Read Isthmus Zapotec San Juan 19 Bible Online

San Juan 19 - Isthmus Zapotec bible

San Juan 19

¹Oraque ucuaa Pilatu Jesús ne bicaa ca xpinni gudiñe laabe.

²Ne ucuaa ca soldadu que guichi, bizá' ca ti la'pa uluu ca ique be, ne bigacu ca laabe ti lari moradu.

³Bidxiña ca ra nuu be, na ca': ―¡Viva rey sti ca judíu! Ne cagapa ca lú be.

⁴Bigueta biree Pilatu uyé ra nuu ca judíu ne na rabi laaca': ―Laguuya', zeda nia laabe ra nuu tu, ti ganna dxichi tu qué idxela gasti donda luguiá be.

⁵Oraque biree be, nuu la'pa de guichi ique be ne nacu be lari moradu que. Para na Pilatu: ―Laguuya', rarí nuu hombre que.

⁶Ora bi'ya ca xaíque sti ca sacerdote ne ca gendarme laabe bicaa ca ridxi: ―¡Bicaa laabe lu cruz! ¡Bicaa laabe lu cruz! Para na Pilatu rabi laaca': ―Laicaa laabe laatu, laucaa laabe lu cruz, purti naa qué idxela gasti donda luguiá be.

⁷Oraque ucabi cabe: ―Napa du ti ley, ne según ley stidu la? naquiiñe gati be, purti bi'ni be laabe Xiiñi Dios.

⁸Ora bina diaga Pilatu xi na cabe, jma rusi bidxibi.

⁹Ne biuu ndaani palaciu que, na rabi Jesús: ―Padé lii. Peru qué nicabi Jesús.

¹⁰Para na Pilatu rabi laabe: ―Qué za'bu naa ni canaba diidxa lii ca la? Ñee qué gannu pa napa derechu ucaa lii lu cruz o undaa lii la?

¹¹Oraque rabi be laa: ―Qué ñuaa dia' ladxi ná lu pa qué niguixhe Dios ñaca ni zacá. Nga runi jma stale donda napa ni beda saana naa ra nuu lu' que lii.

¹²Dede óraque nisi biyubi Pilatu nundaa laabe, peru bicaa ca judíu ridxi: ―Pa undaa lu laabe la? cadi xhamigu diou' César, purti irá ni guni laa rey cadi nuu né César tobi si.

¹³Ne ora bina diaga Pilatu nga la? biree né laabe, yetí ra ribí para udxiiba donda ique binni, ti lugar ni lá Gabata.

¹⁴Bia'si pe viernes ndaani saa pascua cayaca irá ndi'. Bia' galaa dxi na Pilatu, rabi ca judíu: ―Rarí nuu rey stitu.

¹⁵Oraque bicaa cabe ridxi: ―¡Yené laabe! ¡Yeucaa laabe lu cruz! ―Rey stitu ucaa lu cruz la? na Pilatu. Para bicabi ca xaíque sti ca sacerdote: ―César si nga rey stidu, ne iruti ru'.

¹⁶Oraque ru bidii Pilatu Jesús laacabe, ucaa cabe lu cruz. Ucuá Jesús lu cruz

¹⁷Para ucuaa cabe Jesús yené cabe laa nua cruz sti', zé ti lugar lá La Calavera. Diidxa hebreu rabi cabe ni Gólgota.

¹⁸Ne raqué bicaa cabe laabe lu cruz, laabe ne xhupa, tobi cada ladu. Laabe nuu be galahui'.

¹⁹Ne bicaa Pilatu caadxi letra ro' ique cruz que. Sicarí na cani: “Jesús de Nazaret, Rey sti ca judíu.”

²⁰Stale de ca judíu biinda ni cá ique cruz que purti uriá guidxi ucuá be lu cruz, ne ucuá ca diidxa que hebreu, latín ne griegu.

²¹Ne na ca xaíque que rabi Pilatu: ―Cadi ucaa lu “Rey sti ca judíu” sínuque bicaa “Na be Rey sti ca judíu laabe.”

²²―Ni ma bicaa la? ma bicaa', na Pilatu.

²³Biluxe si bicaa ca soldadu que laabe lu cruz ucuaa ca xhaba be bi'ni ca ni tapa ndaa, tindaa cada tobi ca'. Peru túnica stibe que la? qué gapa ra di'ba', de ti ndaga si ni.

²⁴Para uní' stiidxa ca cadi icheza ca ni, sínuque cu' ca ni rifa, gu'ya ca tu cuee ni. Bi'ni cabe zaqué ti aca ni casi cá lu Xqui'chi Dios: “Gudiizi cabe xhaba', ne guluu cabe lari stinne lu rifa.” Ne nga pe nga bi'ni ca soldadu que.

²⁵Cue' cruz sti Jesús que, zuhuaa jñaa ne benda jñaa, ne María xheela Cleofas, ne María de Magdala.

²⁶Ora bi'ya Jesús zuhuaa jñaa raqué, ne biiya zuhuaa dxa discípulu ni nadxii que gaxha la? na rabi jñaa: ―Amá, racá zuhuaa xiiñi lu'.

²⁷Ne óraque rabi be discípulu que: ―Biiya, racá zuhuaa jñaa lu'. Ne dede óraque ucuaa discípulu que jñaa be zie né ralidxi. Ra guti Jesús

²⁸Biluxe si irá nga, nanna be ma biluxe xhiiña be para na be: ―Cayate nisa. Uní' be zacá ti iree ni casi cá lu Xqui'chi Dios.

²⁹Bia'si pe zuhuaa ti jarra huiini da' vinagre ndaani raqué para bigadxe cabe ti esponja ne bidxiiba cabe ni ique ti bara huiini sti ti yaga lá hisopo, guluu cabe ni ruaa be.

³⁰Güe' si be vinagre que, na be: ―Ma biluxe ni. Ne bisaba ique be, guti be. Bindizi ti soldado lanza xcustiá Jesús

³¹Viernes cayaca irá ndi ne qué na ca judíu guiaana ca cuerpu que lu cruz purti ma chi uzulú dxi enda riziila'dxi ne laca dxi ro' ni. Para yenaba cabe Pilatu iluuza ñee cani ucuá lu cruz que, ti ganda iree ca de raqué.

³²Oraque beeda ca soldadu, guluza ca ñee ni cá primé que, ne zaqueca ñee stobi que, de iropa hombre ni ucuá né Jesús lu cruz que.

³³Peru ora bidxiña ca ra nuu be, biiya ca ma guti be, ma qué niguza ca ñee be.

³⁴Peru bindizi tobi de ca soldadu que ti lanza xcustiá be, ne óraque biree rini ne nisa.

³⁵Ni bi'ya ra uca ni, ngue nga cayuí' ni, ne dxandí ni caní' be. Laabe nanna be caní' be ni dxandí ti laatu laca guni cre tu.

³⁶Ne zacá uca ni ti iree ni casi cá lu Xqui'chi Dios ra na: “Qué zaluuza dxita stibe.”

³⁷Laca nuu sti lugar ra na: “Zuuya dxí cabe ni bindizi cabe lanza.” Ra bigaachi Jesús

³⁸Guca si nga la? uyé José de Arimatea, yenaba permisu ra nuu Pilatu pa ziné cuerpu sti Jesús. Naca José discípulu sti Jesús peru naga'chi purti ridxibi ca judíu. Ne uná Pilatu bidii ni laabe, para yendete be ni.

³⁹Laca uyé Nicodemo yené bia' ti gayuaa libra mirra nucha áloes, dxa Nicodemo uyé ra nuu be lu gueela que.

⁴⁰Ucuaa cabe xcuerpu Jesús bichenda cabe ti lari ne guluu cabe caadxi guixi ni rindá' naxhi ndaani lari que. Para bicaachi cabe laa casi rigaachi ca judíu.

⁴¹Nuu ti le' de yaga guie' ra ucuá Jesús lu cruz que, ne ndaani le' que nuu ti ba' cubi iruti huaya'ta ndaani'.

⁴²Raqué gula'qui cabe Jesús purti ma chi uzulú dxi enda riziila'dxi', ne nuu ba' que gaxha.