Read Imbabura Highland Quichua 1 SAMUEL 6 Bible Online

1 SAMUEL 6 - Imbabura Highland Quichua bible

1 SAMUEL 6

¹Mandaj Diospaj arcapash canchis quillatami, filisteocunapaj llactapi carca.

²Chaimandami filisteocunaca curacunata, yachajcunata cayashpa, cashna nishpa tapunajurca: —Mandaj Diospaj arcataca, ¿imatata rurashun? Maimanda apamushca pushtupillata cutin saquigringapaca, ¿imashnata rurana canchi? Chaita villahuaichi— ninajurcami.

³Shina ninajujpimi paicunaca, cashna ninajurca: Israelcunapaj Taita Diospaj arcata saquigrishpaca, na yangata saquigrinachu canguichi. Cangunapaj juchacunamanda imatallapash cunami canguichi. Chashna cushpami, chai ung:uimandaca ali tucunguichi. Shinallata cangunata llaquichinataca, imashpa na saquishcatapashmi yachanguichi— ninajurcami.

⁴Shina nijpimi, filisteocunaca: —Chai juchata anchuchijuchunga, ¿imatata cupashunyari?— ninajurca. Shina ninajujpimi curacunaca, cashna ninajurca: —Filisteocunata mandajcuna mashna cashcashnallata, picha chupushnalla orota, shinallata picha ucuchashnalla orotallata saquigringuichi. Chai ung:uillatami tucui cangunatapash, cangunapaj mandajcunatapash llaquichijun.

⁵Cangunapaj chupushnallacunata, shinallata cangunapaj llactata tucuchij ucuchashnallacunatami rurana canguichi. Chashna rurashpami, israelcunapaj Taita Diostaca ninanda alicachinguichi. Chashna rurajpica cangunatapash, cangunapaj dioscunatapash, cangunapaj alpacunatapash, paipaj maquihuan llaquichijujtaca saquingapashchari.

⁶¿Imashpata cangunapaj shungutaca, Egiptopi causajcunashna, Faraonshna shinlli shunguta ruranguichi? Paicunata chashna llaquichishca jipaca israelcunataca, ¿nachu richun saquircalla? Shina saquijpimi, israelcunaca rinajurca.

⁷Cunanga, shuj mushuj carretata ruraichi. Chai jipaca, huahuacunata viñachijuj nara yuntashca ishcai huarmi huagracunata japishpa, chai carretapi huataichi. Paicunapaj huahua shicucuna catishpa rinajujtaca, huasiman apanguichilla.

⁸Chai jipaca, Mandaj Diospaj arcatapash japishpa, carretapi churanguichi. Shinallata cangunapaj juchamanda cushca orocunataca, shuj uchilla cajonbi churashpa, chai arca ladopi churashpa cachanguichi. Chai carretataca, huagracunalla aisashpa richun saquinguichilla.

⁹Shinallata caitapash alimi ricuna canguichi. Carretata aisashca huagracuna Bet-semes shuti puebloman rina ñanda, Israel llactaman rijpica, chai Diosllata llaquichijushcatami yachashun. Ashtahuangarin na chai ñanda rijpica, na paipaj maquihuan llaquichijpita, cai llaquicunaca yangamanda shamushcatami yachashun— ninajurcami.

¹⁰Shina nijpimi chai runacunaca, mandashcashnallata ruranajurca: Huahuayu ishcai huarmi huagrata japishpami, carretata huatanajurca. Shinallata shicucunataca, huasi ucuman vicharcallami.

¹¹Chai jipami, Mandaj Diospaj arcataca carretapi churanajurca. Shinallata ucuchashnallata rurashca orota, paicunapaj chupushnallata rurashpa churashca uchilla cajondapashmi churanajurca.

¹²Chashna churashca jipami, chai huagracunaca, Bet-semes shuti puebloman rina ñanda japishpa rinajurca. Chai ñanmandaca ali ladomambash, lluqui ladomambash na tigrashpami, huacashpandi rinajurca. Filisteocunata mandajcunapash, Bet-semes shuti pueblo linderocamanmi catishpa rinajurca.

¹³Bet-semes shuti pueblopi causajcunaca, pugru pambapimi trigota cozechanajurca. Chaipi cashpa vichai ricushpami, Diospaj arca shamujta ricunajurca. Chaita ricushpami, ninanda cushijunajurca.

¹⁴Chai carretata aisashpa shamuj huarmi huagracunaca, Bet-semes shuti pueblopi causajushca Josuepaj alpaman chayamushpami, shuj jatun rumi ladopi shayarirca. Chaipimi paicunaca, carreta caspicunataca yamdata rurashpa, chai huagracunataca, Mandaj Diosman cushpa tucuillata rupachinajurca.

¹⁵Levitacunami, Mandaj Diospaj arcatapash, chai ladopi tiajuj oromanda rurashcacunata churashca uchilla cajondapash carretamanda uriajuchishpa, chai jatun rumi jahuapi churanajurca. Chai punllami, Bet-semes shuti pueblopi causajcunaca, chai huagracunata huañuchishpa, Mandaj Diosman cushpa tucuillata rupachinajurca, ashtahuan shuj caranacunatapashmi caranajurca.

¹⁶Chashna rurajta ricushpami, filisteocunata picha mandajcunaca, Ecrón puebloman chai punllallata tigrarca.

¹⁷Filisteocunaca, paicunapaj juchata Mandaj Dios anchuchijuchunga, orota rurashca chupushnallacunatami cunajurca. Paicunaca: Asdod, Gaza, Ascalón, Gat, Ecrón shuti pueblocunamandami, shuj shuj cunajurca.

¹⁸Shinallata orota rurashca ucuchacunaca, filisteocunapaj pueblocunata picha mandajcuna tiashcashnallatami, picha carca. Shinallata muyundi pircahuan jarcashca pueblocuna mashna tiashcashnallata, pirca illaj uchilla pueblocuna mashna tiashcashnallatami cunajurca. Mandaj Diospaj arcata churashca chai jatun rumica, Bet-semes shuti pueblopi causajushca Josuepaj alpapimi, cunangaman tiajun.

¹⁹Taita Diosca, Bet-semes shuti pueblopi causaj runacunataca, Mandaj Diospaj arca ucuta pascashpa ricushcamandami, chai pueblopi causajcunataca, picha chunga huaranga, canchis chunga runacunata huañuchirca. Chai ashtacacunata Mandaj Dios huañuchijpimi, gentecunaca ninandapacha huacanajurca.

²⁰Chaimandami Bet-semes shuti pueblopi causajcunaca, cashna ninajurca: “¿Pita cai jucha illaj Taita Diospaj ñaupajpi shayaritaca ushangayari? ¿Ñucanchi ladomandaca, cunanga maimanshi ringa?” ninajurcami.

²¹Chashna nishpami, Quiriat-jearim shuti pueblopi causajcunaman cashna nishpa villachun, villaj runacunata cacharca: “Mandaj Diospaj arcataca, ñami filisteocunaca tigrachimurca. Cunanga, cangunapajman apangapaj urai shamuichi” nichunmi cacharca.