Read Isthmus Zapotec Romanos 11 Bible Online

Romanos 11 - Isthmus Zapotec bible

Romanos 11

¹Lagabi naa, ñee ma bisaana Dios ca judíu, ca xpinni pe la? Qué ziuu dxi. Naa laca judíu naa, binni Israel. Zaya de Abraham, de xfamilia Benjamín.

²Ne nanna cadi cusaana Dios xpinni, cani maca ulí dede chiqué. Ñee qué ganna tu xi na lu Xqui'chi Dios ra ruzeete ni Elías la? Cá ra uluu Elías xqueja ca binni Israel lu Dios, na:

³“Señor, ma biiti cabe ca profeta stiu' ne ma binidé cabe ca altar stiu'. Yanna ma naa sia' biaana', ne laca racala'dxi cabe guuti cabe naa.”

⁴Nga ni uní' profeta Elías, peru xi gudxi Dios laabe óraque. Na Dios:Neca ma bi'ni cabe irá nga,peru ma ulee chua gadxe mil hombre para naa,cani ca'ru uzuxibi xañee bidó' Baal.

⁵Nga ni guca chiqué, peru yanna ri laca riaana ru caadxi judíu ni ulí Dios pur enda nacha'hui sti'.

⁶Ulí be laaca purti guca be nacha'hui ne laaca', ne cadi pur ni bi'ni ca'. Pa ñaca nibí be laaca pur ni bi'ni ca la? ma cadi enda rilasela'dxi di nga.

⁷Xi riaana xa ni ya'. Cadi idubi guidxi Israel gucuaa ni biyubi, peru cani ulí Dios la? ca ngue huaxa ucuaa ca', ne ca xcaadxi que jma rusi biguidxi ladxidó'.

⁸Casi na lu Xqui'chi Dios:Bisicahui Dios xquenda biaani ca',ne bi'ni lú ca para ma qué niná ca',ne diaga ca para ma qué ñuna diaga ca',ne zaqué nuu ca de yanna.

⁹Ne laca uní' Dios de ruaa rey David, na:Gaca ca saa stícabe trampa para usaba laacabe.Ne gaca cani casi xiixa irenda ñee cabe,ne pur laacani guiaba ná cabe.

¹⁰Ne icheepa lú cabe para qué gu'ya cabe,ne iguude deche cabe para ma qué ganda indisa ique cabe. Ca judíu ne cani cadi judíu

¹¹Nga ni uní' rey David chiqué, peru naa rabe sicarí': Ñee birenda ñee ca judíu para biaba ca ca la? Co', sínuque ndi nga laani: ra qué nuzuuba cabe diidxa la? gunda bilá cani cadi judíu, ti gache lú cabe ora gu'ya cabe laaca'.

¹²Ne pa gucané enda ruchee sti ca judíu irá binni guidxilayú, ne gucané ra biaba cabe para biasa cani cadi judíu la? lágaxa ora ibigueta pe cabe jlugar cabe sti tiru. Jma rusi xa.

¹³Canié nia laatu cani cadi judíu ca', purti naa nga apóstol sti cani cadi judíu, ne rusisaca xhiiña',

¹⁴ti racaladxe gache lú ca binni xquidxe', tílasi zacá ilá caadxi de laaca'.

¹⁵Purti ra bicaa ná Dios ca judíu, uyuu né idubi guidxilayú tobi si, ne pa zacá ni la? xi gaca xa dxi uxhale ná be para ca judíu sti tiru ya'. Zeda gaca ni casi ra ibani ni ma guti.

¹⁶Pa gucuaa Dios cani uzá niru la? zaqueca zacaa cani nanda atrá. Zanda quixhe nu ti yaga casi ejemplu. Pa nazaaca xcu yaga la? laca nazaaca ca rama.

¹⁷Peru gabi nu bidxiña dxi bigá caadxi rama sti ti yaga olivo cha'hui', ne ra biree ca rama sti pe ni que, uluu cabe rama sti ti yaga olivo gui'xhi'. Ca rama bigá que zeda gaca casi ca judíu, ne ca rama olivo gui'xhi que nga laatu, cani cadi judíu. Ma nuu tu lu yaga olivo que, ne cacaa tu de irá ni zeeda de xcu yaga que.

¹⁸Peru cadi gaca tu nayá né ca rama ni bigá que. Purti ante uchá tu enda naró' stitu la? naquiiñe guietenala'dxi tu cadi laatu naaze tu xcu que, sínuque xcu que naaze laatu.

¹⁹Zándáca na tu: “Peru bigá ca rama que para uyú' du.”

²⁰Dxandí bigá cabe purti qué ñuni cre cabe, ne laatu ma uluu Dios laatu purti bini cre tu Cristu. Nga runi cadi gaca tu nayá', sínuque laguuya gá laatu.

²¹Purti pa qué ñá Dios ca rama sti pe yaga que la? nin ca laatu qué ziá'.

²²Laguuya pabiá' nacha'hui Dios, peru laca naduxhu'. Purti naduxhu né be cani bichee, peru nacha'hui be para laatu pa qué ixele tu de enda nacha'hui stibe. Pacaa la? laca zagá tu.

²³Ne ca judíu laca ziuu ca pa na ca guni cre ca', purti nandxó' Dios ne zanda cu' laacabe sti tiru.

²⁴Pa biruugu tu de lu yaga olivo gui'xhi ra undani pe tu, ne beda chuu tu lu yaga olivo cha'hui ra qué nindani tu la? lágaxa cani undani pe lú ni, jma rusi qué igana ibigueta ca lu yaga sti pe ca'. Rilasela'dxi Dios irá binni

²⁵Hermanu ca', chi güe nia laatu xiixa ni deru cusihuinni Dios, ne racaladxe guiene chaahui tu ni, para cadi udxiiba tu laca laatu. Dxandí ma biguidxi ladxidó' caadxi de ca binni Israel laga si ilá ca binni ni cadi judíu, bia' maca nexhe ilá.

²⁶Ne sicarí nga ilá idubi guidxi Israel, casi cá lu Xqui'chi Dios, ra na:De ndaani guidxi Sion zeeda tobi ni ulá,zeda ndee ni nadxaba lade cani za de Jacob.

²⁷Zacá nga bidiee stiidxa laacabezuxhaya ca xpecadu cabe.

²⁸Ra qué nicaa ca judíu evangeliu, bixele Dios de laaca para guyuu né laatu tobi si. Peru nadxii ru laacabe pur ca bixhoze gola cabe ni ulí dede chiqué.

²⁹Purti qué zuchaa Dios ni ma uní'. Pa ma uluu ndaaya ne ma guridxi la? qué ziuu dxi udxigueta'.

³⁰Laatu laca qué nuzuuba tu stiidxa be chiqué, peru yanna ma calasela'dxi be laatu purti ma bichee ca judíu.

³¹Ne zaqueca yanna cuchee cabe ti laca ilasela'dxi Dios laacabe cásica bi'ni né laatu.

³²Purti laa pe bisaana irá xixé binni lu ná enda ruchee ti ilasela'dxi irá cabe.

³³Nabé riene Dios, iruti ru nuu xpiaani bia' nuu xpiaani be, ne iruti ru riene bia' riene be. Qué zanda di ganna nu xi na xquenda biaani be nin guiene nu xi cayuni be.

³⁴Casi cá lu Xqui'chi be, ra na:Tu laa zanda ganna xi chi guni Señor,o tu bisiene laabe.

³⁵Zanda xa udí' nu laabe xiixane óraque ru cueza nu quixe be laanu pur ni bidí' nu que.

³⁶Purti irá xixé zeeda de laabe, ne pur laabe nuu irá ni, ne para laabe. Ne qué ziuu dxi guiaana dxí de isaca be. Amén.