Read Isthmus Zapotec Hechos 12 Bible Online

Hechos 12 - Isthmus Zapotec bible

Hechos 12

¹Ca dxi que bizulú rey Herodes bininá caadxi de ca xpinni Cristu.

²Gucuaa be Jacobo bi'chi Juan, biiti be laa ne espada.

³Ne ora bi'ya be uyuula'dxi ca judíu ni bi'ni be que la? laca unaaze be Pedru. Ne uca ni dxi ro cabe pan sin levadura que.

⁴Gunaaze si be laa biseguyoo be laa ne gudixhe be tapa tanda soldadu gapa laa, de tapa tapa. Cá ique be cuee be laa nezalú irá binni guidxi que, tidi si pascua.

⁵Zacá nga cayapa cabe Pedru ndaani lidxi guiiba'. Peru ca xpinni Cristu cadi cayaana dxí ca de iní' né ca Dios pur laabe. Ra bilá Dios Pedru ndaani lidxi guiiba'

⁶Huaxhinni ma para irá gueela cuee Herodes laabe que, nexhe be nisiaasi be lade chupa soldadu, liibi be cadena. Ne laca zuhuaa soldadu cayapa ra puerta lidxi guiiba que.

⁷Mala bizuhuaa ti ángel sti Señor ndaani lidxi guiiba que, ne bizaani ti biaani raqué. Ne guda'na ángel que cue' ti'xhi be bicuaani laabe, na: ―Biasa guiuba. Oraque biaba ca cadena liibi ná be que.

⁸Para na ángel que rabi laabe: ―Bixhii dxiichi ndaanu ne bicaa xquela guidi lu ñee lu'. Biluxe si be, na rabi laabe: ―Birenda xhamarra lu', dananda naa.

⁹Biree be zinanda be ángel que, peru qué ganna be pa dxandí ni o pa caní' xcaanda si be ngue.

¹⁰Udi'di cabe chupa lugar ra cayapa soldadu ne ora yendá cabe ra puerta de guiiba' ma para iree cabe lu calle, bixele stubi puerta que para biree cabe. Udi'di cabe ti calle. Raqué bixele ángel que de laabe.

¹¹Oraque ru sica ni bibani uca be, na be: ―Yanna ma nanna dxandí biseenda Señor ángel sti' beda ulá naa lu ná Herodes ne de irá ni ucala'dxi ca judíu ñuni naa.

¹²Ne ora bi'ya be ngue ni la? uyé be ralidxi María, jñaa Juan ni rabi cabe Marcu. Raqué nuu stale binni caní' né Dios.

¹³Ora yendá be bixhidxi ná be ra zaguán. Bina diaga ti badu dxaapa lá Rode para biree ziguuya tu cuxhidxi ná'.

¹⁴Ne ora binibiá' stidxi be, de tantu cayeche qué nuxhele', laga bigueta uxooñe'. Yetidxi ca binni que zuhuaa be ra puerta'.

¹⁵Peru na ca binni que rabi laa: ―Cayaca ique lu nga. ―Co', na, ―dxandí ni. Oraque na ca': ―Seguru xpisi be nga.

¹⁶Peru laabe cadi cayaana dxí be de cuxhidxi ná be. Ne ora bixhele ca biiya ca laabe ni, bidxibi ca'.

¹⁷Peru bi'ni be seña lu ca igani ca'. Ne byuí' né be laaca modo ulee Señor laabe de ndaani lidxi guiiba', ne rabi be laaca': ―Lagüí' né ni Jacobo ne ca xcaadxi hermanu. Ne óraque biree be ze be sti ladu.

¹⁸Ora birá gueela hueru hueru uyuu ca soldadu, qué ganna ca xi uca Pedru.

¹⁹Biyubi Herodes laabe irá ladu. Biiya si qué nidxela laabe unaba diidxa ca soldadu que, ne ora na ca qué ganna ca la? biseenda guuti be laaca'. Ne biree be Judea, yendeza be Cesarea. Ra guti Herodes

²⁰Nuu dxiichi né Herodes ca binni Tiro ne Sidón. Peru laaca uyuu ca tobi si para idxiña ca ra nuu be. Ne uní' né ca Blasto, ti xpinni be, cuee xiana laabe ti chu' né be laaca tobi si, purti de xquidxi be reeda endaró stica'.

²¹Para gudixhe be ti dxi gu'ya be laaca'. Ne dxi gunda dxi que bizuchaahui be, gurí be ra ribí be para guni mandar be ne uluu be ti discursu.

²²Oraque bicaa ca binni que ridxi bidxiiba ca laabe, na ca': ―Dios nga ni caní' ca, cadi binni.

²³Nin ca'ru iluxe iní' be, bini huará ti ángel laabe purti qué nusisaca be Dios. Biguidxi be bicuti' dede ra guti be.

²⁴Peru stiidxa Dios jma rusi careeche, ne cayuí' cabe ni irá ladu.

²⁵Biluxe si xhiiña Bernabé ne Saulo Jerusalén bigueta ca' ne yené ca Juan ni rabi cabe Marcu que.