Read Isthmus Zapotec 1 Tesalonicenses 3 Bible Online

1 Tesalonicenses 3 - Isthmus Zapotec bible

1 Tesalonicenses 3

¹Tantu cá ique du laatu dede ma qué ñanda nibeza du jma. Bise'nda du hermanu Timoteu ra nuu tu para ganna du xi ze xa tu. Ma iropa si du biaana du ndaani guidxi Atenas. Nabé huayuni né Timoteu laadu xhiiña Dios, ne rizá né laadu ra canayuí né du binni stiidxa Cristu. Nga runi bise'nda du laa ra nuu tu para acané laatu uzuhuaa chaahui tu ne guieche né tu ni runi cre tu,

³ti cadi chu' tu iree gana ne enda naná cadi'di tu ca. Maca nanna tu irá nu napa nu xidé tidi nu zacá.

⁴Dxi nuu ru du lade tu gudxi ca du laatu zeeda enda naná luguiá nu, ne ma biiya tu cayaca ni zacá.

⁵Nga runi, biiya sia' ma qué ganda chu' dxí ladxiduá' la? biseenda tobi yeguuya pa de yanna zuhuaa dxiichi tu lu ni runi cre tu. Purti nuaa xizaa pa ma gudxite binidxaba ique tu, bichiá dxiiña bine lade tu.

⁶Peru yanna ma bigueta Timoteu de Tesalónica. Bisieche be laadu ra na be, de yanna runi cre tu casi chiqué ne nadxii saa ru tu. Ne laca gudxi be laadu rieche tu ora rietenala'dxi tu laadu, ne cásica laadu zaqueca laatu napa tu gana gu'ya tu laadu.

⁷Zacá nga laani, hermanu ca', neca nabé naná ni cadidi du, peru bieche du ora gunna du zuhuaa dxiichi ru tu.

⁸Yanna ma undisa ique du, ne ma nuu du gana purti gunna du qué huaree chu tu de Señor.

⁹Dede qué idxela du diidxa udí' né du diuxquixe Dios pur laatu ne pur irá modo huasieche tu laadu nezalú be.

¹⁰Ridxí ne huaxhinni caní né du laabe, canaba du laabe idu'ya du laatu para acané du laatu izaa chaahui ra riaadxa ru guni cre tu.

¹¹Rinaba du acané Dios Bixhoze nu ne Jesucristu Señor stinu laadu ti ganda chi ganna du laatu.

¹²Ne acané Señor laatu jma rusi ganaxhii saa tu ne ganaxhii tu irá binni casi nadxii du laatu.

¹³Ne cadi ibi'xhi ique tu sínuque guiaana tu para laa si, ti cadi quiba donda ique tu nezalú Dios Bixhoze nu dxi guedané Señor Jesús irá xpinni.