Read Isthmus Zapotec Apocalipsis 5 Bible Online

Apocalipsis 5 - Isthmus Zapotec bible

Apocalipsis 5

¹Ne biiya naaze ni zuba lu trono que ti gui'chi lu ná' ladu derechu, cá nezalú ne neza deche. Dopa ni, ne gui'di né ni gadxe sellu.

²Ne biiya ti ángel nandxó' cucaa ridxi: ―Tu risaca bia' para uxhele gui'chi ri ne indadi ca sellu stini.

³Peru iruti nuu para uxhele ni, nin ibá', nin guidxilayú, nin xaguete guidxilayú. Dede nin para guuya dxí si ca ni qué ñanda.

⁴Ne bicaa ridxi biina purti qué nidxela iruti ni nuu para uxhele gui'chi que, nin ñuunda ni, nin ñuuya dxí ni.

⁵Oraque na tobi de ca binni gola que rabi naa: ―Cadi gu'na lu'. Nuu tobi ni nuu para uxhele ni, tobi ni zeeda lade xfamilia Judá, za de David, ne zeda aca casi ti lion. Laa nuu para indadi gadxe sellu stini que, ne uxhele ni, purti gudixhe dxí irá ni bicaa lú laa.

⁶Oraque biiya zuhuaa ti Dendxu huiini nezalú trono que, galahui de ca bultu ne ca binni gola que, rihuinni ra biiti cabe laa. Napa gadxe cachu ne gadxe guielú, ne ca guielú que riní' gadxe espíritu sti Dios ni biseenda idubi guidxilayú.

⁷Ucuaa be gui'chi naaze ni zuba lu trono que.

⁸Ne casi unaaze be gui'chi que bizuxibi idapa bultu que ne ca binni gola que nezalú be. Cada binni gola napa ti arpa ne ti braseru de oro dxá de gu'xhu rindá' naxhi. Zeda aca gu'xhu que stiidxa ca xpinni Dios ra uní' né ca laa.

⁹Cayuunda ca ti cantu cubi. Sicarí na ni:Lii risaca lu bia' para icaa lu gui'chi ca ne indadi lu ca sellu stini.Purti guti lu ne uzí' neu laadu rini stiu' para Dios,irá du ni za du de irá ladu, de irá guidxi ne de irá idioma ni riní' binni.

¹⁰Ne bi'ni lu laadu sacerdote para guni du xhiiña Dios,ne rey para guni mandar du binni guidxilayú.

¹¹Oraque biiya dxie ne bina dia'ga stidxi jma ángel, de nin iruti ñanda nugaba laaca', naguu ca le' trono que, ne stidxi ca bultu que, ne stidxi ca binni gola que.

¹²Cucaa ca ridxi:Risaca Dendxu huiini biiti cabe que.Naquiiñe udxi'ba nu laa purti nandxó'ne risaca ne riene ne napa stipa.

¹³Ne laca bina dia'ga stidxi irá ni bizá' Dios, irá ni nuu ibá' ne ni nuu ndaani guidxilayú ne xaguete guidxilayú ne ndaani nisadó' na ca':Cadi guiaana dxí nu de udxi'ba nu ne usisaca nu ni zuba lu trono ca, ne Dendxu huiini'.Stícabe irá enda risaca ne irá enda nandxó'.

¹⁴Ne na idapa bultu que: ―Zacá aca ni. Ne bizuxibi ca binni gola que bisisaca ca ni qué ziuu dxi gati'.