Read Imbabura Highland Quichua 1 SAMUEL 31 Bible Online

1 SAMUEL 31 - Imbabura Highland Quichua bible

1 SAMUEL 31

¹Filisteocunaca, israelcunahuanmi macanajunajurca. Chaimandami israelcunaca, filisteocunapaj ñaupajmanda pacajushpa calpanajurca. Shinamandami israelcunaca, Gilboa urcupi huañunajurca.

²Filisteocunaca Saulta catishpa rishpami Jonatán, Abinadab, Malquisúa shuti, Saulpaj churicunataca huañuchirca.

³Ashtahuan ninandapacha Saulhuan macanajunajushpami, flechata cacharijcunaca, paitapash flechahuan chayachirca. Shina chayachijpimi Saulca, paicunataca ninanda manllarca.

⁴Chaimandami Saulca, pai jarcarina escudota apaj runataca, cashna nirca: —Cambaj espadata llujchishpa, huashaman yalijta ñucata tujsishpa huañuchihuai. Circuncisión nishcata na rurashca chai runacuna shamushpa, ñucata huashaman yalijta tujsishpa, asishpa ricunajuchunga, na munanichu— nircami. Ashtahuangarin paipaj escudota apaj runaca, ninanda manllashpami, na huañuchingapaj munarca. Chaimandami Saulca, paipaj espadata japishpa, chai espada pundapi shitarirca.

⁵Saúl chashna huañushcata ricushpami, paipaj escudota apashpa purij runapash, paipaj espadata llujchishpa, chai espada pundapi shitarishpa Saulhuan huañurca.

⁶Chashnami Saulca, paipaj quimsa churicunandi, paipaj escudota apaj runandi, tucuilla paipaj runacunandi, chai punllapica huañurca.

⁷Shinallata pugru pamba caishuj ladoman causanajuj israelcunapash, Jordán yacu caishuj ladoman causanajuj israelcunapash, Israel soldadocuna pacajushpa rishcatami ricunajurca. Shinallata Saulpash, paipaj churicunapash huañushcatami ricunajurca. Chaita ricushpami, paicuna causanajuj pueblocunataca saquishpa pacajushpa rinajurca. Shinamandami filisteocunaca, chai pueblocunaman shamushpa chaipi causanajurca.

⁸Chai cayandi punllami, cashna tucurca: Filisteocunaca, huañushcacuna imatalla charishcacunata japingapaj shamushpami Saultaca, paipaj quimsa churicunandi, Gilboa urcupi huañushca sirinajujta tarirca.

⁹Chaipimi, paipaj umata fitishpa, paipaj macanajunacunatapash japirca. Chaimandami filisteocunaca, villajcunataca tucui llactapi villachun cacharca. Paicunataca, paicunapaj yanga dioscunapaj huasipipash, chaipi causaj gentecunamambash villachunmi cacharca.

¹⁰Shinallata Saulpaj macanajunacunataca, Astarot shuti huarmi diospaj huasipimi churarca. Paipaj cuerpotapash, Bet-san shuti pueblo pircapimi huarcurca.

¹¹Ashtahuangarin Galaad llactapi tiaj Jabes shuti pueblopi causajcunami, filisteocuna Saulta chashna rurashcataca yacharca.

¹²Chaimandami, macanajunata ali yachaj, shinlli tucui runacuna jatarishpa shamunajurca. Paicunaca, tucui tuta purishpami, Bet-san shuti pueblo pircapi huarcushca Saulpaj cuerpotapash, paipaj quimsandi churicunapaj cuerpotapash uriajuchishpa, Jabes shuti puebloman apashpa tigramurca. Chaipimi, paicunataca rupachinajurca.

¹³Chai jipami, paicunapaj tullucunata japishpa, Jabes shuti pueblopi tiaj shuj quiru ucupi pambarca. Chai jipaca, canchis punllacamanmi na micunajurca.