Read Isthmus Zapotec San Mateo 27 Bible Online

San Mateo 27 - Isthmus Zapotec bible

San Mateo 27

¹Casi birá gueela', uní' stiidxa ca xaíque sti ca sacerdote ne ca xaíque sti guidxi que guuti ca Jesús.

²Ne bindiibi ca laabe yené ca laabe ra nuu gobernador Poncio Pilatu. Ra guti Judas

³Biiya si Judas ni yeutoo laabe que ma chi gati be la? beeda malaya laa, para yeudxii treinta moneda que ca xaíque sti ca sacerdote ne ca xaíque sti guidxi.

⁴Ne na rabi laaca': ―Naa bichee purti bituaa tobi ni nayá ladxidó'. Para na cabe rabi cabe laa: ―Xi runi importar laadu ya'. Lii gu'yu xi gu'nu'.

⁵Ne óraque bizu'nda be ni ndaani yu'du ro' que, ne biree be yenduu be doo yanni be.

⁶Gundisa ca xaíque sti ca sacerdote ca moneda que, peru na ca': ―Qué zanda cu' nu moneda ri lade ofrenda sti yu'du', purti bixuí' né ni rini sti ti hombre.

⁷Ne óraque uní' stiidxa cabe xi guni né cabe bidxichi que. Para uzí' cabe ti layú lu ni ruzá' guisu ne na cabe iquiiñe ni para igaachi judíu ni gueeda de sti ladu.

⁸Nga runi gulee lá cabe layú que Layú de Rini ne nga lá ni dede yanna.

⁹Ne zacá guca ni modo uní' Dios de ruaa profeta Jeremías dxi na:

¹⁰Ca xiiñi Israel gudixhe idoo be treinta moneda de plata,ne dxi bigueta moneda que lu ná cabe, ucuaa cabe ni,uzí' né cabe ni ti layú lu ni ruzá' guisu.Zacá nga gudxi Dios naa. Zuhuaa Jesús lu Pilatu

¹¹Ne ora zuhuaa Jesús nezalú gobernador, na gobernador que rabi laabe: ―Ñee lii nga rey sti ca judíu la? Para na be: ―Casi na lu ca, nga laani.

¹²Peru óraque neca gudixhe irá ca xaíque sti ca sacerdote ne ca xaíque sti guidxi xqueja be, ma qué niní' ru be gasti'.

¹³Para na Pilatu, rabi laabe: ―Cadi cayuna diaga lu irá ni cugaani cabe luguiá lu ri la?

¹⁴Peru qué nicabi be laa nin ti diidxa'. Ne nabé bidxagayaa gobernador que. Guta gati Jesús

¹⁵Chiqué, cada iza ra cayaca saa, rundaa gobernador que ti presu para ca binni que, tutiisi gapa ca gana.

¹⁶Ne iza que nuu ti presu ni za'bi stiidxa irá ladu, lá Barrabás.

¹⁷Ngue runi, ora bidxiña cabe, na Pilatu rabi laacabe: ―Tu racala'dxi tu undaa para laatu ya', Barrabás la? o Jesús ni rabi cabe Cristu.

¹⁸Nanna ca Pilatu bedané cabe Jesús ra nuu purti si qué na cabe chi nanda binni laa.

¹⁹Ma zuba Pilatu ra juzgadu sti', bisenda tidxi xheela laa, na xheela rabi laa: ―Cadi gu'nu hombre cha'hui ca gasti', purti pur laabe nabé bine sufrir lu bacaanda nuchi'.

²⁰Peru ucuá ca xaíque sti ca sacerdote ne ca xaíque sti guidxi tema lú ca binni que para inaba ca ilaa Barrabás ne gati Jesús.

²¹Oraque na gobernador que rabi laacabe sti tiru: ―Tu pe de laacabe racala'dxi tu undaa para laatu pue. Para na cabe: ―Barrabás.

²²Oraque na Pilatu rabi laacabe: ―Yanna xi gune nia Jesús ni rabi cabe Cristu ri ya'. Para bicabi irá cabe: ―¡Icá be lu cruz!

²³Para na gobernador que: ―Xiñee, xi huayuni be. Peru laacabe jma rusi bicaa cabe ridxi, na cabe: ―¡Icá be lu cruz!

²⁴Biiya si Pilatu pur gana si caní' ne mayaca uzulú ti bulla la? gucuaa nisa ne gudiibi ná nezalú ca binni que, para na rabi laacabe: ―Cadi luguia'ya dia' nuu donda purti chi ixii rini sti hombre cha'hui ri'. Laatu laguuya xi iree xa ni laatu.

²⁵Para na ca binni que: ―Zaa guiaana donda ca luguiá du ne luguiá ca xiiñi du.

²⁶Oraque bindaa be Barrabás para laaca', ne bini mandar be quiñe cabe Jesús para bidii be laa icá lu cruz.

²⁷Oraque gucuaa ca soldadu sti gobernador que Jesús, yenduu ca laabe ndaani palaciu para bidxiña idubi batallón ra nuu be.

²⁸Gulee ca xhaba be ne bicua'qui ca laabe ti lari xhiñá'.

²⁹Ne bizá' ca ti la'pa de guichi uluu ca ique be ne bigaasa ca tindaa gueere ná be ladu derechu. Oraque bizuxibi ca xañee be ne bini burla ca laabe, na ca': ―¡Viva rey sti ca judíu!

³⁰Ne bichá xhinni ca lú be ne guxha ca gueere que ná be, bichenda ca ni ique be.

³¹Biluxe si bini burla ca laabe zaqué la? gulee ca lari que ne bigacu ca laabe xhaba be, ne ziné ca laabe para icá be lu cruz. Ucuá Jesús lu cruz

³²Ra ze cabe que bidxaaga cabe ti hombre de Cirene lá Simón ne bicaa cabe laa gua cruz sti Jesús

³³dede yendá cabe ti lugar lá Gólgota. Ni riní' diidxa Gólgota ca la? Lugar sti Calavera.

³⁴Raqué bidii cabe laabe vinagre nucha nisa xculá'. Peru ora bi'ya be xi naca ni la? qué niná be ñe' be ni.

³⁵Bicaa si cabe laabe lu cruz guluu cabe xhaba be lu rifa, ne cada tobi ucuaa ni gulee. Guca ni zaqué ti iree ni modo pe uní' Dios de ruaa ti profeta de laabe, ra na: “Gudiizi cabe xhaba', ne uluu cabe laa lu rifa.”

³⁶Para gurí cabe cayapa cabe laabe.

³⁷Ne bicaa cabe ca diidxa ri xaíque be: “Ndi nga Jesús Rey sti ca judíu.” Purti na cabe pur laani cá be lu cruz.

³⁸Oraque bicaa né cabe laabe chupa gubaana', tobi ladu derechu ne stobi ladu biga'.

³⁹Ne cayuni burla ca binni zidi'di raqué laabe, cuniibi ique ca lú be,

⁴⁰na ca': ―Lii nou' zuxhá lu yu'du ro' ne zucuí lu ni lu chonna gubidxa. Yanna bilá laca lii. Pa dxandí Xiiñi Dios lii la? biete de lu cruz ca.

⁴¹Ne zaqueca na ca xaíque sti ca sacerdote ne ca maistru de ley ne ca fariseu ne ca xaíque sti guidxi, cuchá ca ni lú be:

⁴²―Stobi bilá be peru laca laabe qué zanda ulá be. Na be rey sti Israel laabe, ne pa dxandí ni la? guiete be de lu cruz ca yanna, ne zuni cre nu laabe.

⁴³Ucuá lú be Dios, yanna cueza be ulá Dios laabe, pa nadxii laabe, purti na be Xiiñi Dios laabe.

⁴⁴Ne zaqueca cayuni burla ca gubaana ni cá né be que laabe. Ra guti Jesús

⁴⁵Bia' galaa dxi bicahui xaibá' dede bia' las tres.

⁴⁶Mayaca ganda las tres bicaa Jesús ridxi: ―¡Elí, Elí, lama sabactani! Didxazá la? niní' be: Dios stinne', Dios stinne', xiñee ma bisaanu naa.

⁴⁷Ne ora bina diaga cani zuhuaa raqué ni uní' be que la? na ca': ―Cucaa ridxi be Elías.

⁴⁸Oraqueca biree tobi de laaca yecaa ti esponja bigadxe de vinagre ne bidxiiba ni ique ti gueere', ne bigué' ni laabe.

⁴⁹Peru na xcaadxi que rabi laa: ―Zaa nuu be, idu'ya nu pa zeda ulá Elías laabe.

⁵⁰Bigueta bicaa be sti ridxi ne raqué guti be.

⁵¹Ne mala guca cortina sti yu'du ro' chupa ndaa de punta punta, ne guca xu, gulaa stale guie.

⁵²Ne bixale caadxi ba', biasa stale de ca xpinni Dios ni ma guti.

⁵³Ne dxi ma biasa Jesús de lade gue'tu que la? biree cabe de ndaani ca ba' que, uyé cabe ndaani guidxi Jerusalén ne biiya stale binni laacabe.

⁵⁴Nabé bidxagayaa capitán ni cayapa Jesús que, laa ne ca soldadu sti', purti bini sentir ca guca xu ne biiya ca irá cosa ni guca que, para na: ―Dxandí Xiiñi Dios ndi'.

⁵⁵Zitu huiini de raqué zuhuaa caadxi gunaa ni beda nanda Jesús de Galilea, beeda ca para gacané ca laabe. Zuhuaa ca cayuuya ca ni cayaca que.

⁵⁶Lade cabe nuu María Magdalena ne María jñaa Jacobo ne José, ne jñaa ca xiiñi Zebedeu. Ra bigaachi Jesús

⁵⁷Huaxhinni que beeda ti hombre ricu de Arimatea lá José, tobi de cani uzá né Jesús chiqué.

⁵⁸Ne uyé be ra nuu Pilatu, yenaba be cuerpu sti Jesús laa, para bisenda tidxi ca xpinni gudii cuerpu que laabe.

⁵⁹Ne ucuaa si be cuerpu que, bichenda be laa ti lari gueela nayá,

⁶⁰ne gudixhe be laa ndaani ti ba' cubi ni maca gundaa be para laabe lu ti guie, ne biseegu be sti guie ngola ra puerta ba' que, para biree be ze be.

⁶¹Ne zuba María Magdalena ne sti María gaxha ra puerta ba' que. Cani cayapa xpa' Jesús

⁶²Udi'di si viernes que, bidxiña ca xaíque sti ca sacerdote ne ca fariseu ra nuu Pilatu,

⁶³na ca rabi ca laabe: ―Señor, cayetenala'dxi du ni uní' hombre rusiguii que dxi nabani, na raguionna gubidxa ziasa de lade gue'tu'.

⁶⁴Nga runi canaba du lii guseendu tu chi gapa ra ba' que dede ganda chonna gubidxa quenquita gueeda ca discípulu stibe cuana ca xcuerpu be ne gabi ca binni biasa be de lade gue'tu'. Ne zacá jma rusi zusiguii cabe, que dxi bizulú ni.

⁶⁵Para na Pilatu rabi laacabe: ―Racá laicaa caadxi soldadu, lachiné, ne lauseegu chaahui ruaa ba' que, bia' ganda ti'.

⁶⁶Oraque biree cabe uyé cabe ne biseegu dxiichi cabe ruaa ba' que ne bisaana cabe ca soldadu que gapa ni.