Read Isthmus Zapotec San Juan 7 Bible Online

San Juan 7 - Isthmus Zapotec bible

San Juan 7

¹Gudi'di si ca nga la? uzá Jesús Galilea, ne qué niná ñe Judea, purti canananda ca judíu guuti laa.

²Ne ma zeda yuba saa sti ca judíu, saa ra rucuí cabe ranchu huiini para guiaana cabe ndaani'.

³Para na ca bi'chi be rabi laabe: ―Xiñee qué ireeu de rarí', cheu' Judea ti gu'ya cani rizá neu irá ni ru'nu'.

⁴Purti qué runi cabe xiixa naga'chi pa racala'dxi cabe ganna binni tu laacabe. Pa dxandí runi lu cani la? biluí' irá binni xi ru'nu'.

⁵Uní' ca zaqué purti nin laaca qué runi cre ca laabe.

⁶Para rabi be laaca': ―Ca'ru idxiña hora usihuinne tu naa. Peru laatu la? ora tiisi ñanda nusihuinni tu tu laatu.

⁷Purti qué raca nanala'dxi binni guidxilayú laatu, peru naa la? raca nanala'dxi cabe naa, purti rabe laacabe cadi jneza ni runi cabe.

⁸Laché saa ca laatu. Qué ziaa dia' saa ca purti ca'ru ganda hora usihuinne tu naa.

⁹Ngue si gudxi be laaca', ne biaana ru be raqué. Ra yegapa Jesús saa

¹⁰Peru biree si ca bi'chi be ze la? laca uyé be saa que, cadi para gu'ya binni laabe, sínuque biuu be raqué naga'chi'.

¹¹Biyubi ca judíu laabe ndaani saa que na ca': ―Paraa nuu dxa hombre que.

¹²Stale de ca binni nuu ra saa que nisi stiidxa be cayuí' ca', peru dxidxigá cayuí' ca ni. Nuu tu na: “Nacha'hui be.” Ne nuu tu na: “Co', canaguite si be binni.”

¹³Uní' cabe ni dxidxigá purti cadxibi cabe ca judíu.

¹⁴Ma udi'di chupa chonna gubidxa de cayaca saa que biuu Jesús ndaani yu'du ro' ne bizulú bisiidi'.

¹⁵Ne nabé bidxagayaa ca judíu, ne na ca': ―Ximodo biziidi be irá ni nanna be ri sin ñuu tu nusiidi laabe.

¹⁶Para rabi be laaca': ―Cadi naa dia' gudixhe ni rusiide', sínuque rusiide ni gudixhe ni biseenda naa.

¹⁷Cani racala'dxi guni ni na Dios la? zanna pa dxandí stiidxa Dios cusiide o pa stinne'.

¹⁸Ni riní' de laa si la? ruyubi usisaca binni laa, peru ni ruyubi usisaca ni biseenda laa la? ngue huaxa qué rusiguii ne qué runi ni cadi jneza.

¹⁹Ñee cadi bidii Moisés laatu ley para ñuni tu ni na la? peru qué runi tu ni na ni. Yanna xiñee racala'dxi tu guuti tu naa.

²⁰Oraque na ca binni que rabi laabe: ―Caguite binidxaba ique lu'. Tuu nga nou' racala'dxi guuti lii.

²¹Para rabi be laaca': ―Tisi bine ti milagru la? irá xixé tu cadxagayaa tu.

²²Gudxi Moisés laatu cu' tu seña sti Dios ca xiiñi tu, casi bi'ni ca bixhoze gola tu. Ne runi tu ni, neca guiaba ni dxi enda riziila'dxi'.

²³Yanna pa para cadi uchee né tu ley sti Moisés runi tu ni neca dxi enda riziila'dxi la? xiñee ga bidxiichi né tu naa tisi bisianda ti hombre dxi enda riziila'dxi ya'.

²⁴Cadi casi ze tu udxiiba tu donda ique binni, sínuque laguuya chaahui ti ganna tu uná nga ni jneza. Ra uní' Jesús tu biseenda laa

²⁵Oraque biree caadxi binni Jerusalén na: ―Ñee cadi laabe nga ni cuyubi cabe guuti cabe que la?

²⁶Laguuya', rarí nuu be caní' be nezalú irá binni ne cadi cayabi cabe laabe gasti'. Ñee na tu ma runi cre ca xaíque dxandí Cristu laabe la?

²⁷Nagana huiini', purti nanna nu padé laabe, ne dxi gueeda Cristu la? iruti zanna padé gueeda.

²⁸Oraque jma rusi reciu uní' Jesús ra cusiidi que, na: ―Runibiá' tu naa ne nanna tu padé naa. Peru cadi stube sia' benda', sínuque nuu tu biseenda naa, ne laabe nga dxandí Dios, ne qué runibiá' tu laabe.

²⁹Peru naa runebia'ya laabe purti de laabe zenda', ne laabe biseenda be naa.

³⁰Oraque gucala'dxi cabe ninaaze cabe laabe, peru iruti niguu ná laabe, purti ca'ru idxiña xhiora be.

³¹Ne stale de ca binni que bini cre ca laabe ne na ca': ―Ora gueeda Cristu, lácaxa zanda guni jma milagru que ni cayuni be ri'. Ucala'dxi cabe ninaaze cabe Jesús

³²Bina diaga ca fariseu caní' ca binni que de Jesús zaqué para uyuu né ca ca xaíque sti ca sacerdote tobi si. Ne biseenda ca caadxi gendarme ninaaze laabe.

³³Oraque na be: ―Ma nagaba si dxi nuaa nia laatu, purti ma chaa ra nuu ni biseenda naa.

³⁴Zuyubi tu naa peru qué zadxela tu naa, ne qué zanda di che tu ra chaa ca.

³⁵Oraque na ca judíu: ―Paraa nda nga na be che be ma qué zadxela nu laabe ya nja'. Ñee che be ra nuu ca judíu ni reeche lade cani cadi judíu para usiidi be laaca la?

³⁶Xiñee na be zuyubi nu laabe ne qué zadxela nu laabe ne qué zanda chuu nu ra che be ya'. Nisa ni rusibani

³⁷Dxi ma para iluxe saa, o gabi nu laní que, bizuhuaa Jesús ne bicaa ridxi na: ―Pa nuu tuuxa cayati nisa la? gueda gue ra nuaa'.

³⁸Ni guni cre naa la? zaca casi cá lu Xqui'chi Dios, de ndaani ladxidó' zandani nisa ni rudii enda nabani.

³⁹Rarí cuzeete Jesús Espíritu Santu ni icaa irá ni guni cre laa, peru dxi bizeete be ni la? ca'ru gueeda Espíritu Santu, purti ca'ru ibigueta be ibá'. Ra udinde diidxa cabe pur Jesús

⁴⁰Ne ora bina diaga caadxi binni de cani nuu raqué xi na be la? na ca': ―Ndi nga dxandí pe profeta que.

⁴¹Ne xcaadxi na: ―Laabe nga Cristu. Peru nuu xcaadxi na: ―Lácaxa de Galilea gueeda Cristu.

⁴²Ñee cadi cá lu Xqui'chi Dios za be de David, ne zeeda be de Belén xquidxi David la?

⁴³Ne zacá gudinde diidxa cabe pur laabe, adxé ni na tobi ne adxé ni na stobi.

⁴⁴Ne ucala'dxi caadxi de laacabe ninaaze ca laabe, peru iruti niguu ná laabe. Qué ñuni cre ca xaíque Jesús

⁴⁵Ne ora bigueta ca gendarme que, na ca xaíque sti ca sacerdote ne ca fariseu rabi laaca': ―Xiñee qué ñedané tu laabe.

⁴⁶Para na ca': ―Qué huayuu dxi chu' tuuxa iní' casi riní' hombre que.

⁴⁷Oraque na ca fariseu: ―Ñee dede laatu ma udxite be la?

⁴⁸Lácaxa nuu neca tobi de ca xaíque o ca fariseu ni ma bini cre laabe.

⁴⁹Ca binni ni rí raqué, ni qué ganna ley la? dí nuu ca'.

⁵⁰Lade ca xaíque que zeeda Nicodemo ni uyé ra nuu Jesús huaxhinni que. Ne óraque na:

⁵¹―Ñee na ley stinu jneza udxi'ba nu donda ique tuuxa sin ucá' diaga nu laa, ganna nu xi bi'ni la?

⁵²Para rabi cabe Nicodemo: ―Ñee laca binni Galilea lii la? Biyubi gu'yu qué ziuu dxi iree ti profeta Galilea.

⁵³Biluxe si uní' cabe ngue la? cada tobi biree zibí'.