Read Isthmus Zapotec San Mateo 13 Bible Online

San Mateo 13 - Isthmus Zapotec bible

San Mateo 13

¹Dxi queca biree Jesús de ndaani yoo que, yetí uriá dxa nisa ro' que.

²Ne biiya si be ma rí binni laabe, yetí be ndaani ti canuá.

³Ne idubi zuba be ndaani canuá que, bizulú bisiidi be laaca stale cosa peru puru ne ejemplu, na be:

⁴―Sicarí bizaaca lú ti hombre biree zinduu biní. Ne ra cusaba be xuba que, biaba caadxi ni uriá neza ne beeda mani huiini gudó cani.

⁵Ne biaba xcaadxi ni lade guie, ne ca ngue gundani nagueenda, purti luguiá si napa ni caadxi yu.

⁶Peru casi biree gubidxa bizaaqui ni ne bibidxi ni purti qué ñapa ni xcu ni guete'.

⁷Ne biaba xcaadxi ni lade guichi ne gundani, peru jma bisoo guichi que para laacani ne biiti ca guichi que cani.

⁸Peru biaba xcaadxi ni ra nayá, ne ca ngue huaxa ucuá lú. Nuu ra bidii dede ti gayuaa carreta niza, ne nuu ra bidii sesenta, ne nuu ra bidii treinta.

⁹Irá ni racala'dxi guiene la? ucaa diaga. Ra uní' Jesús xiñee riguixhe ejemplu

¹⁰Biree si ca binni que ze', bidxiña ca discípulu que ra nuu be ne na ca rabi ca laabe: ―Xiñee puru si ejemplu caguixhe lu para laacabe pue.

¹¹Para rabi be laaca': ―Purti laatu la? cudii Dios lugar guiene tu modo runi mandar, dede ni naga'chi', peru ca xcaadxi la? co'.

¹²Tu ma riene caadxi la? ziene xcaadxi ne ziene ru jma stale. Peru tu qué riene nin caadxi la? dede ni ma biene zusiaanda'.

¹³Nga runi riguixhe ejemplu para laacabe, purti neca zuxele lú cabe, qué ruuya cabe, ne neca zuxele diaga cabe, qué runa diaga cabe, ne qué riene cabe.

¹⁴De laacabe nga bizeete profeta Isaías ra na:Zuna diaga ca peru qué ziene ca',ne zuyubi lú ca peru qué zuuya ca'.

¹⁵Purti ma biguidxi ladxidó' ca',ne ma biseegu ca diaga ca'.Ne biseegu ca lú cati cadi gu'ya ca' ne guna diaga ca'ti cadi guiene ca',uyubi ca naa para ula'ya laaca, na Dios.

¹⁶Peru laatu la? na Jesús rabi ca discípulu sti', dichoso laatu purti nanna tu xi cayuuya tu ne riene tu xi cayuna diaga tu.

¹⁷Purti gabe ca' laatu, uyuu stale profeta ne hombre cha'hui ni gucala'dxi ñuuya ni cayuuya tu ri' peru qué ñuuya ca', ne gucala'dxi ca ñuna diaga ca ni cayuna diaga tu ri' peru qué ñuna diaga ca'. Xi riní' cuentu sti hombre yenduu biní

¹⁸Yanna laucaa diaga xi riní' ejemplu sti hombre ni uluu biní que.

¹⁹Ni biaba uriá neza que la? zeda gaca casi tobi ni rui' né cabe laa ximodo runi mandar Dios, peru qué riene ni, ne reeda binidxaba raxha ni ma biaba ndaani ladxidó' be que.

²⁰Ne ni biaba lade guie que, ngue zeda gaca casi tobi ni runa diaga stiidxa Dios ne oraqueca ricaa ni ne enda nayeche'.

²¹Peru qué gapa ni xcu ni guete' sínuque luguiá si, ngue runi casi gueeda xiixa naná, o sa nanda cabe laa pur ca diidxa que la? maca ziyaba.

²²Ne ni biaba lade guichi que la? ngue zeda gaca casi tobi ni guna diaga stiidxa Dios peru jma cá ique ximodo ibani ndaani guidxilayú ri', ne rudii lugar quite bidxichi ique, ne irá nga ruuti stiidxa Dios ni nuu ndaani ladxidó' be que.

²³Peru ni biaba ra nayá que la? ngue nga zeda gaca casi cani runa diaga stiidxa Dios ne riene xi riní' ni purti riree ndu ca'. Nuu de laaca ni zeda gaca casi layú ni bidii ti gayuaa que, ne nuu de laaca casi ni bidii sesenta que, ne nuu de laaca casi ni bidii treinta, peru irá ca bidii ca'. Baladxi biaba lade semiá

²⁴Bigueta bisiidi be ca binni que, gudixhe be xcaadxi ejemplu, na be: ―Modo runi mandar Dios zeda gaca casi ti hombre bisaba semiá ndaani ñaa sti',

²⁵peru laga nisiaasi binni, beeda tuuxa nanala'dxi laabe ne bidxiiba baladxi lade semiá que ne ze'.

²⁶Dxi ma biniisi semiá que, ma cabee guie' bihuinni nuu baladxi que lade.

²⁷Oraque beeda ca mozo que ra nuu xpixuaana ni, ne na ca': “Señor, cadi ladxa semiá si bidxiiba lu la? Xi guca xa yanna, nucha ni baladxi'.”

²⁸Para na xpixuaana ni: “Laca tu laa nanala'dxi naa, beda guni ni.” Oraque na ca mozo que: “Racala'dxu chi gaxha du cani la?”

²⁹Para na be: “Co', zaa nuu cani, pacaa ra cayaxha tu cani, zanda ca gaxha tu ne semiá.

³⁰Lausaana cani, zaa iniisi cani tobi si ne ora ma gula semiá ca, naa ma gabe cani chi chuugu semiá, utopa ca ca baladxi que gundiibi ca para chaqui'. Ne óraque ru gutopa ca ca semiá idxá sacu.” Biidxi mostaza

³¹Ne bigueta gudixhe be sti ejemplu, na be: ―Modo idale ca xpinni Dios zeda gaca casi guca ti biidxi mostaza ni gucuaa ti hombre ne yeusaba rañaa sti'.

³²Laani jma nahuiini ni lade irá xixé biidxi', peru undani si ni la? biniisi ni ne guca ni yaga ro', dede beeda mani huiini bizá' lidxi lu rama stini. Ejemplu sti levadura

³³Gudixhe ru be sti ejemplu para laaca', na be: ―Modo idale ca xpinni Dios zeda gaca casi guca levadura ni gucuaa ti gunaa ne biguucha chonna kilu harina, ne irá ni biasa ni. Zacaca nga idale ca xpinni Dios. Ra riete xiñee biquiiñe Jesús ejemplu

³⁴Puru ne ejemplu bisiidi be ca binni que. Qué nusiidi di be laaca sin ejemplu.

³⁵Bi'ni be zacá ti iree ni modo pe uní' Dios de ruaa ti profeta chiqué, ra na:Zaguixhe stale ejemplu ra güe nia laacabe diidxa'.Zabe laacabe ni ga'chi dede dxi bizá' Dios guidxilayú. Bisiene Jesús stiidxa baladxi ne semiá

³⁶Biluxe si bisiidi be ca binni que, biuu be ndaani yoo, ne bidxiña ca discípulu stibe ra nuu be, gunaba ca laabe gusiene be laaca xi riní' ejemplu sti baladxi biaba rañaa que.

³⁷Para rabi be laaca': ―Ni bisaba semiá pe que la? nga Hombre Biseenda Dios.

³⁸Layú que nga guidxilayú. Semiá que zeda gaca ca xpinni Dios, ne baladxi que, xpinni binidxaba'.

³⁹Ne ni bisaba baladxi que nga binidxaba'. Dxi iruugu semiá que nga iluxe guidxilayú, ne cani chi uchuugu ca semiá que nga ca ángel.

⁴⁰Ne cásica idopa baladxi que chaqui la? zaqueca zaca ni dxi iluxe guidxilayú.

⁴¹Naa nga Hombre Biseenda Dios ne zuseenda ca ángel stinne para gueda ndee irá ni cuchiiña ca xpinne' ne irá cani qué runi jneza.

⁴²Zundaa cabe laaca lu bele ne raqué nga gu'na ca dede go yaa ca guidi ruaa ca'.

⁴³Ne dxi ca nga guzaani cani nacha'hui ra runi mandar Dios, casi ruzaani gubidxa. Cani racala'dxi guiene la? gucaa diaga. Tesoro ga'chi'

⁴⁴Ne laca rabi be laaca': ―Enda runi mandar sti Dios zeda gaca casi ti tesoro ni bidxela tobi hombre ga'chi ndaani yu. Biiya be ni ne bicaachi be ni sti tiru, ne ziyeche be yeutoo be irá ni napa be para sí be layú que ne icaa be tesoro que. Perla ni jma risaca

⁴⁵Laca rabi be laaca': ―Enda runi mandar sti Dios zeda gaca casi ti perla ni bidxela ti hombre ra canayubi perla cha'hui para sí'.

⁴⁶Ora bi'ya jma risaca ni que irá xixé perla la? yeutoo irá ni napa para uzí' ni. Ejemplu sti tarraya

⁴⁷Ne gudixhe ru be stobi, na be: ―Enda runi mandar sti Dios zeda gaca casi tarraya ni rusaba cani rie guuze ndaani nisadó'. Rutopa tarraya que irá clase benda

⁴⁸peru ora ma bidxá ni, rití né cabe ni uriá para ribí cabe ique ni. Rusa'bi cabe ni qué zaquiiñe', ne ruchá cabe cani zaquiiñe que ndaani dxumi.

⁴⁹Zacaca zaca ni ra gueeda iluxe guidxilayú ri', zeda ndee ca ángel cani qué iquiiñe lade cani nacha'hui'.

⁵⁰Ne zundaa ca laacabe lu bele, ne raqué nga gu'na cabe dede go yaa cabe guidi ruaa cabe. Tesoro cubi ne tesoro yooxho'

⁵¹Oraque unaba diidxa be ca discípulu stibe pa biene ca ni gudxi be laaca que. Para na ca': ―Biene du, Señor.

⁵²Para rabi be laaca': ―Tobi ni ma riene chaahui ley sti Moisés ne óraque gueda iziidi ni rusiide de modo runi mandar Dios la? zeda gaca casi ti ricu ni ribee de lu irá ni napa, caadxi nacubi ne caadxi nayooxho'. Ra nuu Jesús Nazaret

⁵³Biluxe si byui' né Jesús laacabe irá nga, biree de raqué,

⁵⁴uyé xquidxi ne biuu ndaani yu'du', bisiidi ca binni xquidxi. Nabé bidxagayaa ca laabe ne na ca': ―Paraa ulee be irá enda biaani ni napa be ri pue, ne irá enda nandxó' ni runi be.

⁵⁵Ñee cadi laabe nga xiiñi carpinteru que la? ne María lá jñaa be, ne bi'chi be nga Jacobo ne José ne Simón ne Judas.

⁵⁶Lácaxa cadi rarí nabeza ca biza'na be. Paraa ulee be cani cayuni be ri'.

⁵⁷Ne pur ni caní' ique cabe que, ma qué ñanda ñuni cre cabe laabe. Para na be rabi be laaca': ―Stobi stobi lugar risaca profeta, peru ra qué risaca be nga ndaani xquidxi pe be ne lade binni lidxi be.

⁵⁸Ne huaxié' bisihuinni be enda nandxó' stibe raqué purti qué ñuni cre ca laabe.