Read Isthmus Zapotec Hechos 16 Bible Online

Hechos 16 - Isthmus Zapotec bible

Hechos 16

¹Ra canazá cabe que yendá cabe Derbe. Biree cabe raqué uyé cabe Listra. Raqué biiya cabe ti xpinni Cristu lá Timoteu. Jñaa be la? judíu laa ne ma runi cre Cristu, peru bixhoze be cadi judíu.

²Irá ca hermanu de Listra ne de Iconio ruzeete pabiá' nacha'hui be.

³Na Pablu chiné laabe, para ucuaa laabe guluu seña sti Dios laabe ti qué gapa ca judíu ni nuu neza que xi iní', purti nanna ca cadi judíu bixhoze be.

⁴Oraque biree cabe ze cabe. Ne irá guidxi ra udi'di cabe byuí' né cabe ca binni que ni gudixhe ca apóstol ne ca hermanu gola ni nuu Jerusalén guni ca xpinni Cristu.

⁵Zacá jma bizuhuaa chaahui ca xpinni Cristu, ne ze dxi jma zidale ca'. Ra gudxi Dios Pablu che Macedonia

⁶Uzá cabe Frigia ne Galacia, ne udi'di cabe Asia peru qué niná Espíritu Santu ñui' cabe stiidxa Dios raqué.

⁷Ora yendá cabe ra ruzulú Misia, ucala'dxi cabe ñe cabe Bitinia, peru laca qué niná Espíritu sti Jesús.

⁸Para udi'di cabe uriá Misia, uyé cabe Troas.

⁹Ne huaxhinni que casi ñaca lu bacaanda biiya Pablu zuhuaa tobi hombre de Macedonia canaba laa che raqué chi acané laaca'.

¹⁰(Ne naa nuaa raqué.) Ne casi bi'ya be ni biluí' Dios laabe que, gudixhe chaahui du stidu para chuu du Macedonia purti rabi du cabidxi Dios laadu chuu du raqué, chi güi né du ca binni que stiidxa Cristu. Ra nuu cabe Filipos

¹¹Para biré' du de Troas. Ucuaa du ti barcu uyuu du derechu isla Samotracia. Sti dxi que yendá du Neápolis.

¹²Ne biete du raqué para uyuu du Filipos, ti guidxi ni jma dxi'ba ca xcaadxi guidxi sti Macedonia ni nuu neza que. Ca romanu naaze guidxi que. Biaana du raqué xadxí huiini'.

¹³Ti dxi enda riziila'dxi biré' du de ndaani guidxi que, uyuu du ra guiigu ra rie ca judíu riní' né Dios. Ma nuu caadxi gunaa raqué yendá du, para byuí né du laaca stiidxa Jesús.

¹⁴Lade cabe nuu ti gunaa de Tiatira lá Lidia rutoo lari cha'hui color moradu. Cadi judíu laabe peru maca rusisaca be Dios, ne dxi que bicuudxi Dios ladxidó' be para gucuaa be stiidxa Pablu.

¹⁵Ne uyuu nisa be, laabe ne irá ca binni lidxi be. Oraque rabi be laadu: ―Pa na tu dxandí ma bine cre Señor la? latá' guiaana tu ralidxe'. Ne tantu cá be lu du la? biaana du. Ra yeguyoo cabe

¹⁶Ti dxi biré' du ziní né du Dios, beda nanda ti badu dxaapa laadu, nuu né binidxaba'. Nabé runi ganar para xpixuaana', purti runi sertá ni inaba diidxa binni laa.

¹⁷Uzá nanda be laadu, ziyuni be ridxi, na be: ―Xhiiña Dios ni nandxó' cayuni ca hombre ri', ne zeda güi né ca laatu modo ilá tu, rabi be ca binni que.

¹⁸Zaqué uzá nanda be laadu stale dxi, peru bixhacala'dxi si Pablu de canananda be laa la? bidxigueta lú ne na rabi binidxaba que: ―Cayabe lii usaana lu badu dxaapa ca, casi ñabi Jesucristu ni lii. Oraqueca bisaana binidxaba que laabe.

¹⁹Peru ora bi'ya ca xpixuaana be ma qué zanda guni ganar né ru ca laabe la? unaaze ca Pablu ne Silas yené ca ra nuu justicia.

²⁰Ne ora yendá ca raqué, na ca': ―Canayuni yaya ca judíu ri ndaani xquidxi nu.

²¹Cusiidi cabe costumbre ni cadi jneza icaa nu chi nanda nu purti romanu laanu.

²²Ne óraque biasa irá binni que luguiá Pablu ne Silas. Ne ucuaa ca justicia que laacabe ulee ca lari ladi cabe ne bini mandar ca chu' cabe palu.

²³Biluxe si guluu ca palu laacabe biseguyoo ca laacabe ne gudxi ca ni rapa ra lidxi guiiba que gapa chaahui laacabe.

²⁴Para ucuaa ngue laacabe uluu laacabe dede últimu cuartu sti lidxi guiiba que. Ne uluu ñee cabe lade chupa yaga rabi cabe cepu.

²⁵Bia' galaa gueela caní' né cabe Dios ne cayuunda né cabe laa. Cucaa diaga ca xcaadxi presu que laacabe.

²⁶Mala uca ti xu ro' dede biniibi dxacha raqué ne bixele irá ca puerta sti lidxi guiiba que. Ne bindaa cadena liibi irá cabe.

²⁷Ora bibani ni rapa ra lidxi guiiba que, biiya ma zuxele irá puerta stini, ulee espada ucala'dxi ñuuti laca laa. Zácaxa ma bixooñe irá presu.

²⁸Peru óraque bicaa Pablu ti ridxi, na rabi laabe: ―Cadi guniná lu laca lii, irá du nuu du rarí'.

²⁹Para unaba be ti biaani ne biuu uxooñe be ndaani lidxi guiiba que. Dede cayaca diti be gudiche xibi be xa ñee Pablu ne Silas.

³⁰Ne ulee be laaca de raqué rabi be laaca': ―Biche ca', xi gune para ila'ya'.

³¹Para na ca rabi ca laabe: ―Bini cre Señor Jesucristu ne zalá lu', lii ne ca binni li'dxu'.

³²Ne byuí' né ca laabe stiidxa Señor, laabe ne irá ni nabeza ralidxi be.

³³Lu gueela queca ucuaa be laaca', udiibi be ra ucaná laaca', ne óraque uyuu nisa be, laabe ne ca binni lidxi be.

³⁴Oraque yené be laaca ralidxi be bidii be ni gudó xhi ca'. Nabé bieche cabe, laabe ne idubi xfamilia be, purti ma bini cre cabe Dios.

³⁵Ora birá gueela biseenda justicia gendarme, chi tidxi ni rapa lidxi guiiba que cuee Pablu ne Silas.

³⁶Oraque na hombre que rabi Pablu: ―Bisenda tidxi ca justicia cuee laatu. Yanna lairee. Laché, chiné Dios laatu.

³⁷Peru na Pablu: ―Ucuaa cabe laadu, udiñe cabe laadu nezalú irá binni sin ñuuya chaahui cabe pa dxandí cuché' du, ne uluu cabe laadu ndaani lidxi guiiba', naca nda du romanu. Ne yanna ma racala'dxi cabe cuee cabe laadu naga'chi la? Qué zaré' di du dede qué gueeda cabe, laa pe cabe, gueda ndee cabe laadu.

³⁸Para bigueta ca gendarme que, yetidxi ca ca justicia xi na cabe. Nabé bidxibi ca ora gunna ca romanu laacabe.

³⁹Para uyé ca ra nuu cabe yenaba ca perdón laacabe. Oraque ulee ca laacabe ne na ca guni cabe favor iree cabe de guidxi que.

⁴⁰Ora biree cabe de lidxi guiiba que uyé cabe ralidxi Lidia guridxi cabe ca hermanu ne gudxi cabe laaca cadi cui sa ca atrá. Oraque ru biree cabe ze cabe.