Read Imbabura Highland Quichua 1 SAMUEL 27 Bible Online

1 SAMUEL 27 - Imbabura Highland Quichua bible

1 SAMUEL 27

¹Chai jipami Davidca, paipaj shungupica cashna yajurca: “Ima hora cashpapash, Saulca huañuchihuangami. Chashna cashcamanda ama ashtahuan ñucata tucui cai Israel llactapi Saúl mascashpa purijuchunga, filisteocunapaj llactaman pacajushpa rishalla. Shina rishpallami, paipaj maquimandaca quishpirisha” yajurcami.

²Shina yajushpami Davidca, paihuan purij sucta patsaj runacunandi jatarishpa, Gat shuti pueblota jatun mandaj Maoc shuti runapaj churi Aquis shuti runapajman rirca.

³Davidca, paipaj runacunandimi, Aquis shuti runahuan, Gat pueblopi causajurca. Paicunaca, paicunapaj tucuilla familiacunandimi, chaipi causanajurca. Davidca, paipaj ishcandi huarmindimi causajurca. Ahinoam shuti huarmica, Jezreel pueblomandami carca. Abigail huarmica, Carmel shuti pueblomanda Nabal shuti runapaj huarmimi carca.

⁴Davidca, Gat puebloman pacajushpa rishcami nishpa villajpimi Saulca, na ashtahuan mascashpa saquirca.

⁵Davidca, Aquis runataca cashnami nirca: —Cambaj ñaupajpi ñuca ali ricurishca cajpica, muyundi uchilla llactacunamanda maijan pueblota cashpapash, ñuca chaipi causangapaj cuhuayari. ¿Ima nishpata canda servij ñucaca, can mandashpa tiajuj pueblopica causashayari?— nircami.

⁶Shina nijpimi Aquis runaca, chai punllallata Siclag shuti pueblota curca. Chaimandami Siclag shuti puebloca, cunangaman Judá llactata jatun mandajcunapajllata tucushca.

⁷Filisteocunapaj llactapi David causajushca punllacunaca, shuj huata chuscu quillami carca.

⁸Davidca, paipaj runacunandi vichai rishpami gesurita, gezrita, amalecita nishca gentecunahuan macanajujurca. Paicunami, punda huatacunamandapacha Shur shuti jichushca pambaman rina ñan lado llactamandaca, Egipto llacta ladocaman causanajurca.

⁹Davidca, chai llactata llaquinayaita tucuchishpami jaricunata, huarmicunata huañuchin carca. Shinallata llamacunata, huarmi huagracunata, burrocunata, camellocunata, churajunacunataca apashpami, Aquis runapajman tigran carca.

¹⁰Chaita ricushpami Aquis runaca, cashna tapun carca: “Cunanga, ¿maijan pueblopita llaquichircanguichi?” ninmi carca. Shina nijpimi Davidca, cashna nin carca: “Judá llactapi tiaj Neguev pambapi, Jerameel shuti llactapi tiaj Neguev pambapi, na cashpaca ceneocuna causanajuj Neguev pambapimi llaquichircanchi” ninmi carca.

¹¹Davidca, jari cajpi, huarmi cajpipash, shujllatapash na causajta saquinllu carca. Gat puebloman shamushpaca: “Davidmi cashna llaquichirca” nishpa ama villachunmi, tucuilla huañuchin carca. Chashnami paica, filisteocunapaj llactapi causajui punllacunaca rurajurca.

¹²Ashtahuangarin Aquis runaca, David imata nishcatapash crishpami, cashna yajurca: “Paica, Israel llactapica millanayachi tucushcami. Chaimanda cunanga, ñucatallami servishpa causanga” yajurcami.