Read Isthmus Zapotec San Lucas 21 Bible Online

San Lucas 21 - Isthmus Zapotec bible

San Lucas 21

¹Undisa lú be biiya be ra cusaba ca ricu vueltu ndaani caja ra riaba ni usiga'de cabe Dios.

²Ne biiya be bisaba ti viuda pobre chupa de gaayu huiini'.

³Para na be: ―Gabe ca' laatu, jma stale bisaba viuda ri' que ca xcaadxi ca.

⁴Purti ca xcaadxi ca bidii ca Dios ni ma biaana si stica', ne laabe huaxié' napa be peru bisaba be irá ni napa be para ibani né be. Na Jesús zaxá yu'du ro'

⁵Bizulú tuuxa cuzeete pabiá' sicarú yu'du ro' que modo zuchaahui ni ne ca guie ne irá ni huasiga'de cabe Dios.

⁶Para rabi be laaca': ―Irá ni cayuuya tu nagasi ri la? ziuu dxi initilú cani, dede qué ziaana ti guie luguiá sti guie. Xi gaca ante iluxe guidxilayú

⁷Para na ca': ―Maistru, padxí gaca irá ndi ya' ne ximodo ganna du ora ma chi aca ni.

⁸Oraque rabi be laaca': ―Laguuya gá qué chi chite cabe laatu, purti zeeda stale ni usiguii, zaná ca laaca nga Cristu, ne ma bidxiña hora. Peru cadi chi nanda di tu laaca'.

⁹Ne ora ganna tu cayaca guerra ne cadinde cabe rarí rarica', cadi idxibi tu, purti naquiiñe sa niru irá nga, peru ca'ru idxiña dxi iluxe ni.

¹⁰Ne laca rabi be laaca': ―Ziasa ti guidxi ucaa lú sti guidxi. Zaqueca ziasa ti gobiernu ucaa lú sti gobiernu.

¹¹Zaca stale xu ro', ne stale guidxi zaca gubiña ne enda huará. Zaree xiixa ibá' ne zadxibi binni ora gu'ya ni, ne laca zahuinni seña ro' ibá'.

¹²Peru para gaca irá nga la? nirudó' zanaaze cabe laatu ne zazabi nanda cabe laatu ne zinduu cabe xqueja tu ra yu'du ne ra nuu rey ne gobernador, ne zuseguyoo cabe laatu. Irá nga zuni cabe laatu purti xpinne laatu.

¹³Peru nga zacané para güí tu stiidxa nezalú cabe.

¹⁴Cadi cu' xaíque tu naquiiñe quixhe chaahui tu xi iní' tu para usihuinni tu cadi cuchee tu.

¹⁵Purti naa zudiee diidxa laatu ne enda biaani para useegu tu ruaa tutiica ucaa lú laatu.

¹⁶Ne dede bixhoze tu ne jñaa tu zuluí' laatu. Ne zaqueca zuni ca bi'chi tu ne ca lisaa tu ne ca xhamigu tu, ne zuuti ca caadxi de laatu.

¹⁷Ne irá binni zaca nanala'dxi laatu purti xpinne laatu.

¹⁸Peru nin ti guicha ique tu qué zanitilú.

¹⁹Pa qué ixhacala'dxi tu la? zalá tu.

²⁰Ne ora gu'ya tu ma naguu soldadu le' Jerusalén la? lagana ma bidxiña dxi initilú ni ngue.

²¹Oraque cani nuu Judea uxooñe lu ca dani, ne cani nuu ndaani guidxi cadi iree. Cani nuu rañaa la? cadi ibigueta ndaani guidxi.

²²Purti ca dxi que nga quixe cabe irá ni bi'ni cabe para gaca ni casi cá lu Xqui'chi Dios.

²³Naná zaca para ca gunaa ni naca xiiñi ne cani cugadxi ca dxi que purti nabé nagana zaca ni para irá binni guidxi que ne naná ziaba ná ca'.

²⁴Zati caadxi lu guerra ne xcaadxi ziné cabe laa adxé adxé guidxi. Zutu ñee cani cadi judíu guidxi Jerusalén bia' dxi udii Dios lugar laaca'. Modo ibigueta Hombre Biseenda Dios

²⁵Oraque zahuinni seña ibá', adxé zahuinni gubidxa ne beeu ne ca luceru. Ne irá binni guidxilayú zadxibi dede qué zadxela xi guni ora guna diaga pabiá' reciu caxidxi cadiñe ntaa nisadó'.

²⁶Zadxibi binni dede zieegu', purti ma nuu xizaa xi chi aca ndaani guidxilayú. Zaniibi dxacha irá ni cá ibá'.

²⁷Oraque zuuya cabe Hombre Biseenda Dios, zeeda lade za de ria'qui biaani ne stale enda nandxó'.

²⁸Ora gu'ya tu uzulú gaca irá nga la? lauzuhuaa chaahui', laindisa ique purti ma cadxiña dxi ilá tu.

²⁹Ne laca udixhe be ti ejemplu para laaca', rabi be laaca': ―Laguuya ca yaga du'ga ne ca xcaadxi yaga.

³⁰Ora ma cabee ni biitu la? ma nanna tu ma zeeda tiempu enda nandá'.

³¹Zacaca nga ora gu'ya tu gaca irá nga, ma nanna tu ma bidxiña dxi guni mandar Dios.

³²Dxandí cayabe laatu, irá ndi zaca ante gati ca binni nuu yanna ri'.

³³Ziuu dxi initilú ibá' ne guidxilayú, peru stiidxa qué ziaana sin gaca'.

³⁴Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiá' Dios. Pacaa zaguidxi ladxidó' to, ne nin ganna tu mala zanaaze dxi que laatu.

³⁵Purti ziaba ni luguiá irá binni guidxilayú casi ti trampa.

³⁶Nga runi lagataná. Cadi guiaana dxí tu de iní' né tu Dios para ganda ilá tu de irá ni chi gaca ca, ne zacá zanda uzuhuaa tu nezalú Hombre Biseenda Dios.

³⁷Irá dxi idubi dxi rusiidi be ndaani yu'du ro'. Huaxhinni riguiaana be lu dani Olivo.

³⁸Ne siadó' ro' ma ze binni ndaani yu'du que, ziucaa diaga laabe.