Read Imbabura Highland Quichua 1 SAMUEL 17 Bible Online

1 SAMUEL 17 - Imbabura Highland Quichua bible

1 SAMUEL 17

¹Filisteocunaca, soldadocunata tandachishpami, israelcunahuan macanajungapaj Judá llactapi tiaj Soco shuti pueblopi tandanajurca. Chaipi tandanajushpaca, Soco shuti pueblohuan, Azeca shuti pueblohuan chaupipi tiaj Efes-damim shuti pueblo ladopimi, carpacunata shayachishpa tianajurca.

²Shinallata Saulpash, Israel runacunandi tandanajushpami, Ela shuti pambapi carpacunata shayachishpa tianajurca. Chaipimi, filisteocunahuan macanajungapaj alichirishcalla shayarinajurca.

³Filisteocunaca, shuj lado lomapimi carca, shinallata israelcunapash caishuj lado lomapimi carca. Chai chaupipimi, shuj pugru pamba tiarca.

⁴Chai pambamanmi, filisteocunapaj carpacunamandaca, macanajunata ali yachaj shinlli runa llujshirca. Paica, Gat pueblomanda Goliat shutimi carca. Paica, quimsa metrotashna medij jatun runami carca.

⁵Paipaj umapica, bronceta rurashca jirruta churajushcami carca. Shinallata broncetallata rurashca churajunata churajushcami carca. Chai churajunaca, picha chunga canchis kilotami pezarca.

⁶Chaquimanda cunguricaman quilpachumbash, broncetallata rurashcami carca. Shinallata broncetallata rurashca lanzatapashmi, paipaj rigra jahuapi charijurca.

⁷Paipaj lanzapash, telarpi ahuashcata pilluna caspishnalla racumi carca. Chai lanzapaj jirru pundaca, canchis kilotashna pezaj llashami carca. Pai jarcarina escudohuambash, shuj runami ñaupashpa purin carca.

⁸Goliat shuti runaca shayarishpami, tandanajushca Israel soldadocunataca, cashna nishpa caparirca: —¿Cangunaca, imapajta macanajungapaj alichirishca shayanajunguichi? ¿Nachu ñucaca, filisteopura cani? Ashtahuangarin cangunaca, Saulpaj servijcunallami canguichi. Canguna puramanda shuj runata agllashpa, ñucahuan macanajuchun cachamuichi.

⁹Pai ñucahuan macanajui ushashpa ñucata mishajpica, ñucanchica cangunapaj gañangunami tucushun. Ashtahuangarin ñuca paita mishajpica, cangunami ñucanchipaj gañanguna tucushpa, ñucanchita servinguichi— nijurcami.

¹⁰Chai filisteo runaca, cashnatapash ashtahuan nijurcarami: —Cunanmi ñucaca, carpacunapi tianajuj israelcunataca macanajushunchi nishpa rimajurcani. Ñucahuan macanajuchun, shuj runata cuhuaichiyari— nijurcami.

¹¹Chai filisteo runa chashna nijujta Saulpash, tucui israelcunapash uyashpami, musparishpa ninanda manllarinajurca.

¹²Davidca, Judá llactapi tiaj Belén pueblopi causaj efrateopura Isaí shuti runapaj churimi carca. Isaí runaca, pusaj churitami charirca. Chai runaguca, Saúl mandajui punllacunapi causaj purapica, ña rucu rucugupachami carca.

¹³Isaí shuti runapaj quimsa punda churicunaca, macanajuimanmi Saulta catishpa rishca carca. Chai quimsa churicunamanda, punda churipaj shutica Eliab shutimi carca. Chaipaj catica, Abinadab shutimi carca. Paipaj catica, Sama shutimi carca.

¹⁴Davidca, tucuicunapaj jipa churimi carca. Chai quimsa punda churicunaca, Saultami catinajurca.

¹⁵Ashtahuangarin Davidca, Saulta saquishpami, paipaj taitapaj llamacunata michingapaj Belenman rishpa, cutin tigramun carca.

¹⁶Goliat shuti chai filisteo runaca, israelcunata rimangapaca, chishipash tutamandapashmi shamujurcalla. Chashnami, chuscu chunga punllacaman rurajurca.

¹⁷Isaí runaca, paipaj churi Davidtami cashna nirca: —Chaupi quintaltashna pezaj camllashca cai granotapash, cai chunga tandatapash cambaj huauquicunaman apashpa, cambaj huauquicuna tianajuj carpacunaman ucha ri.

¹⁸Shinallata lechemanda rurashca cai chunga quezotaca, huaranga soldadocunata mandajcunaman cungui. Cambaj huauquicuna imashna cajtapash ricungui, paicuna ali cajta yachangapaca, imatallapash apamungui— nircami.

¹⁹Saulpash, Davidpaj huauquicunapash, tucui israelcunapash, Ela shuti pugru pambapimi, filisteocunahuan macanajunajurca.

²⁰Davidca, tutamandata jatarishpami, llamacunataca shuj cuidachun saquishpa, paipaj taita Isaí imatalla apangui nishcacunataca, apashpa rirca. Israelcunapajman pai ña chayajujpimi, tucuilla soldadocunaca macanajungapaj caparishpa llujshinajurca.

²¹Shinami Israel soldadocunapash, filisteo soldadocunapash alichirishpa macanajungapaj chimbapura shayarinajurca.

²²Davidca, pai imatalla apajushcacunataca, ima tiashcatapash cuidaj runaman saquishpami, soldadocunapajman calpashpa rirca. Chaiman chayashpami, paipaj huauquicunataca, alillachu canguichi nishpa tapurca.

²³Paica, paipaj huauquicunahuan parlajujpillatami, Gad pueblomanda macanajunata ali yachaj Goliat shuti filisteo soldadoca, macanajungapaj chimbapura shayanajuj chaupiman llujshirca. Paica, punda punllacuna imashna riman carca, chashnallatami rimangapaj llujshirca. Chaitami, Davidca uyarca.

²⁴Tucuilla Israel runacunami, chai runata ricushpaca, ninanda manllarishpa paipaj ñaupajmanda pacajungapaj calpanajurca.

²⁵Shinallata israelcunaca, caishuj chaishujmi cashna ninajurca: “Ñucanchita rimashpa manllachingapaj llujshimuj runataca, ¿nachu ricunguichi? Paica, israelcunata rimashpa fiñachingapajmi, ñaupashpa llujshin. Maijambash paihuan macanajushpa mishaj runataca, jatun mandajca ninan charijtami ruranga. Paipaj ushitapashmi, paipaj huarmi cachun cunga. Shinallata Israel puracunamandaca, paipaj taitapaj huasi ucu purapash, na impuestota cungachu” ninajurcami.

²⁶Shina ninajujta uyashpami Davidca, paihuan shayanajuj runacunataca, cashna nishpa tapujurca: —Israelcuna nalicachishpa rimai tucunajushcamanda llujchingapaj, cai filisteota mishaj runamanga, ¿imatashi ruranga? Causaj Taita Diospaj tandanajushca soldadocunata nalicachishpa rimangapaca, circuncisión nishcata na rurashca cai filisteo runaca, ¿imata cashcayari?— nircami.

²⁷Shina nijpimi paicunaca, maijambash chai runata macanajushpa mishajman imata cuna cajtaca, punda villashcashnallata cutin villanajurca.

²⁸Chai runacunahuan chashna parlanajujta uyashpami, paipaj rucu huauqui Eliab shuti runaca, Davidhuan ninanda fiñarishpa cashna nirca: —¿Imapajta caiman urai shamurcangui? ¿Jichushca pambapi can michijushca, chai huaquinlla llamacunataca, pimanda saquircangui? Can jariyashpa, nali shunguhuan tapujushcataca alimi yachani. Canga, cai macanajuita ricungapajllami shamushcangui— nircami.

²⁹Shina nijpimi Davidca, cashna nirca: —Cunanga ñucaca, ¿imatata rurashcaniyari? ¿Nachu parlaitalla parlajuni?— nircami.

³⁰Paipaj ladomanda anchurishpami, shujcunatapash chashnallata tapujurca. Paicunapash, chaishujcuna nishcashnallatami tigrachinajurca.

³¹David imata nijujta uyajcunami, Saulman villangapaj rinajurca. Chaimandami Saulca, Davidta cayachun cacharca.

³²Chaipimi Davidca, Saultaca cashna nirca: —Paita ricushpaca, pipash na ushai illanshna quedanachu canguichi. Chai filisteohuanga, canda servij ñucallata macanajungapaj rishallami— nirca.

³³Shina nijpimi Saulca, Davidtaca cashna nirca: —Chai filisteo runahuan macanajungapaj ritaca, na ushanguica. Canga, chairalla huambragumi cangui. Ashtahuangarin paica, huambramandapacha ali macanajunata yachaj runami— nirca.

³⁴Shina nijpimi Davidca, Saultaca cashna nijurca: —Canda servij ñucaca, ñuca taitapaj llamacunata michijujpimi, león cashpa, oso cashpapash shamushpaca, llamacunapaj chaupimanda shuj llamaguta apan carca.

³⁵Chashna apajpi catishpa rishpami, macashpa paipaj shimimanda quichun carcani. Shina quichujpi ñucata caningapaj tigrarijpica, shimi quijadasmanda japishpami, huactashpa chugrichishpa huañuchin carcani.

³⁶Leonda cashpa, osota cashpapash, canda servij ñucaca huañuchinllami carcani. Circuncisionda na rurashca chai filisteo runatapash, chai animalcunatashnami huañuchisha. Paica, causaj Taita Diospaj soldadocunatami rimashpa fiñachishca— nijurcami.

³⁷Ashtahuan cashnatapash, Davidca nircarami: —Mandaj Diosca, leonbaj maquimandapash, osopaj maquimandapashmi quishpichihuarca. Paillatami, cai filisteopaj maquimandapash quishpichihuanga— nircami. Shina nijpimi Saulca, Davidtaca: —Shina cashpaca rilla. Mandaj Diosca, canhuan cachun— nirca.

³⁸Saulca, paipaj churajunatami Davidman churachirca. Umapica, bronceta rurashca jirruta, cuerpopica broncetallata rurashca churajunatami churachirca.

³⁹Davidca, pai churajushca jahuapillata espadata huatarishpami, purishpa ricui callarirca. Paica, ima horallapash chashna churajunata churajushpa, na purishpa ricushcachu carca. Chaimandami Davidca, Saultaca cashna nirca: —Ñucaca, caicunahuanga na puri ushanichu. Caicunata churajushpaca, na yachajushcanichu— nishpami Davidca, tucuillata llujchishpa saquirca.

⁴⁰Chai jipami, paipaj tauna caspita japishpa, shuj larcaman rishpaca, llambulla picha rumita agllarca. Chai rumicunataca, michingapaj apashpa purij muchilapimi churarca. Chai jipaca, paipaj huaracata apashpa, chai filisteopajman rircallami.

⁴¹Shinallata chai filisteopash, paipaj jarcarina escudota apashpa purij runata ñaupachishpami, Davidpajman alimanda shamujurca.

⁴²Chai filisteo runaca, Davidpajman shamujushpami, chairalla huambragu cajta ricushpa yangapi churarca. Davidca, pucajlla ajcha, juyailla huambragumi carca.

⁴³Chai filisteo runaca, Davidtaca cashnami nirca: —Caspicunahuan ñucapajman shamungapaca, ¿ñucaca alcuchu cani?— nircami. Shinallata paipaj dioscunapaj shutipimi Davidtaca, ninanda nalicachirca.

⁴⁴Filisteo runaca, Davidtaca cashnatapash nircarami: —Ñucapajman shamuilla. Canda huañuchishpaca, jahuata rij alasyu animalcunaman, sachapi causaj animalcunamanmi carasha— nircami.

⁴⁵Shina nijpimi Davidca, chai filisteotaca cashna nijurca: —Canga, espadahuan, uchilla lanzahuambash, jatun lanzacunahuambashmi, ñucapajman shamungui. Ashtahuangarin ñucaca, tucuita Mandaj Diospaj shutipimi cambajman shamuni. Israel soldadocunapaj Taita Diostami canga, rimashpa fiñachircangui.

⁴⁶Cunanga, Mandaj Diosmi candaca ñuca maquipi churanga. Chaimandami candaca ñuca mishashpa, cambaj umata fitisha. Shinallata cunanga, filisteo soldadocunatapash huañuchishpami, jahuata rij alasyu animalcunaman, sachapi causaj animalcunaman carasha. Chashna rurajpimi, tucui cai pachapi causajcunaca, israelcunapaj Taita Dios tiajtaca yachanga.

⁴⁷Shinallata Mandaj Diosca, na espadahuan, na lanzahuan quishpichij cajtami, tucui caipi tandanajushcacunaca yachanga. Cai jatun macanajuica, Mandaj Diospajmi. Paimi, cangunataca ñucanchi maquipi churanga— nijurcami.

⁴⁸Shina nijpimi chai filisteoca, Davidhuan tuparingapaj cutin ri callarirca. Shina rijpimi Davidca, chai filisteocunapajman ucha calpashpa rishpa, macanajuna pushtupi tuparigrirca.

⁴⁹Davidca, paipaj muchilapi maquita satishpami, shuj rumita japirca. Chai rumita paipaj huaracapi churashpami, chai filisteo runapaj frentepi huashajujta shitashpa chugrichirca. Chaimandami chai runaca, alpaman ñavihuan urmarca.

⁵⁰Shinami Davidca, chai filisteotaca huaracahuan shuj rumihuanlla misharca. Davidca, paipaj maquipi espadata na charijushpapash, chai filisteotaca chugrichishpa huañuchircallami.

⁵¹Chaimandami Davidca, calpashpa rishpa chai filisteopaj jahuapi shayarirca. Chashna shayarishpami, chai filisteopaj espadatallata llujchishpa, huañuchishpa saquirca. Chaihuanllatami, chai filisteopaj umatapash fitirca. Filisteocunaca, ashtahuan ali macanajunata yachaj paicunapaj soldadota huañuchijta ricushpami calpanajurca.

⁵²Chai jipaca israelcunapash, Judá llacta runacunapash jatarishpa caparishpami, pugru pambapi tiaj Gat shuti, Ecrón shuti pueblo pungucunacaman, filisteocunataca catinajurca. Chaimandami filisteocunaca, Saaraim shuti puebloman rina ñanmandaca, Gat shuti, Ecrón shuti pueblocunacaman, chugrichi tucushpa urmanajurca.

⁵³Filisteocunata chashna catishpa rishca jipami, israelcuna tigramushpaca, filisteocunapaj carpacunapi imatalla charishcatapash tucuillata apanajurca.

⁵⁴Shinallata Davidca, chai filisteopaj umata japishpaca, Jerusalenmanmi apamurca. Ashtahuangarin chai filisteopaj macanajunacunataca, paipaj carpapimi alichirca.

⁵⁵Chai runahuan macanajungapaj David rijujta Saúl ricushpami, paipaj soldadocunata mandaj Abnertaca: —¿Chai huambraguca, pipaj churita?— nishpa tapurca. Shina tapujpimi Abner runaca, cashna nishpa tigrachirca:

⁵⁶—Jatun mandajlla, canga causajunguipachami. Pipaj churi cajtapash, na yachapanichu— nijpimi, jatun mandajca: —Chai huambragu, pipaj churi cajtapash tapugri— nirca.

⁵⁷Chai filisteo runata huañuchishpa David tigrajujpimi, Abner runa tuparishpaca Saulpaj ñaupajman pusharca. Paica, filisteo runapaj umata chaririajmi chayagrirca.

⁵⁸Chaipimi Saulca: —¿Canga, pipaj churita cangui?— nirca. Shina nijpimi Davidca, cashna nishpa tigrachirca: —Ñucaca, Belén pueblopi causajuj, canda servij taita Isaipaj churimi capani— nircami. Jonatanbash, Davidpash ali cumbacuna cangapajmi ari ninajushca