabaa pueblopimi carca.

³⁵Chai jipaca Samuelca, paipaj tucui causaipimi Saultaca, cutinga na ricurca. Samuelca, Saulmandaca huacajurcallami. Mandaj Diospashmi, Israel llactata jatun mandaj cachun Saulta churashcamandaca, ninandapacha llaquirijurca. Samuelca, Davidtami aceiteta talishpa javishca