Read Isthmus Zapotec San Lucas 2 Bible Online

San Lucas 2 - Isthmus Zapotec bible

San Lucas 2

¹Ca dxi que uní' rey Augusto César idopa lá irá xixé binni de irá guidxi ra runi mandar.

²Nga nga primé tiru bitopa cabe lá binni dxi cayuni mandar Cirenio ndaani guidxi Siria.

³Irá binni napa xidé che xquidxi para icá lá.

⁴Ngue runi biree José de ndaani guidxi Nazaret de Galilea uyé Belén ti guidxi de Judea ra gule David. Ne uyé be raqué purti za be de xfamilia David.

⁵Yené be María Belén para icá lá cabe raqué. Ca'ru iluxe xquenda xheela cabe peru ma uyuu stiidxa cabe, ne ma naca xiiñi María.

⁶Raqué nuu cabe beda ganda dxi gapa María ba'du'.

⁷Gupa be primé xiiñi be ne bichenda be laa lari, gudixhe be laa ndaani ti cajón ra ro mani guixi, purti qué nidxela cabe ra ñaana cabe ndaani yoo. Bidxiña caadxi ángel ra nuu ca pastor

⁸Gaxha de guidxi Belén nuu caadxi pastor cayapa ca dendxu huaxhinni.

⁹Mala biiya cabe ti ángel sti Dios, ne bizaani biaani sti Dios laacabe. Bidxibi cabe dede uca diti cabe.

¹⁰Peru na ángel que rabi laacabe: ―Cadi idxibi tu. Nia caadxi diidxa cubi gabe laatu, ni gusieche de irá xixé binni guidxilayú.

¹¹Yanadxí gule tobi ni ulá laatu ndaani xquidxi David, ne laabe nga Cristu Señor.

¹²Ne ora idxela tu ti badu huiini renda lari nexhe ndaani ti cajón ra ro mani guixi la? ngue nga laabe.

¹³Ne mala bihuinni jma ángel ra nuu ángel que, cayuunda ca', cusisaca ca Dios, na ca':

¹⁴Diuxquixe Dios ni nuu ibá',ne ndaani guidxilayú gata dxí ladxidó' cani guni ni na be.

¹⁵Biree si ca ángel que ra nuu ca pastor que, bigueta ca ibá'. Oraque na ca pastor que: ―Chuu Belén, chu du'ya ni guca raqué, ni bisenda tidxi Dios laanu ri'.

¹⁶Biree guxooñe cabe, ziguuya cabe ni guca que. Ne bidxela cabe José ne María ne badu huiini que nexhe ndaani ti cajón ra ro mani guixi.

¹⁷Ne ora bi'ya cabe badu huiini que, byuí' né cabe laaca irá ni gudxi ángel que laacabe de badu huiini que.

¹⁸Bidxagayaa irá ni bina diaga ni uní' cabe que.

¹⁹Peru María cayapa irá ni ndaani ladxidó' ne candaa ique né ni.

²⁰Bigueta ca pastor que, cusisaca ca Dios ne cudii ca diuxquixe laa, pur irá ni bina diaga ca ne ni bi'ya ca', purti uca ni casi pe gudxi ángel que ni laaca'. Ra napa Jesús xhono gubidxa

²¹Dxi bisaa badu huiini que xhono gubidxa guluu cabe seña sti Dios laa, ne ulee lá cabe laa Jesús, lá ni gudxi ángel que María ante gaca xiiñi'.

²²Gupa si María dxi casi cá lu ley ni bidii Dios Moisés guni ca gunaa ni gapa ba'du la? yené ca badu huiini que Jerusalén, yeuchiña ca laabe nezalú Dios.

²³Bi'ni cabe zaqué purti cá lu ley sti Dios: “Irá hombre lugola iree chu para Dios.”

²⁴Ne yené cabe ofrenda casi cá lu ley que, chupa gugu huiini o chupa paloma.

²⁵Chiqué uyuu ti hombre ndaani guidxi Jerusalén, lá Simeón. Nacha'hui be ne nabé rusisaca be Dios. Dxá ladxidó' be de Espíritu Santu, ne cabeza be gu'ya be gueeda ni gueda ulá ca binni Israel.

²⁶Purti ma gudxi Espíritu Santu laabe qué zati be dede qué gu'ya be gueeda Cristu ni chi useenda Dios.

²⁷Ne dxi que biluí' Espíritu Santu laabe che be ndaani yu'du ro'. Bia'si pe raqué nuu be ora bedané cabe Jesús. Zeda guni cabe casi cá lu ley guni né cabe ba'du'.

²⁸Ucuaa be badu huiini que undisa be lu ná be ne bidii be diuxquixe Dios,

²⁹na be:Señor, huayune xhiiña lu',ne yanna ma nexhe dxí ladxiduá',purti ma uca ni bidii stiidxa lu naa.Ma zanda chi neu naa yanna.

³⁰Ma biiya dxi'che pia'ni gudixhe lu gueda ulá irá binni.

³¹(null)

³²Laabe chi udxiiba be ca binni Israel,ca xpinni lu',ne chi aca be biaani para cani cadi za de Israel.

³³Bidxagayaa José ne María irá ni uní' Simeón de badu huiini que.

³⁴Oraque uluu Simeón ndaaya laacabe ne na rabi María jñaa Jesús: ―Pur ni zeda guni badu huiini ri' ziaba stale binni Israel, ne zaqueca pur laabe ziasa stale de laaca'. Zeda uluí' be binni xii nga racala'dxi Dios peru stale tu qué zaná ulabi laabe.

³⁵Ne zacá zahuinni xi nuu ndaani ladxidó' cada tobi. Peru para lii la? María, zeda gaca irá nga casi ñaca nudxiga cabe ti gudxíu xhialma lu'.

³⁶Laca nuu ti gunaa raqué lá Ana, xiiñi Fanuel de xfamilia Aser. Rui' né be binni ni gabi Dios laabe. Nahuiini ru be bichaganá be, peru lu gadxe iza de bichaganá be guti xheela be. Yanna ma nagola be, ma napa be ochenta y cuatro añu. Qué riree be ndaani yu'du ro'. Rusisaca be Dios ridxí ne huaxhinni, ne stale tiru riaana be sin go be para iní' né be Dios.

³⁷

³⁸Oraque pe bidxiña be ra nuu badu huiini que, ne bidii be diuxquixe Dios, ne dede óraque bizulú cayabi be binni badu huiini que nga ni cabeza ca gueda ulá Jerusalén. Bigueta cabe Nazaret

³⁹Bi'ni si cabe irá ni cá lu ley sti Dios guni cabe, bigueta cabe Nazaret de Galilea, xquidxi cabe.

⁴⁰Ze dxi jma ziniisi badu huiini que, jma ziyapa stipa, jma ziyuu xpiaani ne nabé uluu Dios ndaaya laa. Nuu Jesús ndaani yu'du ro'

⁴¹Irá iza rie José ne María Jerusalén rigapa pascua, saa ro' sti ca judíu.

⁴²Dxi ma bisaa Jesús doce añu yené cabe laa, yegapa cabe saa Jerusalén, casi runi cabe irá iza.

⁴³Biluxe si saa que bigueta José ne María, peru qué ñanna ca pa biaana Jesús Jerusalén.

⁴⁴Zácaxa ca zeeda be lade irá binni que. Uzá ca idubi ti dxi, ne óraque ru biyubi ca laabe lade ca lisaa ca', ne lade cani runibiá' ca',

⁴⁵peru qué nidxela ca laabe. Para bigueta ca Jerusalén, yeyubi ca laabe.

⁴⁶Lu chona gubidxa beda idxela ca laabe ndaani yu'du ro'. Zuba be galahui de cani rusiidi ley sti Dios, cucaa diaga be laaca' ne canaba diidxa be laaca'.

⁴⁷Nabé bidxagayaa cani cayuna diaga pabiá' riene be ne modo ricabi be.

⁴⁸Ora bidxela cabe laabe, bidxagayaa cabe, ne na jñaa be rabi laabe: ―Xiiñe', xiñee ndi canayu'nu laadu sicarí'. Naa ne bixho'zo lugu canazá du canayubi du lii.

⁴⁹Oraque rabi be laaca': ―Xiñee ndi canayubi tu naa. Ñee qué ganna tu pa naquiiñe gune xhiiña Bixhoze la?

⁵⁰Peru qué ñene ca xi cayabi be laaca'.

⁵¹Bigueta né be laaca Nazaret ne bizuuba be stiidxa ca'. Peru María cayapa irá ni ndaani ladxidó'.

⁵²Ze dxi jma ziyuu xpiaani be ne ziniisi be ne cayeche né Dios laabe ne zaqueca cayeche né binni laabe.