Read Isthmus Zapotec San Juan 10 Bible Online

San Juan 10 - Isthmus Zapotec bible

San Juan 10

¹Ne laca na Jesús rabi laacabe: ―Laucaa diaga chaahui ni chi tidxe laatu ri': Ni qué chu' neza ra puerta ndaani currá ra nuu ca dendxu' sínuque quiba ique ni la? gubaana laa.

²Peru ni chu' neza ra puerta que la? ngue nga pastor sti ca dendxu que.

³Ne ora chindá be, ruxhele ni cayapa ra puerta que guiuu be, ne riní' be lá ca dendxu stibe. Runibiá' ca dendxu que stidxi be ne ribee be laaca'.

⁴Ne ora ma ulee be irá ca dendxu stibe la? rizá niru be lú came. Rinanda came laabe purti runibiá' came stidxi be.

⁵Peru ni cadi pastor stícame la? qué rinanda came laa, sínuque ruxooñe came de laa purti qué runibiá' came stidxi.

⁶Gudixhe be ejemplu ca para laaca', peru qué ñene ca xi na ni. Jesús pastor cha'hui'

⁷Ne laca rabi be laaca': ―Gabe ca' laatu, naa zeda gaca casi puerta sti currá ra riuu ca dendxu'.

⁸Qué nulabi ca stendxua cani beeda ante guenda', purti gubaana laaca' ne zeda ndana si ca'.

⁹Naa nga puerta'. Tu chu' neza ra nuaa' zalá, ziuu ne zaree ne zadxela ni go.

¹⁰Gubaana la? reda ndana', reda guuti, reda unitilú. Peru naa benda para gapa cabe enda nabani ne idxá tipa xpida cabe de enda nayeche'.

¹¹Naa nga pastor cha'hui'. Pastor ni nacha'hui la? zudii xpida pur ca dendxu sti'.

¹²Ni cayaxa para gapa dendxu la? qué rapa chaahui laacame purti cadi sti pe laacame, ne ruxooñe rusaana laacame ora gu'ya zeeda gueu'. Ne rinaaze gueu laacame, rucheeche ndase laacame.

¹³Ruxooñe be purti cayaxa si be para gapa be laacame. Qué rizaala'dxi be laacame.

¹⁴Naa nga pastor cha'hui ne runebia'ya ca dendxu stinne', ne laaca laca runibiá' ca naa,

¹⁵casi runibiá' Bixhoze naa ne runebia'ya laa. Ne rudiee xpida pur ca dendxu stinne'.

¹⁶Laca napa rua' xcaadxi dendxu ni cadi nuu ndaani currá ri'. Naquiiñe chi caa laacame. Zucaa diaga came stidxe' ne zaca came tobi si ne zapa came tobi si pastor.

¹⁷Nadxii Bixhoze naa purti rudiee xpida' ti ibigueta icaa ni sti tiru.

¹⁸Iruti cayaxha ni naa sínuque naa pia' caguixhe ni. Zanda quixhe ni ne zanda icaa ni sti tiru. Nga nga ni gudxi Bixhoze naa gune'.

¹⁹Bigueta uyuu dinde ca judíu pur cani uní' be que.

²⁰Stale de laaca na: ―Nuu né be binidxaba ne cayaca ique be. Xiñee cucaa diaga tu laabe.

²¹Ne xcaadxi na: ―Lácaxa zacá riní' ni nuu né binidxaba'. Zanda xa uxhele binidxaba lú ni nacheepa lú. Ra ucala'dxi ca judíu nuchá guie Jesús

²²Lu beeu nanda cayuni cabe saa ndaani guidxi Jerusalén, saa ni rabi cabe “Dedicación”.

²³Tobi de ca dxi que canazá Jesús corredor sti yu'du ro', ni rabi cabe Corredor sti Salomón.

²⁴Raqué uluu caadxi judíu le' laabe, ne na ca rabi ca laabe: ―Dede padxí udiiu lugar gata dxí xquenda biaani du. Pa lii nga Cristu la? gudxi ca ni laadu.

²⁵―Ma gudxe ni laatu, rabi be laaca'. ―Peru qué na tu guni cre tu. Ca dxiiña rune la? rune ni purti nuu né Bixhoze naa, ne laacani rusihuinni cani tu naca'.

²⁶Peru qué runi cre tu purti cadi za tu lade ca dendxu stinne', casi gudxe laatu.

²⁷Runebia'ya ca dendxu stinne' ne rucaa diaga ca naa, ne rizá nanda ca naa.

²⁸Rudiee laaca enda nabani ni qué zaluxe ne qué ziuu dxi initilú ca', ne iruti zanda gaxha laaca ndaani naya'.

²⁹Bixhoze bidii laaca naa. Iruti zanda gaxha laaca ndaani ná Bixhoze', purti jma nandxó' Bixhoze que irá xixé.

³⁰Naa ne Bixhoze', tobi si laadu.

³¹Oraque gundisa ca judíu guie sti tiru, nuchá ca laabe.

³²Para rabi be laaca': ―Ucané Bixhoze naa bine stale cosa ni galán lade tu. Uná de laacani qué ñuula'dxi tu para uchá tu guie naa.

³³Oraque na ca': ―Cadi cuchá du guie lii purti bi'nu xiixa ni galán, sínuque cuchá du guie lii purti cadi jneza cayuni lu'. Binni guidxilayú lii peru cayu'nu lii Dios.

³⁴Para rabi be laaca': ―Lu ley stitu cá ra na Dios: “Unié nia laatu casi ñaca tu dios, purti naa biseenda laatu.”

³⁵Ca binni ucuaa stiidxa be chiqué gudxi be laaca dios, ne qué zanda uchiá nu Xqui'chi be.

³⁶Yanna naa, ulí Dios naa ne biseenda naa ndaani guidxilayú ri', ne na tu cadi jneza cayune tisi rabe Xiiñi Dios naa.

³⁷Pa cadi cayune xhiiña Bixhoze la? cadi guni cre tu naa.

³⁸Ne pa cayune ni la? neca qué runi cre tu ni rinié', peru laguni cre dxiiña ca ti ganna tu ne guiene tu tobi si naa ne Bixhoze'.

³⁹Bigueta ucala'dxi ca judíu ninaaze ca laabe, peru biree yaande be de ndaani ná ca'.

⁴⁰Uyé be cherica guiigu Jordán sti tiru, ra bizulú guluu nisa Juan binni. Ne biaana be raqué.

⁴¹Uyé stale binni ra nuu be, ne na ca': ―Nin ti milagru qué ñuni Juan, peru irá ni bizeete be de hombre ri la? irá ni dxandí'.

⁴²Ne stale binni bini cre Jesús raqué.