Read Isthmus Zapotec San Mateo 24 Bible Online

San Mateo 24 - Isthmus Zapotec bible

San Mateo 24

¹Biree Jesús de ndaani yu'du ro' ne ma che be sti ladu, beeda ca discípulu stibe ne biluí' ná ca laabe ca yoo sti yu'du que.

²Para rabi be laaca': ―Ruuya tu irá ndi la? Gabe ca' laatu ziuu tu guxhá ni ne qué ziaana nin ti guie luguiá sti guie, de irá ni zanitilú. Xi gaca ante iluxe guidxilayú

³Biree cabe raqué uyé cabe lu dani Olivo ne raqué gurí be, para bidxiña ca discípulu ra nuu be ne na ca rabi ca laabe: ―Laga nuu nu laasi nu, racala'dxi du ganna du padxí nga nou' gaca irá ni gu'dxu laadu que. Ne xi seña ihuinni dxi mayaca gueedu ne iluxe guidxlayú ri'.

⁴Para na be rabi be laaca': ―Laguuya gá qué chu' tu quite laatu.

⁵Purti zeeda stale ni usiguii, zaná ca laaca nga Cristu, ne zabee chu ca stale binni.

⁶Ne zanna tu cayaca guerra ti ladu ne nuu de gaca ni sti ladu, peru cadi idxibi tu purti naquiiñe gaca irá nga. Peru neca ne nga la? ca'ru idxiña dxi iluxe pe guidxilayú.

⁷Purti zucaa lú ti gobiernu sti gobiernu ne zucaa lú ti guidxi sti guidxi, ne ziuu enda huará zaguixhe idubi naca ti guidxi, ne zaca gubiña ne xu stale lugar.

⁸Ne neca ma cayaca irá nga la? laganna raqué ru nga bizulú enda naná que.

⁹Zutiidi cabe laatu lu ná cani guniná laatu ne zuuti cabe laatu, ne zaca nanala'dxi binni de irá ladu laatu purti xpinne laatu.

¹⁰Ne stale tu zaxele de naa ne zuluí' saa ca laaca' ne zaca nanala'dxi saa ca'.

¹¹Laca ziasa stale profeta ma na ca de Dios zeeda ca', para usiguii si ca ne zabee chu ca stale binni.

¹²Ne ora ma bidale enda ruchee ndaani guidxilayú la? casi irá binni zusaana de ganaxhii saa.

¹³Peru tu qué ixhacala'dxi dede dxi iluxe irá ni la? zalá.

¹⁴Ne zui' cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú ri'.

¹⁵Bizeete profeta Daniel de dxa ni runi yuudxu ne ni runitilú que, ne ora gu'ya tu ma zuhuaa ni ndaani yu'du ro' lugar ra jma risaca la? laguxooñe'. (Tu gu'nda gui'chi ri la? guiene.)

¹⁶Cani nuu Judea, che lade dani.

¹⁷Ne ni dxi'ba ique yoo la? cadi guiete chi caa xiixa ralidxi.

¹⁸Ne ni nuu rañaa cadi ibigueta yoo para chi topa xhaba.

¹⁹Peru naná zaca para ca gunaa ni naca xiiñi' ne cani cugadxi ca dxi que.

²⁰Lainaba lu Dios cadi dxi pe guxooñe tu ca guiaba nanda, nin gaca ni dxi enda riziila'dxi'.

²¹Nabé naná zaca ni ca dxi que. Qué huayuu dxi gaca ni naná bia' qué, dede dxi bizá' Dios guidxilayú, ne ma qué ziuu ru dxi aca ni sti tiru.

²²Pa qué ucueeza dxí Dios lú ni la? irá xixé binni zati, peru pur ca xpinni be la? zucueeza be ni.

²³Pa chu' tu gabi laatu ca dxi que: “Laguuya', rarí nuu Cristu” o “Rarica nuu be” la? cadi guni cre tu laaca',

²⁴purti ziasa stale iní' Cristu laa o profeta laa ne zuluí' ca laatu seña nandxó' ne milagru, pa ñanda si nusiguii ca nécaca cani ma ulí Dios.

²⁵Cayabe ca' ni laatu de ca yanna.

²⁶Nga runi pa gabi cabe laatu nuu Cristu ndaani gui'xhi la? cadi chi guuya tu. O pa na cabe nuu be ndaani yoo la? cadi guni cre tu.

²⁷Purti dxi ibigueta Hombre Biseenda Dios la? zaca ni casi ora riuu xpiaani rayu, riguu ni biaani dede ladu rindani gubidxa hasta ladu riaazi',

²⁸ne laca zaca casi ora ribí zisi so'pe ratiica nuu mani ni ma guti. Modo ibigueta Hombre Biseenda Dios

²⁹Casi pe tidi enda naná ni gaca ca dxi que la? zacahui lu gubidxa ne ma qué zuzaani beeu, ne ziaba ca luceru de ibá', ne zaniibi dxacha irá ni nuu ibá'.

³⁰Oraque zahuinni seña ibá' ma chi ibigueta Hombre Biseenda Dios sti tiru, ne dxi que nga gu'na irá binni guidxilayú ne zuuya ca zeda yete be de ibá' lade za, ne stale enda nandxó' dede riaqui biaani'.

³¹Oraque zaxidxi trompeta reciu ne zuseenda be ca ángel stibe gueda topa irá ni ma ulí be de idubi naca guidxilayú.

³²Laicaa ejemplu sti yaga du'ga'. Ora ma gulee ni rama ri'ni ne ma cayapa ni bandaga la? nanna tu ma zeda dxiña tiempu nandá'.

³³Zacaca ora gu'ya tu cayaca irá ni ma gudxe laatu ca la? nanna tu ma bidxiña dxi iluxe irá ni.

³⁴Peru gabe ca' laatu zaca irá nga ante gati ca binni nuu yanna ri'.

³⁵Ziuu dxi initilú ibá' ne guidxilayú peru stiidxa qué ziaana sin gaca'.

³⁶Peru padxí ne pora la? iruti ganna, nin ca ángel ni nuu ibá', dede nin naa qué ganna' sínuque Bixhoze sia' nga nanna.

³⁷Ne dxi ibigueta Hombre Biseenda Dios la? zaca ni casi dxi bibani Noé.

³⁸Purti ante gaca fisiu que la? cayó ca binni que ne cayé' ca', cachaganá ca' ne cucheela ca', dede dxi biuu Noé ndaani arca que.

³⁹Ne ca'ru guiene ca xi chi gaca dede ora beeda nisa que, ziné irá ca'. Zacaca nga zaca ni dxi gueeda Hombre Biseenda Dios que.

⁴⁰Dxi gueeda be que la? zándaca nuu chupa rañaa, zie tobi ziaana stobi.

⁴¹O ra nuu chupa gunaa tobi si ra cayuutu ca', laca zie tobi ziaana stobi.

⁴²Nga runi lagataná purti qué ganna tu pora gueeda Señor stitu.

⁴³Peru ganna ca tu pa ñanna xpixuaana ti yoo pora gueeda gubaana ralidxi la? ñapa, ne qué nudii lugar niba'na cabe ralidxi.

⁴⁴Zacaca naquiiñe gataná tu. Pacaa mala zuhuaa Hombre Biseenda Dios gu'ya tu. Mozo cha'hui ne mozo qué iquiiñe'

⁴⁵Uná nga mozo ni zanda gusaana xpixuaana laa gu'ya irá xpinni ne gudii ni iquiiñe cabe ya'. Ti mozo ni nuu xpiaani ne ni runi jneza.

⁴⁶Dichoso de mozo que pa cayuni zacá ora gueeda xpixuaana'.

⁴⁷Gabe ca' laatu zusaana né xpixuaana be laabe irá ni napa.

⁴⁸Peru pa qué iquiiñe be ne na be zandaa ru gueeda xpixuaana be,

⁴⁹ne uzulú be quiñe be xcaadxi xpinni xpixuaana be, ne iree be chi to né be ne chi gue né be binigüé' la?

⁵⁰nin ganna be mala zuhuaa xpixuaana be ne cadi cabeza be laa.

⁵¹Zuniná laabe de bia' ganda ti' sin guiá laabe, ne zuseenda laabe lade ca xcaadxi ni qué iquiiñe casi laabe. Raqué nga gu'na be dede go yaa be guidi ruaa be.