Read Isthmus Zapotec San Mateo 14 Bible Online

San Mateo 14 - Isthmus Zapotec bible

San Mateo 14

¹Bireeche stiidxa Jesús ca dxi que, ne ora gunna Herodes, gobernador de Galilea, irá ni la?

²na rabi ca xpinni: ―Laguuya irá ni cayuni hombre ca. Nanna pa cadi laabe nga Juan Bautista ma bibani, ne nga runi cayanda cayuni be irá nga.

³Uní' Herodes zacá purti nanna xi ma bi'ni Juan Bautista. Gunaaze be laa ne bindiibi be laa ne biseguyoo be laa, runi Herodías xheela Felipe bi'chi be.

⁴Bidxiichi be purti gudxi Juan laabe cadi jneza chu' né be xheela bi'chi be.

⁵Gucala'dxi be ñuuti be Juan oraqueca, peru bidxibi be purti nabé nadxii ca binni que laa ne napa cabe laa de profeta.

⁶Peru dxi guca lani xpidó' be la? beda uyaa xiñi dxaapa Herodías nezalú be ne nabé uyuula'dxi be modo biyaa.

⁷Para na be rabi be laa: Intiica inabu naa, zudiee lii.

⁸Oraque gudxi jñaa badu dxaapa que laa xi inaba'. Para uyé ra nuu be ne rabi laabe: Racaladxe udiiu naa ique Juan Bautista ndaani ti bladu'.

⁹Ne ora gudxi badu dxaapa que nga laabe la? ucaná ladxidó' be, pa ñanda si qué nudii be ni canaba badu dxaapa que, peru pur ma bidii stiidxa be laa nezalú irá cani zuba né laabe ruaa mexa que la? uní' be icaa badu dxaapa que ni.

¹⁰Para bisenda tidxi be ugá ca xpinni be yanni Juan ndaani lidxi guiiba que.

¹¹Ne bedané cabe ique que ndaani ti bladu', bidii cabe ni badu dxaapa que, de laa ma bidii ni jñaa.

¹²Oraque uyé ca discípulu sti Juan, yecaa ca cuerpu que ne yeucaachi ca ni, para yetidxi ca Jesús xi guca'. Ra biyaana Jesús gaayu mil

¹³Casi gunna Jesús ni, bixele ca de raqué, uyuu ndaani ti canuá, uyé ndaani ti gui'xhi ra iruti guinni. Peru casi gunna binni paraa ze be la? biree ca de ndaani guidxi que, zizá ca dede yendá ca ra nuu be.

¹⁴Ne ora ziyete be de lu canuá que, biiya be mápeca rí binni raqué ne biá be laaca'. Para bisianda be cani huará ni nuu lade ca'.

¹⁵Ne biaana ca binni que raqué dede ma huadxí. Biiya si ca discípulu stibe ma huadxí ngue la? bidxiña ca ra nuu be, ne na ca': ―Ndaani gui'xhi ndi nuu nu, ne ma caxhinni, xiñee qué ga'bu ca binni ca che ca yanna, ti ganda che ca ndaani ca guidxi huiini ca, chi sí ca ni go xhi ca'.

¹⁶Para na be rabi be laaca': ―Cadi naquiiñe che cabe. Laudii ni go cabe laatu.

¹⁷Oraque na ca': ―Qué gapa di du gasti rarí jma que gaayu pan ne chupa benda.

¹⁸Para rabi be laaca': ―Latané cani naa.

¹⁹Oraque bicuí be ca binni que lú ca guixi huiini nuu raqué ne ucuaa be gaayu pan ne chupa benda que ne undisa lú be ibá' bidii be diuxquixe Dios. Para gundaa be cani ne bidii be cani ca discípulu que para gudiizi cani lú ca binni que.

²⁰Irá xixé binni que gudó dede bidxá ndaani ne biaana ru nandahui. Para bitopa cabe ni biaana que dede bidxá doce dxumi de ca nandahui ni biaana que.

²¹Ne irá ni gudó que bia'si gaayu mil hombre sin igaba gunaa ne ba'du'. Ra uzá Jesús lu nisadó'

²²Oraque ru gudxi be ca discípulu stibe chu' ca ndaani canuá que, che gá ca sti ladu nisa que, laga gabi si be ca binni que ma che be.

²³Ne gudxi si be ca binni que ma che be la? udxi'ba be lú ti dani yení' né be Dios, dede bixhinni be raqué, stubi lucha be.

²⁴Peru ma bixele canuá ra ze ca discípulu que zitu de uriá, ne nabé canaaze ola ni purti cudxigueta bi ni.

²⁵Ne nuxcanda que bidxiña Jesús ra nuu canuá que, zeda za lu nisa.

²⁶Ne ora bi'ya ca discípulu que zeda za be lu nisa la? bidxibi ca' ne bicaa ca ti ridxi muxe', na ca': Zeeda ti bultu racá.

²⁷Peru óraque na be rabi be laaca': ―Lachuu dxí. Cadi idxibi tu, naa ndi'.

²⁸Para na Pedru rabi laabe: ―Señor, pa lii nga la? guridxi naa guenda ra nuu lu', saya lu nisa.

²⁹Para na be rabi be laa: ―Gudá'. Oraque biete Pedru de ndaani canuá que zizá lu nisa, ze ra nuu be.

³⁰Peru biiya si Pedru pabiá' reciu nuu bi que la? bidxibi ne bizulú biaazi', ne bicaa ti ridxi: ―Bilá naa, Señor.

³¹Oraqueca bisigaa ná Jesús gundisa laabe ne na rabi laabe: ―Aque huaxié' fe napu xa. Xiñee bidxibi lu, hombre.

³²Ne casi udxi'ba cabe ndaani canuá que, biaana dxi bi que.

³³Oraque bizuxibi ca xcaadxi ni nuu ndaani canuá que xañee be ne na ca': ―Dxandí pe Xiiñi Dios lii. Bisianda Jesús binni Genesaret

³⁴Ne ora yendá cabe sti ladu que, biuu cabe ti lugar lá Genesaret.

³⁵Ne casi gunna ca binni ni nuu raqué tu laabe la? bicheeche ca stiidxa be irá guidxi ni nuu neza que, ne bedané cabe irá binni huará ra nuu be.

³⁶Dede gunaba cabe udii be lugar neca ñee xhaba si be cana ca', ne irá ni uda'na xhaba be que bianda.