Read Imbabura Highland Quichua 1 SAMUEL 9 Bible Online

1 SAMUEL 9 - Imbabura Highland Quichua bible

1 SAMUEL 9

¹Benjamín aillu purapimi, alicachi tucushca Cis shuti shuj runa tiarca. Cis shuti runaca, Abiel shuti runapaj churimi carca. Abiel runaca, Zeror shuti runapaj churimi carca. Zeror shuti runaca, Becorat shuti runapaj churimi carca. Becorat shuti runaca, Benjamín aillupura Afía shuti runapaj churimi carca.

²Cis shuti runaca, chairalla viñai Saúl shuti juyailla churigutami charirca. Israel puracunapica, paita yali ashtahuan juyaillaguca na tiarcachu. Paica, tucui gentecunatami, rigramanda vichaiman yali jatun carca.

³Shuj punllami, Saulpaj taita Cis shuti runapaj burrocuna chingashca carca. Shinamandami paipaj churi Saultaca, cashna nirca: —Jatarishpa cunanga, servijcunamanda maijanda cashpapash pushashpa, burrocunata ucha mascangapaj ri— nircami.

⁴Shina nijpimi Saulca, Efraín shuti urcuta yalishpa, Salisa shuti llactacaman mascangapaj rishpapash, na tarirca. Chai jipaca, Saalim shuti llactamanmi mascangapaj rirca. Chaipipash na tarircachu. Shinallata Benjamín aillupaj llactaman rishpapash, na tarircachu.

⁵Zuf shuti llactaman ña chayamushpami Saulca, paihuan rijuj servij runataca, cashna nirca: —Cunanga tigrashunlla. Ñuca taitaca, burrocuna chingashcatapash cungashpachari, ñucanchimandara ninanda llaquirishpa tiajun— nircami.

⁶Shina nijpimi chai runaca, cashna nirca: —Ricui, cunanga cai pueblopica, Taita Diospaj shuj runagumi tian. Paitaca, tucuicunami alicachin. Pai imatalla nishcapash, chashnapacha pactanllami. Shina cashcamanda paita tapungapaj, chaiman jacu. Ñucanchi maita rishpa, ashtahuan mascanatapash villangapashchari. Ñucanchica mascashpa taringapajmi, ñanda japishpa shamurcanchi— nircami.

⁷Shina nijpimi Saulca, paita servijtaca cashna nirca: —Shina cashpaca, cunanda jaculla. Ashtahuangarin chai runaguman carangapaca, ¿imatata apashun? Ñucanchipaj cucavi tandagupash tucurishcamandami, Taita Diospaj runaguman imata carangapajpash na charinchi. ¿Imatapash charinchirachu?— nircami.

⁸Shina nijpimi chai servij runaguca, Saultaca cashna nirca: —Ricui, ñucami quimsa gramota pezaj culquiguta caipi charijuni. Ñucanchi maijan ñanda rishpa mascagrinatapash, Taita Diospaj runagu villachunga, caitami carasha— nircami.

⁹(Ñaupa punllacunaca, Israel llactapica maijan cashpapash, Taita Diosta imatapash tapushun nishpaca: “Dios ricuchishcata villaj runaguta jacuchi, tapushunchi” ninajujmi carca. Dios ricuchishcata villaj runagutami, cunan punllacunaca: “Profeta” ninajun).

¹⁰Saulca, paita servij chashna nijpimi: —Alimi, shina cashpaca jaculla— nishpaca, Taita Diospaj runagu maipi causaj puebloman rinajurca.

¹¹Chai puebloman chayagrina ñanda vichai rinajushpami, jarihuan nara tacarishca cuitsacuna yacuta apangapaj urai llujshinajujta tuparirca. Paicunatami: —Dios ricuchishcata villaj runaguca, ¿cai pueblopichu?— nishpa tapurca.

¹²Shina tapujpimi chai cuitsacunaca, cashna ninajurca: —Ari, cangunata ñaupashpami chaita rijun. Cunanga, gentecuna animalta Diosman carashpa lomapi huañuchina punlla cajpimi, paica imatalla rurana cashcata rurangapaj puebloman shamushca. Ucha richilla.

¹³Puebloman ña yaicushpaca, narapash micungapaj lomaman vichai rijpillatami tuparinguichi. Gentecunaca, Diosman carashpa animalta huañuchishca jipaca, pai chayangacamanmi na micushpa shuyan. Diosman carashpa rupachishcata pai bendiciashca jipami, tucui rijcunaca micun. Cunanga, tuparingapaj ucha vichai richilla— ninajurcami.

¹⁴Shina nijpimi paicunaca, puebloman vichai rinajurca. Ña chaupi ñanda rinajujpimi Samuelpash, lomaman vichai ringapaj llujshimujushpa, ñapash tuparirca.

¹⁵Saúl shamungapaca, shuj punllalla tiajpimi Mandaj Diosca, Samuelpaj rinripilla cashna villashca carca:

¹⁶“Caya punllami cai horasllata, Benjamín aillupaj llactamandaca, shuj runata cambajman cachamusha. Paitami, ñuca agllashca israelcunata mandaj cachun, aceitehuan umapi talingui. Paimi, ñuca agllashcacunataca, filisteocunapaj maquimanda quishpichinga. Ñuca agllashcacuna caparishpa mañanajujtaca uyarcanimi” nishcami carca.

¹⁷Saulta, Samuel ricujhuanmi Mandaj Diosca, cashna nirca: “Ricui, cai runamandami ñucaca, canman villajurcani. Paimi, ñuca agllashcacunataca mandanga” nircami.

¹⁸Saulca, chai pueblo punguta ña yaicujushpa, Samuelpajman quimirishpami: —Dios ricuchishcata villaj runagupaj huasica, ¿maipita capan? Villahuai— nirca.

¹⁹Shina nijpimi Samuelca, Saultaca cashna nijurca: —Ñucami, Dios ricuchishcata villaj cani. Ñucata ñaupashpa lomaman jaculla, chaipi ñucahuan micungui. Caya tutamandami, tucui imatalla can tapusha yajushcataca villashpa, shuj punllacaman nishpa cachasha.

²⁰Burrocuna chingashcapash, ñami quimsa punlla tucushca. Ama llaquilla caichu. Chaicunataca ñami tarishca. Ashtahuangarin Israel llactapi juyailla munanayaicunaca, ¿pipajta canga? Cambajpash, cambaj taitapaj tucui huasi ucu purapajpashmi— nijurcami.

²¹Shina nijpimi Saulca, cashna nirca: —¿Nachu ñucaca, Benjamín aillumanda capani? Chai ailluca, Israel aillu puracunamanda tucuita yali uchilla aillumi. ¿Nachu ñuca familiapash, Benjamín aillu puramandaca ashtahuan uchilla familia capan? ¿Imashpata chashnatapachaca nihuanguiyari?— nircami.

²²Chai jipami Samuelca, Saultaca paita servij runandi jatun ucuman pusharca. Chaipimi, tucuicunata yali ashtahuan ali tiarinapi tiachirca. Chaiman cayai tucushcacunaca, quimsa chungashnami carca.

²³Chai jipami Samuelca, yanushpa caraj runataca: —Shican alichingui nishpa, ñuca cushca aichata caiman apamui— nirca.

²⁴Shina nijpimi yanushpa caraj runaca, shuj changa aichataca, chai jahuapi imatalla churashcacunandi apamushpa, Saulpaj ñaupajpi churarca. Shina churajpimi Samuelca, cashna nirca: —Ricui, caimi canman shicanyachishpa alichishca aicha. Cai aichatami, canman alichijuchun ñuca mandarcani, japishpa micuilla. Cai punllapi micungapajmi: ‘Ñucaca, micuiman shamuchun gentecunata cayarcani’ nishpami alichinajuchun mandarcani— nirca. Shinamandami Saulca, chai punllapica Samuelhuan micurca.

²⁵Chai lomamanda puebloman urai tigramushpami Samuelca, Saulhuanga huasi jahuapi tiaj patiopi parlanajurca.

²⁶Cayandi tutamandata jatarishpa, indi ña llujshijujpimi, huasi jahuapi tiaj patiopi puñujujpi Samuelca, Saultaca: —Cunanga, jatarishpa rilla— nirca. Shina nijpimi Saulca jatarishpa, Samuelhuan canllaman llujshirca.

²⁷Chai pueblomanda ña urai rinajushpami Samuelca, Saultaca cashna nirca: —Canda servijtaca, ñaupashpa richun cachailla. Ashtahuangarin canga, Taita Diospaj Shimita canman villangapaj, ashaguta shuyaira— nircami. (Chai servij runaca, ñaupashpa rircallami).