Read Isthmus Zapotec San Lucas 12 Bible Online

San Lucas 12 - Isthmus Zapotec bible

San Lucas 12

¹Bizulú cabí zisi binni Jesús dede calá saa ca'. Para na rabi ca discípulu sti': ―Laguuya gá qué chi icá sti ca fariseu laatu. Nabé ricá enda rusiguii stícabe binni casi riaazi levadura cuba pan.

²Peru napa xidé ihuinni irá ni ye'gu lú, ne zaqueca zanna binni irá ni naga'chi'.

³Zacá nga laani. Irá ni huaní' tu ra nacahui, ziuu tu iní' ni ra naya'ni'. Zaqueca irá ni huaní' tu xa diaga binni ndaani yoo, ziuu tu quiba ique yoo ucheeche ni guidxi. Tu naquiiñe idxibi nu

⁴Xhamigua ca', racaladxe ganna tu tuu nga idxibi tu. Cadi idxibi tu ni zanda guuti cuerpu si stitu ne ma qué zanda ru guni gasti'.

⁵Sínuque laidxibi Dios purti laa zándala guuti cuerpu stitu la? ne zanda cu' laatu gabiá. Nga runi cayabe laatu, laidxibi laabe.

⁶Laaca tu nanna tu ridoo chupa mani huiini pur chupa domi', peru neca qué risaca came, qué ziaba si tobi de laacame layú pa qué na Dios.

⁷Ne laatu la? jma risaca tu que stale mani huiini'. Nga runi cadi idxibi tu, purti dede guicha ique tu ma bigaba Dios. Ni qué rituí lú gaca xpinni Cristu

⁸Cayabe laatu, tutiica iní' xpinne laa nezalú binni la? laca zanié xpinne laa nezalú ca ángel sti Dios.

⁹Peru tu iní' nezalú binni cadi xpinne laa la? laca zanié nezalú ca ángel sti Dios cadi xpinne laa.

¹⁰Naa nga Hombre Biseenda Dios. Pa chu' tu cu' dí naa la? zuni perdonar Dios laa. Peru pa chu' tu usaca Espíritu Santu binidxaba la? qué zuni perdonar Dios laa.

¹¹Ora chi nduu cabe xqueja tu ndaani yu'du sti ca judíu o chiné cabe laatu ra nuu justicia la? cadi chu' tu xizaa xi iní' tu.

¹²Purti ora ma nuu tu raqué zusiidi Espíritu Santu laatu xi iní' tu. Pabiá' naxoo enda ruyubi gapa bidxichi

¹³De lade ca binni que biree tobi na rabi laabe: ―Maistru, gudxi biche icaa nia laa bia'ca ni bisaana né bixhoze laadu.

¹⁴Peru rabi be laa: ―Tu gudxi lii juez naa para quiize sti binni ya'.

¹⁵Ne óraque rabi be irá ca binni que: ―Laguuya gá laatu ne enda ruyubi gapa bidxichi, purti cadi nga si nga enda nabani sti binni.

¹⁶Oraque byuí' né be laaca ti cuentu rabi be laaca': ―Sicarí bizaaca tobi hombre ricu. Nabé guca xquela.

¹⁷Ne bizulú caní' ique: “Xi gune', ma qué gapa paraa uchaya irá niza ri'.”

¹⁸Peru óraque na: “Ma nanna xi gune'. Zuxhaya ca troja stinne'. Zucué cani jma naro'ba para idxá irá niza ri' ne irá stinne'.

¹⁹Ne óraque zanda inié': Yanna huaxa ma chi iziiladxe' ne ma chi guieche', purti ma napa stale ni gahua ne ni guee', ne ma naguaa chaahue ni iquiiñe stale iza.”

²⁰Peru na Dios rabi laabe: “Binni huati. Yanna gueela ca zati lu'. Ne tu guiaana né irá ni naguu chaahui lu ca ya'.”

²¹Zacá nga cani rutopa lú para laca laa, peru qué gapa gasti ni risaca nezalú Dios. Rapa Dios ca xiiñi'

²²Oraque rabi be ca discípulu stibe: ―Nga runi cayabe laatu, cadi chu' tu xizaa paraa iree ni go to para ibani tu, o paraa iree lari cuaqui tu.

²³Purti jma risaca xpida tu que endaró, ne jma risaca cuerpu stitu que lari.

²⁴Laguuya ca bia'qui gu'ya tu. Qué riguu ca bini, que ribee ca guela, qué gapa ca troja, qué gapa ca lidxi ca ra nuchá ca ni ño ca', peru rudii Dios ni go ca'. Ñee cadi jma risaca tu que ca mani huiini la?

²⁵Uná de laatu, pa niguu xaíque nisoo xcaadxi, ñee nisoo la?

²⁶Pa nin nga qué zanda guni tu la? xiñee riuu tu xizaa pur ni iquiiñe tu ya'.

²⁷Laguuya modo rigaa ca guie' gui'xhi'. Qué runi ca dxiiña', qué riguiba ca', peru nin Salomón, neca nabé bizuchaahui', qué ñacu lari sicarú bia' sicarú cani.

²⁸Ne pa zacá ruzuchaahui Dios ca guie' gui'xhi', neca yanadxí nagá' ca', ixí ma chaqui ca la? lágaxa laatu, qué udii be ni gacu tu, binni qué runi cre ca'.

²⁹Nga runi cayabe laatu, cadi ma canazá tu ma nuu tu xizaa xi go to, xi gue tu.

³⁰Purti zacá runi ca binni ni qué runi cre Dios, peru laatu la? ma nanna Bixhoze tu ni nuu ibá' xi irá caquiiñe tu.

³¹Lauyubi guni mandar Dios ndaani ladxidó' to, ne xcaadxi ca zacá si lú ni. Ni dxandí risaca

³²Cadi idxibi tu, dendxu huiini stinne ca', purti neca huaxié' tu peru rieche Bixhoze tu gudii laatu irá ni napa ladxi ná'.

³³Lautoo ni napa tu. Lagacané cani caquiiñe'. Ne zacá casi ñaca caguu chaahui tu xpueltu tu ra qué zaniti. Caguu chaahui tu ni ibá' ra qué ziuu gubaana' ne qué zacá bandaa ni.

³⁴Zacá nga laguni, purti ra nuu ni risaca para laatu la? raqué nuu ladxidó' to. Gataná binni

³⁵Ne laca rabi be laaca': ―Lagataná, zaa nacu tu xhaba tu ne zaa cá guí xpiaani tu.

³⁶Lagaca casi ni cabeza ibigueta xpixuaana de enda xheela' ti casi guiuu xpixuaana uxhidxi ná', maca ziuxhele'.

³⁷Dichoso de ni nexhená guedandá xpixuaana'. Ziuu xpixuaana be, ne cuee si lari, zucuí laabe ruaa mexa', udii ni go xhi be.

³⁸Dichoso laabe pa nexhená be guedandá xpixuaana be, neca guedandá galaa gueela o télayu.

³⁹Sicarí nga laani, pa ñanna xpixuaana ti yoo pora ñe gubaana ralidxi la? ñataná para cadi ñuu cabe ralidxi.

⁴⁰Laatu laca lagataná, purti nin ganna tu mala ibigueta Hombre Biseenda Dios. Mozo cha'hui ne mozo qué iquiiñe'

⁴¹Oraque na Pedru rabi laabe: ―Señor, ñee byuí' lu nga para laasi du la? o para irá binni.

⁴²Para na be: ―Byue ni para tutiisi gacala'dxi chu' xpiaani', guni xhiiña xpixuaana jneza. Zuni xpixuaana be laabe xaíque sti ca xcaadxi xpinni, gu'ya be go ca bia' nexhe go ca', ne go ca xhiora ni.

⁴³Dichoso de laabe pa jneza cayuni be ora guedandá xpixuaana be.

⁴⁴Purti óraque ma dede irá ni napa zusaana ladxi ná be.

⁴⁵Peru pa niná be: “Zandaa ru gueeda xpixuaana'.” Ne óraque nuzulú niguiñe be ca xcaadxi mozo ne ca criada, ño be ne ñe' be de ra nixudxi be,

⁴⁶nin ganna be mala ñedandá xpixuaana be. Ninaaze laabe, ñunidé laabe, niree nanda laabe casi tobi ni qué iquiiñe'.

⁴⁷Ni nanna xi racala'dxi xpixuaana ne qué gataná guni ni la? jma naná ziaba ná'.

⁴⁸Peru ni qué ganna xi na xpixuaana ne gueda uchee la? huaxié' ziaba ná'. Ni napa stale gracia jma stale naquiiñe guni, ne ni usaana cabe stale ladxi ná la? jma stale zanaba cabe laa. Beda ndaa saa Jesús binni

⁴⁹Naná ni zeda gune ndaani guidxilayú. Casi ñaca zeda usaba gui ndaani ni, ne para naa pa ñanda si ma ñaca ni.

⁵⁰Napa xidé tide ti enda naná naro'ba', ne qué zanda chu' dxí ladxiduá' dede ora ma udide ni.

⁵¹Ñee zácaxa tu beda gune binni tobi si la? Co', cadi nga beda gune', sínuque beda utinde binni.

⁵²Purti de ca yanna ra nuu gaayu binni ndaani ti yoo, ziasa chonna zucaa lú xhupa que, ne zucaa lú xhupa que laaca'.

⁵³Ziuu hombre zucaa lú bixhoze, ne zucaa lú bixhoze laa. Ziuu gunaa zucaa lú jñaa, ne zucaa lú jñaa laa. Zucaa lú gunaa xualidxi, ne zucaa lú xualidxi laa.

⁵⁴Ne laca rabi be ca binni que: ―Ora gu'ya tu guiasa ti guelacahui na tu chi guiaba nisa guie, ne dxandí riaba nisa guie.

⁵⁵Ne ora gu'ya tu cundubi bi nisa na tu enda nandá', ne dxandí raca nandá'.

⁵⁶Xiñee riene tu ni rihuinni ibá' ne guidxilayú peru qué riene tu ni cayaca yanna ri'. Racala'dxi si tu quite tu binni, nga laani. Lauyubi gaca tu tobi si

⁵⁷Xiñee qué uyubi tu lade si tu uná nga ni jneza guni tu.

⁵⁸Pa chiné tuuxa lii ra nuu justicia biyubi ca chu' neu laabe tobi si laga ze tu neza, para cadi chiné be lii ra nuu juez. Pacaa zutidi juez lii lu ná gendarme para useguyoo lii.

⁵⁹Ne gabe ca' lii qué zareeu de raqué dede qué qui'xu irá ni nuza'bu'.