Read Imbabura Highland Quichua 1 SAMUEL 3 Bible Online

1 SAMUEL 3 - Imbabura Highland Quichua bible

1 SAMUEL 3

¹Samuel huambraguca, Elí shuti curapaj ñaupajpimi, Mandaj Diospajta rurashpa causajurca. Chai punllacunapica, Mandaj Diospaj Shimipash na yapa uyarijurcachu. Shinallata huaquimbi huaquimbillami, muscuipishnapash ricurin carca.

²Shuj punllami cashna tucurca: Elí runaca, paipaj ñavi na ali ricui ushajushpami, pai puñuna ucupillata sirijurca.

³Shinallata Samuelpash, Mandaj Diospaj huasipillata shuj ucupimi puñujurca. Taita Diospaj arcapash, chai huasipimi carca. Chai huasi ucupi rupajuj, Taita Diospaj lamparatapash nara huañuchijpillatami,

⁴Mandaj Diosca Samuelta cayarca. Shina cayajpimi, Samuelca: —Caipimi capani— nishpa tigrachirca.

⁵Shina nishpa, Elí puñujuj ucuman calpashpa rishpami: —Caipimi capani. ¿Imapajta cayahuarcangui?— nirca. Shina nijpimi, Elí runaca: —Ñucaca na cayarcanichu. Cutin puñungapaj tigrailla— nirca. Shina nijpimi, Samuelca tigrashpa puñugrirca.

⁶Mandaj Diosca, cutinllatami Samuelta cayarca. Shina cayajpimi Samuelca, jatarishpa Elipajman shamushpaca: —Caipimi capani. ¿Imapajta cayahuarcangui?— nirca. Shina nijpimi, Elí runaca: —Ñuca huahualla, ñucaca na cayarcanichu. Cutin puñungapaj tigrailla— nirca.

⁷Samuelca, Mandaj Diostaca nara rijsishcachu carca. Shinallata Mandaj Diospaj Shimitapash, nara uyashcachu carca.

⁸Mandaj Diosca, caihuanga ña quimsacamanmi cayarca. Shina cayajpi jatarishpa, Elipajman shamushpami Samuelca: —Caipimi capani. ¿Imapajta cayahuarcangui?— nirca. Shina nijpimi Elí runaca, Samuel huambragutaca Mandaj Dios cayajujta yacharca.

⁹Chaimandami Elí runaca, Samueltaca cashna nirca: —Cutin puñungapaj rilla. Cutin cayajpica: ‘Mandaj Dioslla, canda servij ñucaca uyajupanimi, rimahuailla’ ningui— nircami. Shina nijpimi Samuelca, maipi puñujushca ucumanllata rishpa siririgrirca.

¹⁰Mandaj Dios shamushpa shayarimushpami, pundashnallata cutin: —¡Samuel, Samuel!— nishpa cayarca. Shina cayajpimi, Samuelca: —Canda servij ñucaca uyajupanimi, rimahuailla— nirca.

¹¹Shina nijpimi Mandaj Diosca, Samueltaca cashna nijurca: —Ricui, cai Israel purapica, jatun manllarinatami ruragrini. Chashna rurashcata maijan uyashpapash, ishcandi rinritami nanachinga.

¹²Chai punllapimi, Elí curata llaquichisha nishcataca pactachisha. Paipaj huasi ucu purata tucui imatalla rurasha nishcatami, callarimanda tucuringacaman pactachisha.

¹³Nalita rurashcataca, paica yachanmi. Chai nalita rurashcamanda causaita causaicaman paipaj huasi ucu purata ñuca llaquichinatami ricuchisha. Paipaj churicunami, Taita Diostaca nali shimicunahuan rimanajurca. Shina cajpipash paica, na jarcashpa saquircallami.

¹⁴Chaimandami, Elipaj huasi ucu puraman cashna nishpa juramenturcani: ‘Elipaj huasi ucu puracuna nalita rurashcataca, animalcunata ñucaman cushpa huañuchijpipash, ashtahuan imacunatalla cujpipash, napacha cungashachu’ nircanimi— nijurcami.

¹⁵Samuelca, punllayangacaman sirijushpa ña jatarishpami, Mandaj Diospaj huasi pungucunata pascarca. Samuelca, muscuipishna ricushpa uyashcata, Eliman parlangapaca manllarcami.

¹⁶Chashna manllajujpipash Elí runaca, Samueltaca: —Ñuca huahua Samuel— nishpami cayarca. Shina cayajpimi: —Caipimi capani— nishpa tigrachirca.

¹⁷Shina nijpimi Elí runaca, cashna nirca: —Taita Diosca, ¿imatata canman villarca? Pai imatalla nishcataca, ama pacashpa villahuailla nipanimi. Canman tucui imatalla parlashcata pacashpa ñucaman na villajpica, Taita Diosllata candaca ninanda llaquichijuchun— nircami.

¹⁸Shina nijpimi Samuelca, imatallapash na pacashpa tucuita villarca. Chaita uyashpami, Elí runaca: —Paica Mandaj Diosmi. Paipaj ima ali cajpipash, chaita rurachunlla— nirca.

¹⁹Samuelca jatunyarcami, Mandaj Diospash paihuanmi carca. Chaimandami, Dios rimashca shimicunataca tucuita pactachijurca.

²⁰Chaimandami tucuilla israelcunaca, Dan pueblopi causajcunamanda callarishpa, Beerseba pueblopi causajcunacaman Samueltaca, Mandaj Dios imata nishcatapash villashpa, aliguta pactachij cajta yachanajurca.

²¹Mandaj Diosca cutinmi, Silo pueblopi ricurirca. Mandaj Diosca, Silo shuti pueblopimi pai Mandaj Diosllata rimashpa, Samuelman ricurirca. Diospaj arcatami, filisteocuna apashca