Read Isthmus Zapotec 1 Tesalonicenses 5 Bible Online

1 Tesalonicenses 5 - Isthmus Zapotec bible

1 Tesalonicenses 5

¹Hermanu ca', cadi naquiiñe ucaa xi beeu o xi dxi gueeda Señor,

²purti maca nanna dxichi tu dxi gueeda be la? mala guiuu be, casi riuu gubaana huaxhinni.

³Ruluí' gasti chi gaca, nuu dxí guidxi, mala inaaze be laaca casi rinaaze yuuba ti gunaa ora ma gunda dxi gapa ba'du'. Zacá zazaaca cabe, ne óraque ma qué zalá cabe.

⁴Peru laatu, hermanu ca', ma biree tu ra nacahui, ma qué zanda inaaze dxi que laatu, purti cabeza tu ni.

⁵Ma cadi nuu tu lu guelacahui, purti ma zinanda tu ni dxandí ni gudixhe Dios, casi ñaca cuzaani be laatu.

⁶Yanna, gataná nu ne cu' xpiaani nu. Cadi gaca nu casi cani qué runi cre, casi ñaca nisiaasi ca'.

⁷Purti huaxhinni nga rasi binni ne laca huaxhinni rixudxi.

⁸Peru laanu, zanda gabi nu ma birá gueela para laanu. Nga runi naquiiñe cu' xpiaani nu, uzuhuá' dxichi nu lu ni runi cre nu ne ganaxhii saa nu, ne guietenala'dxi nu ma bilá nu. Irá nga zapa laanu.

⁹Purti cadi gudixhe Dios laanu para guiaba ná nu, sínuque para ganda ilá nu pur Jesucristu Señor stinu.

¹⁰Laa guti pur laanu ti ganda cueza né nu laa tobi si, pa nabani ru nu, o ma guti nu dxi gueeda.

¹¹Nga runi lausieche saa cásica cayuni tu, ne cada tobi uyubi uzuhuaa chaahui stobi. Ra culidxe Pablu ca hermanu

¹²Hermanu ca', rinaba du laatu icaa tu stiidxa cani runi dxiiña lade tu, cani za niru lú tu ne rabi laatu xi na Señor guni tu.

¹³Lausisaca laacabe ne laganaxhii laacabe purti cayuni cabe dxiiña que. Ne cadi chu' dinde tu.

¹⁴Hermanu ca', laulidxe cani nachaaba lade tu, cani qué na guni dxiiña'. Lagacané cani cadxibi, ne cani ca'ru uzuhuaa chaahui, ne cadi ixhacala'dxi tu laaca'.

¹⁵Laguuya gá qué chi uquixe tu ni guni binni laatu, sínuque lagaca nacha'hui ne irá hermanu, ne zaqueca cani qué runi cre.

¹⁶Cadi usaana tu de guieche tu,

¹⁷ne lainí' né Dios sin guiaana dxí tu.

¹⁸Intiica izaaca tu, laudii diuxquixe Dios purti nga nga ni na be guni cani ma nuu né Cristu Jesús tobi si.

¹⁹Laudii lugar guni Espíritu Santu dxiiña luguiá tu.

²⁰Laicaa stiidxa cani rui' né laatu ni rabi Dios laa.

²¹Lauyubi uná nga ni jneza, ne nga laguiaana né.

²²Ne laixele de irá xixé ni nadxaba'.

²³Dios riguixhe dxí ladxidó' no, ne rinaba du laa usiá pe xpida tu ne xquenda biaani tu ne espíritu stitu, ne idubi naca tu, ti qué quiba donda ique tu dxi gueeda Jesucristu Señor stinu.

²⁴Zuni Dios irá nga luguiá tu, purti runi ni riní', ne laa uní' né laatu.

²⁵Hermanu ca', lainí' né Dios pur laadu.

²⁶Laudii stale diuxi irá hermanu ne laquidxi dxiichi laaca'.

²⁷Señor bidii naa dxiiña ri', nga runi cayabe laatu gu'nda tu gui'chi ri nezalú irá ca hermanu.

²⁸Jesucristu Señor stinu cu' ndaaya laatu. Amén.