Read Isthmus Zapotec San Marcos 3 Bible Online

San Marcos 3 - Isthmus Zapotec bible

San Marcos 3

¹Ti dxi biuu Jesús ndaani ti yu'du ne raqué nuu ti hombre nabidxi ti chu ná'.

²Cundaachi ca binni ni nuu raqué pa zusianda be ná hombre que dxi enda riziila'dxi, ti gapa ca xi pur cu' ca xqueja be.

³Oraque rabi be hombre ni nabidxi ti chu ná que. ―Biasa bizuhuaa galahui ri'.

⁴Ne rabi be cani nuu raqué: ―Xii nga nexhe aca dxi enda riziila'dxi', gacané nu binni la? o guniná nu laa; ulá nu xpida binni la? o guuti nu laa. Peru iruti nicabi.

⁵Oraque biiya tuxhu be laaca ne triste biaana be purti naguidxi ladxidó' ca'. Ne rabi be hombre que: ―Bisigaa nou'. Para bisigaa ná hombre que ne bianda.

⁶Oraqueca biree ca fariseu ne uní' né ca ca xpinni Herodes para uyubi ca ximodo guuti ca laabe. Uriá nisa Galilea

⁷Peru óraque ucuaa be ca discípulu stibe yené be laaca uriá nisa que, ne yenanda stale binni laabe, binni Galilea, ne binni Judea,

⁸ne binni de Jerusalén ne de Idumea ne de sti ladu guiigu Jordán, ne binni de Tiro ne de Sidón. Ma bina diaga ca irá ni bi'ni be, nga runi uyé ca ra nuu be.

⁹Ne gudxi be ca discípulu stibe guni chaahui ca ti canuá para laabe ti cadi uquiichi ca binni que laabe.

¹⁰Purti nabé stale binni huará ma bisianda be ne rí ru jma ni ca'ru guianda dede cayaba ca luguiá be para ganda cana ca laabe.

¹¹Ne casi gu'ya ca binidxaba ni riguite ique binni laabe la? ruzuxibi ca xa ñee be ne rucaa ca ridxi: ―Lii nga Xiiñi Dios.

¹²Peru udinde né be laaca cadi uzeete ca tu laabe. Ra ulí Jesús doce apóstol

¹³Lade ca dxi que uyé Jesús lu ti dani, ne raqué guridxi cani racala'dxi che ra nuu.

¹⁴Ne ulí doce para sá né laa ne para chi güi stiidxa Dios.

¹⁵Ne bidii poder laaca para usianda ca cani huará ne cuee ca binidxaba ni riguite ique binni.

¹⁶Ndi nga lá doce ni ulí be que: Simón, ni na be iree lá Pedru;

¹⁷Jacobo ne Juan xiiñi Zebedeu, iropa bi'chi ca'. Ulee lá be laaca Boanerges. Pa niní' be ni didxazá la? ñabi be laaca Xiiñi Rayu.

¹⁸Ne laca lade cabe zeeda Andrés, Felipe, Bartolomé, Mateu, Tomás, Jacobo xiiñi Alfeu, Tadeu, Simón ni uyuu lade ca cananista,

¹⁹ne Judas Iscariote ni bitoo laabe que. Na cabe nuu né Jesús binidxaba'

²⁰Ne bigueta gurí zisi binni laacabe sti tiru, de qué ñanda ño cabe gueta.

²¹Ora gunna xfamilia be ni la? beeda ca para niné ca laabe purti na ca ma cayaca ique be.

²²Ne na ca maistru de ley, cani beeda de Jerusalén: ―Nuu né hombre ri Beelzebú, xaíque sti ca binidxaba', ne laa racané laabe para cuee be ca binidxaba ni riguite ique binni.

²³Oraque guridxi Jesús laacabe ne gudixhe ti ejemplu, na: ―Ximodo zanda cuee binidxaba laca laa ya'.

²⁴Pa tinde saa ca binni de ti guidxi la? nagueenda zanitilú guidxi que.

²⁵Ne pa tinde saa ti familia la? laca nagueenda zanitilú familia que.

²⁶Zacá nga laani, pa cucaa lú saa ca xpinni binidxaba la? laca nagueenda zanitilú.

²⁷Iruti zanda chi ndana ralidxi ti hombre ni nadipa pa qué undiibi laabe primeru. Peru pa undiibi laabe la? óraque huaxa ma zanda cuana ni napa be.

²⁸Gabe ca' laatu, zuni perdonar Dios binni de irá enda ruchee ne irá enda riguu di,

²⁹peru pa chu' tu usaca Espíritu Santu binidxaba la? ngue qué ziuu dxi guni perdonar Dios laa, sínuque ziaana donda luguiá'.

³⁰Gudxi be laaca zacá purti na ca nuu né be binidxaba'. Jñaa Jesús ne ca bi'chi'

³¹Ratu si que beeda jñaa be ne ca bi'chi be, ne biaana ca fuera peru bisenda tidxi ca laabe.

³²Para na cani zuba né laabe raqué: ―Racá nuu jñoou ne ca bi'chi lu', zeda yubi ca lii.

³³Peru óraque rabi be laaca': ―Tuu nga jñaa ne tuu nga ca biche'.

³⁴Ne óraque biiya dxí be cani zuba né laabe raqué ne na be: ―Ca ndi nga jñaa ne biche'.

³⁵Purti irá tu guni ni na Dios la? ca ngue nga biche ne bizana ne jñaa'.