Read Isthmus Zapotec San Juan 3 Bible Online

San Juan 3 - Isthmus Zapotec bible

San Juan 3

¹Chiqué uyuu tobi hombre de ca fariseu lá Nicodemo. Naca be tobi de ca xaíque sti ca judíu.

²Ti gueela uyé be ra nuu Jesús ne rabi be laa: ―Maistru, nanna du lii nga maistru ni beeda de Dios purti iruti ñanda ñuni ca milagru ni ru'nu ri pa ñaca cadi nuu né Dios laa.

³Para na Jesús rabi laabe: ―Gabe ca' lii, tu qué gale sti tiru la? qué zanda di chu' ra runi mandar Dios.

⁴Oraque na be: ―Ximodo zanda gale ti hombre ora ma huaniisi ya'. Zanda xa guiuu ndaani jñaa ne gale sti tiru.

⁵Bigueta na Jesús rabi laabe: ―Gabe ca' lii, tu qué gale de nisa ne de Espíritu, qué zanda di chu' ra runi mandar Dios.

⁶Ni gale de cuerpu la? cuerpu laa, ne ni gale de Espíritu la? espíritu laa.

⁷Cadi idxagayaa lu ti rabe lii naquiiñe gale tu sti tiru.

⁸Bi rundubi ladu tiisi ne runa diaga lu rixidxi, peru qué gannu padé zeeda nin paraa che'. Zacaca nga irá tu gale de Espíritu.

⁹Oraque na be: ―Ximodo zanda gaca ndi ya'.

¹⁰Para na Jesús rabi laabe: ―Lii naca lu ti maistru sti ca binni Israel ne qué riene lu ni la?

¹¹Gabe ca' lii riní du de ni nanna du, ne rui né du laatu ni bidu'ya du, peru qué runi cre tu ni rabi du laatu.

¹²Pa huayabe laatu cosa de guidxilayú ne qué runi cre tu la? ximodo ñanda ñuni cre tu pa ñabe laatu cosa de ibá' ya'.

¹³Iruti huagui'ba ibá' pa cadi ni biete de ibá' ne nga nga Hombre Biseenda Dios, ne ibá' nga jlugar be. Ne naa nga Hombre Biseenda Dios que.

¹⁴Cásica gundisa Moisés beenda ndaani gui'xhi chiqué, zaqueca nga naquiiñe indisa cabe Hombre Biseenda Dios,

¹⁵ti irá ni guni cre laabe, cadi initilú sínuque gapa enda nabani ni qué zaluxe. Nadxii Dios binni guidxilayú

¹⁶Purti nadxii xhaata Dios binni guidxilayú ngue runi bidii tobi lucha Xiiñi', ti irá tu guni cre Xiiñi be que la? cadi initilú sínuque gapa enda nabani ni qué zaluxe.

¹⁷Biseenda be Xiiñi be guidxilayú cadi para udxiiba donda ique binni, sínuque para ilá binni pur laa.

¹⁸Tu runi cre Xiiñi be que la? qué zagui'ba donda ique, peru tu qué runi cre Xiiñi be que la? maca dxi'ba donda ique purti qué runi cre tobi lucha Xiiñi be.

¹⁹Ma dxi'ba donda ique cani qué runi cre purti beeda biaani guidxilayú peru jma gunaxhii ca guelacahui que biaani, purti malu ni runi ca'.

²⁰Irá ni runi ni cadi jneza la? nanala'dxi biaani' ne qué zie ra naya'ni ti cadi ihuinni ni runi.

²¹Peru ni runi jneza la? zie ra nuu biaani ti gu'ya irá xixé binni zeeda dxiiña sti de Dios. Jesús ne Juan

²²Udi'di si ngue la? yené Jesús ca discípulu sti Judea, ne biaana né be laaca raqué, ne uluu nisa be binni raqué.

²³Juan laca caguu nisa ti lugar lá Enón gaxha de Salim purti raqué da' zia' nisa, ne cadxiña cabe laabe ne caguu nisa be laaca'.

²⁴Ca'ru guieguyoo be dxi que.

²⁵Ucuaa yú né ca discípulu sti Juan caadxi judíu tu jma riquiiñe enda riguu nisa sti', sti Juan la? o sti Jesús.

²⁶Ne uyé ca ra nuu Juan, na ca rabi ca laabe: ―Maistru, ma caguu nisa dxa hombre ni uyuu né lii cherica Jordán, dxa ni byuí' lu stiidxa que, ne irá binni cayé ra nuu.

²⁷Para na be rabi be laaca': ―Qué zanda icaa binni gasti pa qué gueeda ni de ibá'.

²⁸Laaca tu nanna tu unié cadi naa dia' nga Cristu, sínuque bisá niru si Dios naa lú be.

²⁹Ra ti enda xheela nabé rieche xhamigu novio ni zuhuaa raqué cucaa diaga ni caní' novio. Zacaca nga ma cayeche yanna.

³⁰Cada dxi naquiiñe quiba be jma ne naa guiete'. Ni beeda de ibá'

³¹Jma risaca ni beeda de ibá' que irá xixé binni. Ni za de guidxilayú la? binni guidxilayú laa, ne rui' stiidxa guidxilayú, peru ni beeda de ibá' la? laa huaxa jma risaca que irá xixé binni.

³²Ne rui' né be binni ni bi'ya be ne ni bina diaga be, ne iruti runi cre laabe.

³³Peru ni ricaa stiidxa be la? riní' de idubi ladxidó' ni runi Dios nga jneza.

³⁴Ni biseenda Dios la? rui' stiidxa Dios, purti ruchá Dios ladxidó' de Espíritu Santu.

³⁵Nadxii Dios Xiiñi, ne ma gudixhe irá xixé lu ná Xiiñi'.

³⁶Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiá'.