Read Imbabura Highland Quichua 1 SAMUEL 2 Bible Online

1 SAMUEL 2 - Imbabura Highland Quichua bible

1 SAMUEL 2

¹Ana huarmica, cashna nishpami Diosta mañajurca: “Ñuca shunguca, Mandaj Diospimi cushijun. Mandaj Diosmi ashtahuan ushaita cuhuan. Can quishpichijpi cushijushcamandami, ñuca shimipash ñucata fiñajcunata rimangapaj pascarirca.

²Mandaj Dioslla, canshna jucha illajca, pipash na tianllu. Canmanda ashtahuan shujca, pipash na tianllu. Ñucanchita pacaj Taita Dioshuan chimbapurangapaca, pipash na tianllu.

³Na ashtahuan jariyashpa jatun tucushpa, rimanachu canguichi. Cangunapaj shimihuan jariyashpa ninanda rimanataca, saquinami canguichi. Tucuita yachaj Taita Diosca, Mandaj Diosmi. Paimi, imata rurashcatapash pezanshna ricunga.

⁴Ninan shinlli runacunapaj arcocunatapash, paica faquircallami. Ashtahuangarin imatapash na ushajcunaca, chumbilinshnami ushaita japinajurca.

⁵Na munajta micushpa causajcunaca, micunata carachunllami imatapash ruranajurca. Ashtahuangarin yarjachishpa causajcunaca, na ashtahuan yarjachircachu. Huahuata na tarij huarmipash, canchis huahuatami ungurca. Tauca huahuacunata ña charishca huarmica, llaquirishpallami causajun.

⁶Mandaj Diosmi huañuitapash, causaitapash cun. Paimi, Seolmambash urai cachan, chaimandapash vichai llujchimun.

⁷Mandaj Diosmi imagupash illajtapash, charijtapash ruran. Paimi yangapipash, alicachi tucunapipash churan.

⁸Paimi, imagutapash na charijtapash ñutu alpamanda jatarichin. Imagupash illajtaca, mapata shitana pushtumanda llujchishpami, alicachinapi churan. Alicachi tucuna pushtuta carashpa, mandajcunahuan tiachingapajmi, chashna ruran. Cai pachata charijuj pilarcunaca, Mandaj Diospajmi. Chai pilar jahuacunapimi paica cai pachataca, shinllitapacha churarca.

⁹Paimi, paipajlla causajcunataca, maita purinapipash huacaichin. Ashtahuangarin paita na manllajcunaca, yana yana tutapimi chinganajun. Pipash paipaj quiquin ushaihuanlla shinlli tucuitaca, na ushangachu.

¹⁰Mandaj Diosta na ricunayachijcunaca, paipaj ñaupajpimi llaquichi tucunga. Paicunapaj jahuapimi, jahua pachamanda culun nimunga. Cai pacha tucuri manñacunapi causajcuna imatalla rurashcataca, Mandaj Diosmi ricuchinga. Pai agllashca Jatun Mandajmambash, paillatami ushaita cunga. Aceiteta talishpa javishca paipaj Mandajpaj ushaitaca, paimi jatumbi churanga” nishpami mañajurca.

¹¹Chai jipami Elcana runaca, Ramá pueblopi tiaj paipaj huasiman tigrarca. Samuelca, Elí curapaj ñaupajpimi, Mandaj Diospajta rurajurca. Elipaj churicunaca, juchatami rurashca

¹²Elipaj churicunaca, Diosta na manllajcuna cashpami, Mandaj Diosmandaca imatallapash na yacharca.

¹³Diosman animalta cushpa huañuchishca aichata maijambash yanujujpica, curata servij runami, garfio nishca quimsa pundayu jirruhuan shamun carca. Chai servijcunaca, gentecunata ña chashna llaquichishpa causajcunami carca.

¹⁴Chai jirrutaca calderapi, mangapi, jatun mangapi, na cashpaca pailapi satishpami, chai garfio jirruhuan tucui llujchishcataca, curallata japin carca. Chashnami, Silo shuti puebloman shamuj tucui israelcunahuanga ruranajurca.

¹⁵Shinallata viratapash nara rupachijpillatami, curata servij runaca, animalta huañuchij runapajman shamushpa, cashna nin carca: “Aichata cusashpa curaman carangapaj cuhuai. Paica, yanushca aichata cujpica, na chasquingachu, chahua aichatallami chasquinga” ninmi carca.

¹⁶Animalta huañuchij runaca, cashna nishpami tigrachin carca: “Viratara punda rupachinajuchun saquipai. Chai jipaca, mashna munashcatapash apanguillami” ninmi carca. Shina nijpica curata servij runaca, cashnami nin carca: “Napacha saquishachu, cunanllata cuhuai. Can na cujpica, quichushpami apasha” ninmi carca.

¹⁷Elipaj churi chairalla viñai runacunaca, imaguta carashcacunatapash yangapimi churanajurca. Chaimandami paicuna juchata rurashcacunaca, Mandaj Diospaj ñaupajpica, jatun nalipacha carca.

¹⁸Samuel huambraguca, lino puchata rurashca efod nishca churajunaguta churajushpami, Mandaj Diospaj ñaupajpi Diospajta rurajurca.

¹⁹Paipaj mamallata rurashpami, túnica nishca uchilla churajunaguta cada huata apamun carca. Taita Diosman animalta cushpa huañuchingapaj shamunata yachan cashcashnallatami, paipaj cusandi vichai shamushpa, chaitaca apamun carca.

²⁰Chaimandami Elcana shuti runatapash, paipaj huarmitapash, Elí runaca cashna nishpa bendiciarca: “Mandaj Diosta mañajpi carashca cai huahuagupaj randica, Mandaj Diosllata canmanga cai huarmihuan ashtahuan churicunata carapachun” nircami. Chai jipaca, paicunapaj huasiman tigrarcallami.

²¹Ana huarmita, Mandaj Dios llaquishpa ricujpimi, vijsayu tucushpa quimsa churita, ishcai ushita charirca. Samuel huambraguca, Mandaj Diospaj ñaupajpimi viñajurca.

²²Elí runaca, ñami rucu rucugu carca. Paica, paipaj churicuna, israelcunata imatalla rurajtaca, tucuitami yacharca. Shinallata Dioshuan tuparina jatun carpa pungupi cuidashpa tiaj huarmicunahuan imashna puñushpa causajtapashmi yacharca.

²³Chaimandami Elí runaca, cashna nirca: “¿Imashpata chashna nalita rurashpa causanguichi? Canguna nalita rurashpa causanajujtaca, tucuicuna parlanajujtami uyani.

²⁴Ñuca huahuacunalla, na chashna ruranachu canguichi. Cangunata nalicachishpa chashna parlanajujca, napacha ali uyarinllu. Cangunaca, Mandaj Dios agllashcacunatami, juchata rurachinajunguichi.

²⁵Maijambash shuj runata fiñashpa llaquichijpica, juezcunami ricushpa llaquichinga. Ashtahuangarin Mandaj Diosta fiñashpa juchata rurajpica, ¿pita chai runamandaca mañanga?” nircami. Shina nijpipash paicunapaj taita rimashcataca na uyanayachircachu. Paicunataca, Mandaj Diosllata causaita quichuna cashcamandami na uyarca.

²⁶Ashtahuangarin Samuel huambraguca, ashtahuanmi viñajurca. Paica, Taita Diospaj ñaupajpipash, runacunapaj ñaupajpipash, alicachi tucushpami causajurca.

²⁷Chai punllacunapimi, Taita Diospaj shuj runagu, Elipajman shamushpa cashna nijurca: “Mandaj Diosca, cashnami nin: ‘¿Nachu cambaj ñaupa taitacunapaj huasi ucu puramambash, Egiptopi Faraonda servishpa causanajujpillata, imatapash na pacashpa tucuillata villachircani?

²⁸Shinallata tucui Israel aillu puramandapash, cambaj ñaupa taitacunatami, ñucapaj curacuna cachun agllarcani. Paicunataca, ñuca altarpi rupachinajuchun, inciensota cushnichinajuchun, efod nishcata ñuca ñaupajpi churanajuchunmi agllarcani. Shinallata israelcuna tucui imaguta ñucaman caramushcatapash, cambaj ñaupa taitacunapaj huasi ucu puramanmi cararcani.

²⁹¿Imashpata animalta ñucaman cushpa huañuchishcatapash, ashtahuan imatalla carashcacunatapash sarunshna yangapi churanguichi? Chaicunataca, ñuca jatun carpapi rupachinajuchunmi mandarcani. Cambaj churicunatara ñucatapash yali alicachishpami, ñuca agllashca israelcuna tucui imatalla carashacunamanda ashtahuan alicunata micuchishpa racuyachijungui’ ninmi.

³⁰Chaimandami, israelcunata Mandaj Taita Diosca, cashna nin: ‘Cambaj huasi ucu purapash, cambaj taitacunapaj huasi ucu purapash, causaita causaicamanmi ñuca ñaupajpi causanajunga nircanimi’ ninmi. Ashtahuangarin Mandaj Diosca, cunanga cashnami nin: ‘Chashna nishcataca, ima horallapash na rurashachu. Ashtahuangarin ñucata alicachijcunatami alicachisha, ñucata yangapi churajcunataca yangapimi churasha.

³¹Ricui, cambaj ushaitapash, cambaj taitapaj huasi ucu puracunapaj ushaitapash, ñuca anchuchina punllami chayamugrin. Cambaj huasi ucu puramandaca, pipash na rucucaman causangachu.

³²Israelcunaman ninan alicunata Taita Dios carajujpimi, cambaj huasi ucu purataca, pingai tucushpa urai cumurinajujta ricungui. Cambaj huasi ucu puramandaca, pipash na rucuyangacaman causangachu.

³³Ñuca altarpi rupachishpa causaj cambaj huasi ucu puramandaca, shuj runatallami saquisha. Chai runaca, cambaj ñavi ñausayajta huacashpa, cambaj shungupipash ninanda llaquirishpa causangapajllami canga. Ashtahuangarin tucuilla cambaj miraicunaca, chairalla runacuna cashpallatami huañunajunga.

³⁴Chashnapacha canata can ricuchunga, Ofni shuti, Finees shuti cambaj churicunami, shuj punllapilla ishcandi huañunga.

³⁵Chai jipami, ñucata ali cazuj curata churasha. Paica, ñuca shungu, ñuca alma munashcatami ruranga. Paipaj huasi ucu puratapash, shinllipacha cachunmi churasha. Shina rurajpimi, aceiteta talishpa javishca ñuca mandajpaj ñaupajpi, punllandi servishpa causajunga.

³⁶Ashtahuangarin cambaj huasi ucu puramanda puchushca runaca, shuj culquitallapash, asha micunatallapash japingapaj munashpami, chai curapaj ñaupajpi cungurishpa: Asha tandagutallapash micushpa causangapaj, imaguta ruranapillapash churahuai nishpa mañajunga’ ninmi” nijurcami. Mandaj Diosmi, Samuelta cayashca