Read Isthmus Zapotec Hechos 28 Bible Online

Hechos 28 - Isthmus Zapotec bible

Hechos 28

¹Ora ma irá du nuu du lu yuxi que, gunna du Malta lá isla que.

²Nabé nacha'hui uca ca binni raqué ne laadu. Bi'ni ca ti gui purti nananda raqué ne cayaba nisa guie. Ne guridxi ca laadu idxiña du cue' gui que idxaa du.

³Bitopa Pablu chupa ndaa yaga bidxi uluu lu gui que. Ne ora unaaze gui ni, biree yaande ti beenda', ucuá lu ná be.

⁴Ora bi'ya ca binni raqué nanda beenda que lu ná be, na ca': ―Señaladu huayuuti hombre ca binni. Neca bilá be ndaani nisadó' peru ma chi gati be para quixe be ni nuzaabi be.

⁵Peru udxibi ná be, biaba beenda que lu gui, ne gasti qué ñaca be.

⁶Irá ca cabeza si ca idxá be gui o mala guiaba be gati be. Peru xadxí uleza ca ne biiya ca gasti qué ñaca be. Oraque ma adxé ni na ca', ma na ca ti dios laabe.

⁷Gaxha de ra cadxaa du que nuu layú sti Publio ni runi mandar isla que. Gudxi be laadu chuu du ralidxi be. Nabé bilabi be laadu ne biaana du raqué chonna gubidxa.

⁸Ca dxi que pe huará bixhoze be, nexhe né xindxá' ne yuba ndaani'. Para uyé Pablu ra nuu, ne biluxe si uní' né Dios ula'qui ná luguiá be, bisianda laabe.

⁹Ora gunna ca binni que ni la? bedané ca stale binni huará, ne laca bianda ca'.

¹⁰Ne bisiga'de ca laadu stale cosa. Ne zaqueca ora ma chuu du, bidxiiba ca irá ni iqui'ñe du lu barcu. Ra yendá Pablu Roma

¹¹Ma udi'di chonna beeu de nuu du raqué, ucuaa du ti barcu de Alejandría ni bitiidi ca beeu nanda raqué. Punta barcu que cá chupa bidó', Cástor ne Pólux.

¹²Yendá du puertu Siracusa ne biaana du raqué chonna gubidxa.

¹³De raqué biré' du uzá du lu nisa ti uriá ti uriá dede yendá du Regio. Sti dxi que bizulú bindubi ti bi nisa, ne lu sti dxi que yendá du Puteoli.

¹⁴Raqué bidxaaga du caadxi hermanu ne unaba ca laadu guiaana né du laaca ti semana. De raqué biré' du ziuu du Roma.

¹⁵Gunna ca hermanu de Roma ma zidxiña du para yendeza ca laadu. Caadxi beda ndeza laadu Apio ne xcaadxi biaana Tres Tabernas. Ora bi'ya Pablu laacabe, bidii diuxquixe Dios ne bieche ladxidó'.

¹⁶Ora yendá du Roma bisaana capitán ziné laadu que irá presu lu ná xaíque sti ca soldadu de raqué. Peru bisaana cabe Pablu ndaani ti yoo, laa si ne ti soldadu cayapa laa. Ra byui' Pablu stiidxa Cristu Roma

¹⁷Lu chonna gubidxa de yendá du, guridxi Pablu ca xaíque sti ca judíu de raqué. Ne ora bidxiña ca rabi be laaca': ―Biche ca', qué huachee nia dia' ca binni xquidxi nu, nin ni bisaana ca bixhoze gola nu guni nu. Peru unaaze cabe naa Jerusalén, bitiidi cabe naa lu ná ca romanu.

¹⁸Ne unaba diidxa ca romanu naa ximodo ni. Ne ora bi'ya ca qué gapa donda para gate la? ucala'dxi ca nundaa ca naa.

¹⁹Peru qué niná ca binni laanu. Ngue runi gupa xidé unaba tide lu ná César neca qué gapa xi pur cuaa xqueja ca binni xquidxe'.

²⁰Ne guridxe laatu para guuya laatu, ne para güe nia laatu diidxa'. Liibe cadena ri purti rune cre ma beeda dxa ni cabeza irá xixé judíu.

²¹Oraque na ca rabi ca laabe: ―Qué huacaa du gasti gui'chi de Judea ra nuzeete ca lii, nin ca binni laanu de raqué ni beeda rarí qué niní' ca pa cuchee lu'.

²²Peru racala'dxi du ucá' diaga du lii, xi na lu'. Purti irá ladu caní' cabe religión cubi ri.

²³Para gudixhe cabe ti dxi gaca ni. Ne ora gunda dxi que bidxiña stale binni ra nabeza be. Bizulú be siadó' ne dede bidxí layú cayuí' né be laaca de enda runi mandar sti Dios. Biquiiñe be ni bicaa Moisés ne ni bicaa ca profeta para ucuudxi be laaca guni cre ca Cristu.

²⁴Nuu caadxi ucuaa ni uní' be que, peru nuu xcaadxi qué ñuni cre.

²⁵Ma qué ñuu ca tobi si ne bizulú ca caree ca'. Para na be rabi be laaca': ―Rarí pe nga riaba ni bisiní' Espíritu Santu profeta Isaías chiqué ra na:

²⁶Uyé ra nuu ca binni quene gudxi laaca zuna diaga ca peru qué ziene ca',ne zuyubi lú ca peru qué zuuya ca'.

²⁷Purti ma biguidxi ladxidó' ca',ne ma biseegu ca diaga ca'.Ne biseegu ca lú cati cadi gu'ya ca ne guna diaga ca',ti cadi guiene ca', uyubi ca naa para ula'ya laaca', na Dios.

²⁸Oraque na Pablu: ―Laganna dxichi ma cucheeche Dios stiidxa lade cani cadi judíu ti ganna ca ximodo ilá ca'. Ne laaca huaxa zucaa diaga ca'.

²⁹Ora bina diaga cabe ni uní' Pablu ca, birá cabe biree cabe zicaa yu cabe ni lade cabe.

³⁰Chupa iza biaana Pablu raqué ndaani yoo caguixe que, ne bieche né irá ni yeganna laa.

³¹Tutiica byuí' né be de enda runi mandar sti Dios ne stiidxa Señor Jesucristu. Iruti nibee laabe de ñuni be ni.