Read Isthmus Zapotec San Mateo 22 Bible Online

San Mateo 22 - Isthmus Zapotec bible

San Mateo 22

¹Bigueta gudixhe ru Jesús xcaadxi ejemplu para laacabe, na:

²―Enda runi mandar sti Dios zeda gaca casi ti rey ni guluu saa ra biluxe xquenda xheela xiiñi'.

³Bisenda tidxi be cani maca bini invitar be ñeeda, peru qué niná ca'.

⁴Bigueta rabi be xcaadxi xpinni be: “Laché lachitidxi cani bine invitar gueeda ra enda xheela ri' purti ma nuu irá ni, ma biite yuze ro' ne yuze huiini ni bisiruaa, ne ma nuu endaró.”

⁵Peru nin óraque qué nulabi ca stiidxa be, lágala biree tobi ze rañaa ne stobi ziutoo,

⁶ne xcaadxi de laaca gunaaze ca cani biseenda be que, udiñe ca dede biiti ca'.

⁷Ne ora gunna be xi bi'ni ca la? nabé bidxiichi be ne biseenda be ca soldadu stibe, yeguuti cani biiti xpinni be que ne bicaa gui be xquidxi ca'.

⁸Oraque na be rabi be ca xpinni be: “Dxandí ma nuu enda xheela ri para gaca', peru qué iquiiñe cani bine invitar para laani.

⁹Yanna, laché lu calle ne tutiica idxaaga tu lacuidxi laa para enda xheela ri'.”

¹⁰Para biree ca xpinni be que lu calle ne bitopa ca irá ni bidxaaga ca', cásica ni nacha'hui zaqueca ni nadxaba', ne zaqué de bidxá ra chi gaca enda xheela que de binni.

¹¹Oraque biuu be cayuuya be irá ca' ne biiya be nuu ti hombre cadi nacu lari para enda xheela'.

¹²Para na be rabi be laa: “Amigu, ximodo biuu lu rarí pa cadi nacu lu lari para enda xheela'.” Peru qué nidxela hombre que xi niní'.

¹³Oraque rabi be cani canaguiizi': “Laundiibi ná be ne ñee be, ne laundaa laabe lu guelacahui ne raqué nga gu'na be dede go yaa be guidi ruaa be.”

¹⁴Ne óraque na Jesús: ―Stale tu raca invitar peru huaxié' tu zanda guiuu. Enda riguixe impuestu

¹⁵Oraque biree ca fariseu yení' stiidxa ca ximodo zanda usaba ca Jesús lu stiidxa'.

¹⁶Ne biseenda ca ca discípulu stica ne caadxi de ca judíu ni nuu pur Herodes ra nuu be, ne na ca rabi ca laabe: ―Maistru, nanna du jneza runi lu' ne dxandí neza sti Dios rusiidi lu', ne qué rugá lu iruti tutiica naca.

¹⁷Gudxi laadu xi na lu de ndi': Ñee jneza quixe nu ca impuestu sti César la? o co'.

¹⁸Peru ma nanna be cuyubi si ca usaba ca laabe, para rabi be laaca': ―Xiñee cuyubi tu usaba tu naa, binni rusiguii ca'.

¹⁹Latané ti moneda ni riguixe tu impuestu ca, guuya'. Para bidii ca laabe ti denariu.

²⁰Oraque rabi be laaca': ―Tu cá lú ni.

²¹Para na ca': ―César. Oraque na be: ―Laudii César sti César, ne laudii Dios sti Dios.

²²Ne ora bina diaga ca xi na be la? nabé bidxagayaa ca ne biree ca ze ca'. Pa dxandí zabani gue'tu'

²³Dxi queca beeda caadxi saduceu, cani na qué riasa binni de lade gue'tu', ne unaba diidxa ca laabe,

²⁴na ca': ―Maistru, uní' Moisés pa chu' ti hombre ichaganá', ne gueda gati qué ñapa xiiñi la? naquiiñe ichaganá bi'chi be xheela be ne gapa xiiñi casi ñaca xiiñi be.

²⁵Guyuu gadxe hombre lade du, irá ca bi'chi ca'. Bichaganá lugola que, ne guti qué ñapa xiiñi'. Para biaana né bi'chi be xheela be.

²⁶Ne zaqueca bizaaca rabiropa que ne rabionna, dede ra birá cabe.

²⁷Ne ra birá cabe que raqué guti gunaa que.

²⁸Yanna, xi na lu'. Dxi ibani gue'tu ya'. Uná de lade gadxe que xheela gunaa que, purti irá cabe bichaganá cabe laa.

²⁹Oraque na Jesús rabi laacabe: ―Cuchee tu purti qué ganna tu xi na Xqui'chi Dios nin pabiá' nandxó' be.

³⁰Purti dxi ibani gue'tu la? qué zachaganá cabe ne qué zucheela cabe sínuque zaca cabe casi ca ángel sti Dios ni nuu ibá'.

³¹Laatu canaba diidxa tu de enda ribani de lade gue'tu'. Qué xa huayuunda tu ra cá xi gudxi Dios laatu ra na:

³²“Naa nga Dios sti Abraham, ne sti Isaac ne sti Jacob.” Ne dxi uní' Dios nga la? ma guti cabe para binni, peru para Dios nabani ru cabe.

³³Ne ora bina diaga irá binni ni nuu raqué ni la? bidxagayaa ca modo cusiidi be que. Mandamientu ni jma risaca

³⁴Ora gunna ca fariseu ma biseegu Jesús ruaa ca saduceu la? uyuu ca tobi si ne uní' stiidxa ca'.

³⁵Nuu ti maistru de ley lade ca' ne uyé ngue ra nuu be para gu'ya pa ganda usaba laabe. Ne na rabi laabe:

³⁶―Maistru, uná nga mandamientu ni jma risaca lade idubi ley.

³⁷Para na be rabi be laa: ―“Gunaxhii Dios stiu' de idubi ladxidó' lo' ne idubi xhialma lu' ne idubi xquenda biaani lu'.”

³⁸Nga nga primé mandamientu ne ni jma risaca.

³⁹Ne rairopa ri zeda gaca casi primé ca: “Gunaxhii stobi cásica nadxii lu lii.”

⁴⁰Iropa ca mandamientu ca nga xcu idubi naca ley ne ni bicaa ca profeta. Tu xiiñi Cristu

⁴¹Ne laga rí ru ca fariseu raqué

⁴²rabi be laaca': ―Yanna xi na tu de Cristu, tu dé za be. Para na ca': ―Lade ca xiiñi David.

⁴³Para na be rabi be laaca': ―Pa zacá nga laani la? xiñee dxi bisiní' Espíritu Santu David, na Señor sti laabe ya'. Purti ndi nga ni uní' David óraque:

⁴⁴Na Dios rabi Señor stinne':“Gurí cuee dede ora ma gudixhe dxie cani nanala'dxi lii xañee lu'.”

⁴⁵Pa rabi David laabe Señor sti la? ximodo zanda gaca be xiiñi David ya'.

⁴⁶Peru nin tobi de laaca qué nidxela xi niní', ne dede dxi que bidxibi ca ninaba diidxa ca laabe xiixa.