Read Imbabura Highland Quichua 1 SAMUEL 21 Bible Online

1 SAMUEL 21 - Imbabura Highland Quichua bible

1 SAMUEL 21

¹Davidca, Nob shuti pueblopi causaj Ahimelec shuti curapajmanmi shamurca. Davidta ricushpami Ahimelec runaca, ninanda manllarishpa: —¿Imashpata pitapash na pushashpa, canlla shamungui?— nirca.

²Shina nijpimi Davidca, Ahimelec curataca cashna nirca: —Jatun mandajmi, ñucataca shuj ruranahuan cachamushpa, cashna nirca: ‘Ñuca canda mandashpa cachashcataca, pipash na yachanachu’ nihuarcami. Shinallata ñucahuan purij runacunamambash, paicunahuan maipi tuparinatapash ñami villarcani.

³Cunanga, ¿ima micunagutata caipi charingui? Picha tandata cashpapash, na cashpaca imata charishpapash carahuai— nircami.

⁴Shina nijpimi Ahimelec curapash, Davidtaca cashna nirca: —Yangalla tandataca, na charinichu. Diosman shicanyachishca tandatallami charini. Shina cajpipash canda servijcunaca, huarmicunapillapash na chayashca cajpica, cushallami— nirca.

⁵Shina nijpimi Davidca, chai curataca cashna nirca: —Na llullashpami nipani: Cainapash, cainapaj cainapash, huarmicunamandaca carupimi carcanchi. Ñuca caiman shamushca nali cajpipash, ñuca llujshimujui horasca, chairalla runacunaca ñami Diospajlla tucushca carca. Cunangarin, ¿imashpata na Diospajlla cangayari?— nircami.

⁶Shina nijpimi curapash, Diosman shicanyachishca tandataca, Davidman curca. Chaipica, ashtahuan shuj tandaca na tiarcachu. Cunujlla shuj tandata churangapajmi, Mandaj Diospaj ñaupajmanda chai tandataca chai punllapillata anchuchishca charijurca.

⁷Chai punllapillatami, Saulta servij puramanda shuj runataca, Mandaj Diospaj ñaupajpi jarcachishpa charijurca. Paica, Saulpaj llamacunata michijcunata mandaj, Edom llactamanda Doeg shutimi carca.

⁸Davidca, Ahimelec shuti curataca cashnami nirca: —¿Nachu caipica lanzata, na cashpaca espadatallapash charingui? Jatun mandaj ucha ri nijpimi, ñuca maquipica espadatapash, shuj macanajunacunatapash, na apashpa shamurcani— nircami.

⁹Shina nijpimi chai curapash, cashna nirca: —Ela shuti pugru pambapi, Goliat shuti filisteota can mishashpa quichushca espadallami, shuj telahuan pillushca efod nishca huashapi tiajun. Chaita japingapaj munashpaca, japilla. Ashtahuan shuj espadaca na tianllu, chaillami tian— nijpimi Davidca: —Chaita yali ashtahuan ali espadaca na tianllu, cuhuailla— nirca.

¹⁰Chai punllallata jatarishpami Davidca, Saulta pacajushpa rishpaca, Gat pueblota mandaj Aquis shuti jatun mandajpajman rirca.

¹¹Chaipimi Aquis runata servijcunaca, cashna ninajurca: —¿Nachu paica, Israel llactata jatun mandaj Davidyari? ¿Nachu paita: ‘Saulca, huaranga runacunatami chugrichishpa huañuchishca. Davidca, chunga huaranga runacunatami huañuchishca’ nishpa, candashpa danzanajurcayari?— ninajurcami.

¹²Davidca, shina parlanajujta paipaj shungupi yarishpami, Gat pueblota jatun mandaj Aquis runataca, ninanda manllarca.

¹³Chaimandami Davidca, paicunapaj ñaupajpi maitapash rurashpa, locoshna tucushpa pungucunapi escribijurca. Shinallata t'ucatapash, paipaj barbasta urai rijuchun saquircallami.

¹⁴Chaimandami Aquis runaca, paita servijcunataca cashna nirca: —Ricuichi, cai runataca loco cajtami ricunguichi. Shina cashpaca, ¿imapajta ñucapajman apamurcanguichi?

¹⁵¿Ñuca huasipica lococuna illajpichu, cai runataca ñuca ñaupajpi loco tucuchun apamurcanguichi? Cai runaca, ñuca huasiman na yaicunachu carca— nircami.