Read Isthmus Zapotec San Juan 11 Bible Online

San Juan 11 - Isthmus Zapotec bible

San Juan 11

¹Chiqué huará tobi hombre lá Lázaro, biza'na María ne Marta. Nabeza ca ndaani guidxi Betania.

²María, biza'na Lázaro ni huará que la? nga nga dxa gunaa ni bichá nisa rindá' naxhi ñee Señor ne bicuiidxi né ni guicha ique que.

³Bisenda tidxi iropa benda cabe Jesús huará Lázaro, xhamigu.

⁴Ora gunna Jesús ni la? na: ―Enda huará ni napa be ca la? cadi para guuti, sínuque para ihuinni enda nandxó' sti Dios ne sti Xiiñi'.

⁵Nadxii Jesús guionna cabe, Marta ne María ne Lázaro.

⁶Ne ora gunna be huará Lázaro, biaana be xhupa gubidxa ra nuu be que.

⁷De raqué rabi be ca discípulu stibe: ―Chuu Judea sti tiru.

⁸Para na ca rabi ca laabe: ―Maistru, ñee cadi cayuuya lu nase si ngue ucala'dxi ca judíu nuchá ca guie lii ne yanna nou' ibigueta lu raqué sti tiru la?

⁹Oraque rabi be laaca': ―Ñee cadi doce hora napa ti dxi la? Ni rizá ridxí la? qué rirenda gasti ñee purti naya'ni ra zizá.

¹⁰Peru ni rizá huaxhinni la? rirenda xiixa ñee, purti gasti biaani ra nuu.

¹¹Gudxi si be ngue laaca' para na be: ―Nisiaasi Lázaro xhamigu nu peru ma chaa', chi ucuaane laa.

¹²Oraque na ca discípulu stibe: ―Pa nisiaasi be la? Señor, zianda be.

¹³Peru qué ñene ca xi na be. Zácaxa ca cuzeete be nisiaasi si Lázaro, tihua cuzeete be ma guti.

¹⁴Oraque bisiá be stiidxa be, rabi be laaca': ―Ma guti Lázaro.

¹⁵Para laatu la? jma galán qué guinne raqué ti guni cre tu. Yanna chuu canu ra nuu be.

¹⁶Oraque na Tomás, ni rabi cabe Cuachi que, rabi ca xcaadxi discípulu que: ―Chuu, chu né laabe ti gati né nu laabe. Jesús rusibani gue'tu'

¹⁷Ora yendá be Betania ma raca tapa gubidxa de ga'chi Lázaro.

¹⁸Cadi zitu de Jerusalén riaana Betania, bia' chonna kilómetru si.

¹⁹Stale judíu yeizaca Marta ne María ra guti biza'na ca'.

²⁰Casi gunna Marta ma zidxiña be, biree yechagalú laabe, peru María biaana yoo.

²¹Ne na Marta rabi laabe: ―Pa ñuu lu rarí la? Señor, qué ñati di bizana'.

²²Peru laca nanna irá ni inaba lu lu Dios la? zudii lii.

²³Para rabi be laa: ―Zabani biza'na lu'.

²⁴Oraque na Marta: ―Nanna zabani be dxi iluxe guidxilayú, ra ibani irá binni.

²⁵Para na be: ―Naa nga rusibane gue'tu', ne naa nga rudiee enda nabani. Tu guni cre naa la? neca ma guti zabani,

²⁶ne cani nabani ru ne runi cre naa la? qué ziuu dxi gati'. Ru'nu cre nga la?

²⁷―Rune cre, Señor, na Marta. ―Ma bine cre lii nga Cristu, Xiiñi Dios ni beeda ndaani guidxilayú ri'. Ra biina Jesús

²⁸Ngue si uní' ne biree yení' xa diaga María benda, na: ―Nuu Maistru rarica', racala'dxi iní' né lii.

²⁹Oraqueca biasa uxooñe María, uyé ra nuu Jesús.

³⁰Ca'ru guiuu Jesús ndaani guidxi, nuu ru ra yechagalú Marta laa que.

³¹Ora bi'ya ca judíu ni yeganna laacabe ralidxi cabe que biree uxooñe María ze la? yenanda ca laabe, na ca ziguuna be ra ba'.

³²Peru casi yendá be ra nuu Jesús biiya be laa, bizuxibi be xa ñee, ne na be: ―Señor, pa ñuu lu rarí la? qué ñati di bizana'.

³³Ora bi'ya Jesús cayuuna be, laabe ne ca judíu zinanda laabe que, uyuu yuuba ladxidó' dede uca diti,

³⁴ne na: ―Paraa gudixhe tu Lázaro. ―Chuu, gu'yu', Señor, na cabe.

³⁵Biina Jesús óraque.

³⁶Para na ca judíu: ―Laguuya pabiá' gunaxhii be Lázaro.

³⁷Peru xcaadxi de laaca na: ―Bixhele be lú ni nacheepa lú. Ñee qué ñanda ñuni be xiixa para qué ñati Lázaro la? Ra bibani Lázaro

³⁸Bigueta uyuu yuuba ladxidó' be, ne uyé be ra ba' que. Casi ti cueva ni, ye'gu ti guie ruaa ni.

³⁹―Lacuee guie ca ruaa ni, na be. Para na Marta, biza'na ni guti que: ―Ma rindá' yuudxu be, Señor, purti ma napa be tapa gubidxa.

⁴⁰Oraque na Jesús rabi laa: ―Ñee cadi ma gudxe lii pa guni cre lu zuuyu pabiá' nandxó' Dios la?

⁴¹Ne óraque ulee cabe guie ye'gu ruaa ba' que. Undisa lú Jesús ibá', ne na: ―Rudiee diuxquixe lii, Bixhoze', purti bicaa dia'gu naa.

⁴²Nanna ca' qué riaana dxiu de ucaa dia'gu naa, peru unié sicarí pur ca binni ni rí rarí' ti guni cre ca lii biseenda lu naa.

⁴³Biluxe uní' né si be Bixhoze be, bicaa be ridxi: ―¡Lázaro, gudá' rarí'!

⁴⁴Oraque biree gue'tu que, renda lari ná ne ñee, ne ye'gu ti lari lú. Para na Jesús: ―Lauxhedxe laabe, ne laudii lugar che be. Udixhe cabe inaaze cabe Jesús

⁴⁵Stale de ca judíu ni yené María que, bini cre ca Jesús ra bi'ya ca ni guca que.

⁴⁶Peru xcaadxi de laacabe yetidxi ca fariseu xi bi'ni be.

⁴⁷Oraque gupa ca xaíque sti ca sacerdote ne ca fariseu ti junta, purti laaca nga justicia sti ca judíu, ne na ca': ―Xi guni nu pue. Biaa irá ni cayuni hombre ca.

⁴⁸Pa usaana nu laabe zacasi la? irá binni zuni cre laabe. Ne zeeda ca romanu zeda unitilú ca yu'du ro stinu ne xquidxi nu.

⁴⁹Lade cabe zeeda Caifás, naca sacerdote gola iza que. Ne óraque na rabi laacabe: ―Laatu qué ganna tu gasti'.

⁵⁰Qué riene tu pa jma galán para laanu gati tobi jlugar irá nu, ti cadi initilú irá binni xquidxi nu la?

⁵¹Peru cadi de laasi be uní' be ni. Purti naca be sacerdote gola iza que, nga runi bisiní' Dios laabe ni nexhe gaca'. Ne ni nexhe gaca nga gati Jesús pur ca binni xquidxi.

⁵²Ne cadi pur ca binni xquidxi si sínuque para guni irá xixé xiiñi Dios ni reeche ndase tobi si.

⁵³Ne dede dxi que uní' stiidxa cabe guuti cabe laabe.

⁵⁴Ngue runi ma qué ñanda nizá be lade ca judíu. Biree be de raqué uyé be ti guidxi huiini lá Efraín, dxaaga ni ti gui'xhi', ne raqué biaana né be ca discípulu stibe.

⁵⁵Ma zeda yuba pascua. Stale binni de ca guidxi huiini que uyé Jerusalén, yeguni ca casi cá lu ley stica guni ca para guia ladxidó' ca', laga ca'ru uzulú saa que.

⁵⁶Biyubi cabe Jesús raqué, ne ora nuu cabe ndaani yu'du ro', na cabe: ―Xi na tu. Nagana pa gueeda be saa ri nja'.

⁵⁷Maca bizaabi ca xaíque sti ca sacerdote ne ca fariseu diidxa', tutiica gu'ya laabe la? chi tidxi laaca para inaaze ca laabe.