Read Isthmus Zapotec 2 Timoteo 4 Bible Online

2 Timoteo 4 - Isthmus Zapotec bible

2 Timoteo 4

¹Zeeda Jesucristu casi rey para cuidxi cuenta irá binni. Nezalú be ne nezalú Dios cayabe lii

²güi lu stiidxa be. Byuí' ni ora tiisi, pa ruluí' zacaa cabe ni o neca ruluí' qué zacaa cabe ni. Bicuudxi laacabe, biluí' laacabe paraa cuchee cabe, ne bilidxe laacabe. Zacá bisiidi laacabe sin ixhacala'dxu'.

³Purti zadxiña dxi ma qué zaná cabe ucaa diaga cabe cani rusiidi ni dxandí', sínuque zuyubi cabe adxé adxé tu usiidi laacabe ni chu'la'dxi cabe.

⁴Zudxii deche cabe ni zeeda de Dios ne jma zacá ique cabe ni riguixhe binni.

⁵Peru lii, biiya qué chi utiixhi cabe i'cu', ne cadi ixhacala'dxi lu enda naná ni gueeda luguiá lu'. Bicaa ique güi lu stiidxa Cristu ne bi'ni irá ni bisaana Dios ladxi nou'.

⁶Ma nanna mayaca guuti cabe naa. Ma cadxiña xhiora'.

⁷Bine xhiiña Dios dede bia' ra gunda ti', qué nixele de ni rune cre. Casi ñaca bixooñe ne irá stipa stinne', ne yanna ma yendaya lu raya.

⁸Cabeza ti premiu naa saca bine xhiiña jneza. Zudii Señor ni naa dxi ganda dxi icaa ni. Laa huaxa juez ni runi jneza. Cadi para naa sia' napa be, sínuque ne para irá ni cá lú guiuba ganda dxi gueeda be purti nadxii laabe. Ra canaba Pablu gueeda Timoteu

⁹Biyubi gueda guuyu naa nagueenda.

¹⁰Purti ma bisaana Demas naa. Jma cá ique ni nuu ndaani guidxilayú ri', ne ma ze Tesalónica. Crescente ze Galacia, ne Titu ze Dalmacia.

¹¹Ma Lucas si nuu ne naa rarí'. Biyubi Marcu guedanéu ora gueedu', purti zanda acané naa lu xhiiña Dios.

¹²Ma ze Tíquico Efeso. Naa biseenda laa raqué.

¹³Dané xhamarra ni bisaana Troas, ralidxi Carpu, ora gueedu', ne ca libru stinne'. Ne qué chi usiaandu ca gui'chi stinne'.

¹⁴Nabé huayuniná Alejandru, herrero que, naa. Zuquixe Señor irá ni laabe.

¹⁵Biiya gá lii ne laabe, purti nabé huacaa lú be ni rusi'di nu.

¹⁶Primé tiru bichiña cabe naa ra nuu justicia iruti qué ñacané naa. Irá ca bisaana ca naa. Rinaba lu Dios cadi uquixe ni laacabe.

¹⁷Peru Señor huaxa qué nixele de naa ne ucané naa biree de raqué. Casi ñaca bilá naa de ruaa lion, ne zacá gunda yegüé stiidxa Cristu lade irá cani cadi judíu.

¹⁸Ne nanna zulá Señor naa de irá ni nadxaba', ne zapa chaahui naa dede idxiña dxi chiné naa ibá' ra runi mandar. Qué chu' dxi guiaana dxí nu de usisaca nu laabe. Amén. Diuxi ne ndaaya'

¹⁹Bidii diuxi Prisca ne Aquila ne irá binni lidxi Onesíforo.

²⁰Biaana Erasto ndaani guidxi Corinto. Ne Trófimo huará, bisaana laa Mileto.

²¹Biyubi gueedu ante ganda ca beeu nanda. Ucuaa stiuxi Eubulo, Pudente, Linu, Claudia, ne ca xcaadxi hermanu.

²²Chu' né Señor Jesucristu lii ne cu' Dios ndaaya irá tu. Amén.