Read Imbabura Highland Quichua 1 SAMUEL 25 Bible Online

1 SAMUEL 25 - Imbabura Highland Quichua bible

1 SAMUEL 25

¹Samuel huañujpica, tucui israelcunami tandanajushpa huacanajurca. Paitaca, Ramá shuti pueblopi tiaj paipaj huasi ladopimi pambarca. Chai jipami Davidca, Parán shuti jichushca pambaman, jatarishpa rirca.

²Maón shuti pueblopi causaj shuj runami, Carmel shuti pueblopi shuj jazindata charirca. Paica, ninan charij cashcamandami, quimsa huaranga llamata, shuj huaranga chivota charirca. Chai runaca, Carmel pueblopimi llamacunata rutuchijurca.

³Chai runaca, Nabal shutimi carca. Paipaj huarmica, Abigail shutimi carca. Paica, ali yuyaita charij, juyaillagumi carca. Ashtahuangarin Nabal shuti runaca shinlli shungu, nalitalla ruraj runami carca. Paica, Caleb shuti runapaj mirai purami carca.

⁴Davidca, jichushca pambapi cashpami, llamacunata Nabal shuti runa rutuchijun nijta uyarca.

⁵Chaimandami Davidca, chairalla viñai chungapura runacunata, cashna nishpa cacharca: “Carmel shuti puebloman vichai rishpa, Nabal shuti runataca ñuca shutipi, alillachu cangui nigrichi.

⁶Cashnatapash ninguichi: ‘Cambash, cambaj familiacunapash, tucui can imatalla charishcacunapash, aligutapacha causachunmi munan.

⁷Canga, llamacunata rutujcunata charijtami yachani. Cunambash, cambaj llamacunata michijcunaca ñucanchihuanmi carca. Carmel shuti pueblo ladopi michinajui tucui punllacunapica, imatallapash ñucanchica na llaquichijpimi, paicunaca imapash na illaj causanajurca.

⁸Chaitaca, canda servijcunata tapunguilla, paicunallata villangallami. Shina cashcamanda ñuca cachamushca, chairalla viñai cai runacunapash, cambaj ñaupajpica ali ricurishca cachun. Ñucanchica, ninan cushijui punllapimi chayamushcanchi. Shina cashcamanda can imata jahualla charishca micunaguta canda servijcunaman, cambaj churishna Davidman cachamupai ninmi’ nigrichi” nishpami cacharca.

⁹David cachashca chairalla viñai chai runacunaca, Nabal shuti runapajman chayashpami, tucui chai shimicunata, Davidpaj shutipi villanajurca. Chai jipaca, upalla shayanajurcallami.

¹⁰Nabal shuti runaca, David cachashca chairalla viñai chai runacunataca, cashnami nirca: —¿Pita David, pita Isaí runapaj churi? Cunan punllacunaca tauca servijcunami, paipaj amocunata pacajushpa purinajun.

¹¹Ñucaca, ñuca tandata, ñuca yacuta, yanushca aichataca, ñuca llamata rutujcunaman carangapajmi alichircani. ¿Chaita japishpachu, maimanda cajtapash na rijsishca runacunamanra carasha?— nircami.

¹²Shina nijpimi, David cachashca chairalla viñai chai runacunaca, paicuna shamushca ñandallata tigrashpa, Davidpajman shamushpa cai shimicunata villanajurca.

¹³Shinamandami Davidca, paipaj runacunataca cashna nirca: —Tucuicuna cangunapaj espadata huatarichi— nijpimi, tucuicuna paicunapaj espadata japishpaca, chumbilirishcapi huatarinajurca. Shinallata Davidpashmi, paipaj espadata japishpa huatarirca. Davidtaca, chuscu patsajshna runacunami catishpa vichai rirca. Ishcai patsaj runacunataca, imalla tiashcacunata cuidachunmi saquirca.

¹⁴Ashtahuangarin servij puracunamanda shuj runami, Nabal shuti runapaj huarmi Abigailman, cashna nishpa villajurca: —Ricui. Davidca, jichushca pambapi cashpami, ñucanchi amotaca alillachu cangui nichun, paipaj randi villajcunata cachamurca. Ashtahuangarin paica, rimashpami pingaichishpa cacharca.

¹⁵Chai runacunaca, ñucanchihuanga ali alicunami carca. Paicunaca, ima horasllapash na llaquichircachu. Jichushca pambapi cashpa, paicunahuan purinajui tucui chai punllacunapica, imapash na illanllu carcanchi.

¹⁶Paicunahuan llamacunata ñucanchi michinajui, tucui chai punllacunapica punllapash, tutapash pirca jarcanshnami cuidashpa charirca.

¹⁷Shinamanda cunanga, imata rurana cashpapash, aliguta yarishpa ricushpa rimailla. Ima llaqui cashpapash ñucanchi amotaca, paipaj familiatapash, ña japingapachami. Ashtahuangarin jatun nali cajpimi, Nabal runahuanga pipash na parlai ushan— nijurcami.

¹⁸Shina nijpimi Abigail shuti huarmica, ishcai patsaj tandata, ishcai cara muchilapi vinota, picha llama cusashcata, chaupi quintal camllashca granota, patsaj racimo uvasta rurashca tortillata, chaquishca jigosta rurashca ishcai patsaj tandata japishpa, burrocunaman tucuillata apachirca.

¹⁹Chai jipami, paita servijcunataca: —Cangunaca, ñaupashpa richilla, ñucaca jipalla catimushallami— nishpa cacharca. Chaitaca, Nabal shuti paipaj cusamanga, imatallapash na villarcachu.

²⁰Paica, shuj burropi tiarishpami, pipash na ricunalla shuj lomata pacalla urai shamujurca. Chaita urai shamujushpami Davidtaca, paipaj runacunandi, paipaj chimba purata shamunajujta ricushpa, paicunahuan tuparingapaj ñapash llujshimurca.

²¹Davidca, cashnami nijushca carca: “Jichushca pambapi tucui imatalla chai runa charishcataca, yangapachami cuidashpa causashcani. Pai charishcacunaca, imapash na illajpitami, alita rurashcamandaca, nalitara tigrachihuarca.

²²Shina cashcamanda Davidta fiñajcunataca, Taita Diosca ashtahuan ninanda llaquichishpami ali canman. Cunanmanda caya punllapaca, paita servij jaricunataca, shujllatapash na causajta saquishachu” nijurcami.

²³Abigail huarmica, Davidta ricushcandimi burromanda ucha uriajushpa, Davidpaj ñaupajpi cungurishpa, alpaman chayajta cumurirca.

²⁴Paica, Davidpaj chaqui ñaupajpi cungurishpami, cashna nijurca: —Ñucata mandajlla, ima juchata rurashcapash, ñucapaj jahua cachun. Ashtahuangarin canda servij ñuca can uyajta parlachun saquihuayari. Canda servij ñuca imatalla nishcatapash uyapairi.

²⁵Ñucata mandajlla, chai Nabal shuti nali runa imatalla nishcataca, ama cripaichu. Paipaj shutica, Nabal shutimi. Paica, chai shutishnallata juizu illajpachami. Ashtahuangarin canda servij ñucami, can cachamushca chairalla viñai runacunataca, na ricupashcani.

²⁶Cunanga, ñucata mandajlla. Mandaj Diosca causajumbachami, cambash causajupanguimi. Nalita rurashcamanda chashnallata llaquichishpa cambaj maquihuan huañuchishpa, yahuarta jichaj shamunataca, Mandaj Diosllatami candaca jarcapashca. Canda fiñajcunapash, ñucata mandaj canda llaquichingapaj tucui munajcunapash, Nabal shuti runashnallata llaquita apachun.

²⁷Cunanga, ñucata mandajman carangapaj, canda servij ñuca apamushca cai micunagucunataca chasquishpa, ñucata mandajta catishpa purij runacunaman carapairi.

²⁸Canda servij ñuca chashna fiñachishcataca, cungapanguilla nipanimi. Mandaj Diosllatami, ñucata mandajpaj miraicunatapash, shinllitapacha mandanajuchun churanga. Ñuca amoca, Mandaj Diosmandami macanajujungui. Tucui cambaj causaipica, ima nalitapash na rurapashcanguichu.

²⁹Canda huañuchingapaj munashpa maijan mascangapaj jatarishca cajpipash, ñucata mandajpaj causaitaca, canda Mandaj Taita Diospaj ñaupajpi ali causajcunahuanmi, tandachishpa huatashcashna charinga. Ashtahuangarin canda fiñajcunapaj causaitaca, paillatami rumita huaracapi churashpa shitanshna chingachinga.

³⁰Shinallata ñucata mandajtaca, imata cashpapash aliguta rurashpa pactachishami nishcashnallata Mandaj Dios pactachishpaca, israelcunata mandachunmi churanga.

³¹Shina cashcamanda ñucata mandajlla, yangamanda huañuchishpa yahuarta na jichashca cashpami, imamanda llaquirinatapash na charipangui. Na cashpaca, canda llaquichishcashnallata na llaquichishca cashpami, imamanda llaquirinatapash na charipangui. Ñucata mandajlla, chashna ruranamandaca jarcaripangui. Imagutapash aliguta rurashpa, ñucata mandaj canman Mandaj Dios pactachijpica, canda servij ñucataca yarihuangui— nijurcami.

³²Shina nijpimi Davidca, Abigailtaca cashna nijurca: —Israelcunata Mandaj Taita Diosca, alicachi tucushca cachun. Paimi candaca, ñucahuan cunan tuparichun cachamushca.

³³Cambaj ali yuyaipash, alicachi tucushca cachun. Huañuchishpa yahuarta jichangapaj rinamandapash ñucata llaquichishcamanda, chashnallata ñuca maquihuan llaquichinamandapash, canmi cunanga jarcaj shamuhuashcangui. Chaimanda alicachi tucushcami cangui.

³⁴Israelcunata Mandaj Taita Diosca causajumbachami. Paimi, canda ama llaquichijuchunga jarcahuashca. Ñucahuan tuparingapaj can na uchalla shamushca cajpica, cunanmanda cayapaca Nabal shuti runapajta rurajcunataca, shuj runatallapash causajtaca na saquimanllu carcani— nijurcami.

³⁵Shina nishpallami Davidca, Abigail huarmi imatalla apamushcata chasquishpa, cashna nirca: —Imatapash na manllashpa, cambaj huasiman vichai rilla. Ricui, can imata nishcatapash uyashpa cazunimi— nirca.

³⁶Shina nijpimi Abigail huarmica, Nabal shuti runapajman tigrarca. Chaipimi Nabal shuti runaca, jatun mandajpaj micunatashna, jatun micuita rurajushca carca. Paipaj shungupipash cushijushpa, ninandapacha machashcami tiajushca carca. Shinamandami Abigail huarmica, cayandi punllacaman imatapash na villarca.

³⁷Ashtahuangarin cayandi tutamandapaca, Nabal shuti runa vinota ufiashca machai ña yalishca cajpimi, paipaj huarmi Abigail huarmica, tucuita villarca. Shina villajpimi Nabal shuti runataca, shungu nanai japijpi rumishna tucurca.

³⁸Chaimandami chunga punlla jipaca, Mandaj Diosllata nanaita ashtahuan cujpi, Nabal shuti runaca huañurca.

³⁹Davidca, Nabal shuti runa huañushcata yachashpami, cashna nijurca: —Mandaj Diosca, alicachi tucushca cachun. Ñucata rimashpa pingaichishcamandami, Nabal shuti runataca llaquichishca. Pai Diosta servij ñuca nalita ruranamandaca, paimi jarcahuashca. Mandaj Diosllatami, Nabal shuti nalita rurashcamandaca, paimanllata tigrachishca— nijurcami. Chai jipami Davidca, Abigail huarmita paipaj huarmi cachun cazarangapaj parlachun cacharca.

⁴⁰Davidta servijcunaca, Carmel shuti pueblopi causajuj Abigail huarmipajman shamushpami: —Davidca, canda cazarangapaj nishpami, villachun cachamun— ninajurca.

⁴¹Shina nijpi Abigail huarmi jatarishpami cungurishpaca, alpaman chayajta cumurishpa cashna nirca: —Ricuichi. Paita servij ñucaca, caipimi capani. Ñucata mandajta servijcunapaj chaquita maillachingapaj, servij tucupashallami— nirca.

⁴²Chai jipami Abigail huarmica, jarihuan nara tacarishca paita servij, pichapura cuitsacunandi ucha jatarishpa, shuj burropi tiarirca. Shina rurashpaca, David villachun cachashca runacunata catishpa rircallami. Chaipimi Davidhuan cazararca.

⁴³Shinallata Jezreel shuti pueblomanda Ahinoam shuti huarmihuambashmi, Davidca cazararca. Shinamandami ishcandi, paipaj huarmicuna tucurca.

⁴⁴Saulca, Davidpaj huarmi Micaltaca, Galim shuti pueblopi causajuj, Lais shuti runapaj churi Palti shuti runamanmi cushca carca. Davidca, Zif shuti pambapimi Saulta na huañuchishpa saquishca