Read Isu Matìyò 12 Bible Online

Matìyò 12 - Isu bible

Matìyò 12

¹A Ntsuk fə̀ zwaa fə̀ liy fiy, Yesù nə̀ tsə̀təndii tə we tiy kə bwìy tsìy dzəd anə iswum ìliy yiy, Dzoŋə zabə tsə̀təndii tə we, tsə̀təndii tə we tiy swà yə̀ ufyiə ùliy u də yəə àlɛ̀m anə iswum yə, fyikə tsə nə̀ àwo yiy fələ yə̀ àsə yə dzələ tədzələ.

²Abù aghee Falàsî yìy kòʼ tsə nəniy ghii, ghu dzày yə̀ awò Yesù a we nə, “Kòʼo kə ayiə yə tsə̀təndii tiə̀ tìy zəŋə, ghu zəŋə àyiə yə lâŋ kə inaʼ kiy twe nəniy nə̀ ghu kə zəŋi a tsuk fə̀ zwaa fiy.”

³Yesù ə bə̀lì yə̀ ghu nə̀, “Ghà kə kamə twoŋə kôʼ àyiə yə Devìd kə zəŋi a sòŋə fə dzoŋ kə zabə nəniy we nə̀ àghě we yiy ə̀?

⁴Ù kə zù tsìy nyi tsə a ndàw Kə̀zə̀ nə̀ àghě we yiy nìy nyi kə ba kə ghu kə sâ na nəniy awò Zə̀kìy, nə̀ lâŋ kìy kə kə̀ bɛmə dzə̂ nə̀ we moo aghee we, ghu nyi. Lâŋ kìy kə dzìy nə̀ à mày kə aghè àlwaʼa yiy ghu kwu nəniy ani nyi ə̀?

⁵Moo ghà kə kamə twoŋə kôʼ anə ulàŋ u Musîs nə̀ aghê àlwaʼa yə ghu faʼà nəniy a ndàw Kə̀zə̀ a ntsukə mə̀ zwâ mə̀ ìndzə̀m ghu kə ghî zaʼa kə̀làŋ, lâŋ kìy kə kə̀ kwuni kwi nəway ghu.

⁶Mə dzîy bə̀ â ghà nə̀, Wû wò ù də̀ nəniy nyiə fə u tsìy fyi ŋwoə ndàw Kə̀zə̀.

⁷Ŋwàʼa k-a-zə̀ kìy dzîy nə̀, ‘Fyiə kə mə liə nəniy â ghà à də̌ nə̀ ghà ki dee yə̂ mwuli kə̀ kwoʼo kiy awò àghè liy yiy à wày dzə ufyiə ghi wə ghà sâ nəniy.’ Abu ghâ mə̀ tsəb kwu nəniy fyiə kə lâŋ kə̀ myìŋə̀ nəniy, ghǎ mə̀ dzîy saʼa wiy dzə̀ wǎy wù nə̀ ù làŋ kìy kamə bvə̂.

⁸Mə liə nə̀ ghà kəli tsə nə̀ Wà Wù də̀ Mwe ə̀ mbyi, ù kwu soʼo daʼa kiy anə ntsuk fə̀ Zwaa fiy.”

⁹Yesù ə ŋwò tsə awo zù a ndàw kə̀dzəŋə kə aghě Dzû.

¹⁰Wù lìy wìy kə də̀ sòʼò awo nə̀ pfə̀ kə ukwe kiy. Aghè àliy kə də awo ghu kə liə ani bè kwi Yesù. Ghu ə bəbə a we nə, “Lâŋ kìy dzîy ŋwò nə̀ a zəŋi taw wù anə ntsuk fə̀ zwaa fiy ə̀?”

¹¹Yesù ə bə̀lì kə a ghu nə, “À də̌ ndiə anə uzə ghii abu wù ghii ùlìy kwu nəniy ndzù ə̀ we ì bvə̀ nyi tsə anə kəbwòʼ a ntsuk fə̀ zwaa fiy, ù ki də kə̀ ŋwô yə̂ ani zù nìy fyi kə?

¹²Wù ŋge tsìy fyi sòʼò ŋwò ə ndzù. I də nə̀, lâŋ kə ŋgàŋ kìy bɛmə ŋwô nə̀ ŋgà fây wù anə tsuk fə̀ zwaa fiy.”

¹³U dyaŋi dzày yə̀ â wù wə̀ ukwe u we wiy pfə dòʼò nə̀, “Nìay fyi yə̀ ukwe yiə̀ wìy.” Wù ù ghè wə nìày fyi yə̀ sòʼò ùkwe u we, u dòʼò dzwàb tsə yəə à də ùliy wə.

¹⁴Aghee Falàsî yǐy ŋwò fyi, zù kaʼ ani kaw dzəd ani wiy màʼà Yesù.

¹⁵Abù Yesù kəli fyi kə nə̀ ghu bee we, u ŋwò tsə i we yiy awote, ŋwàâ kə aghù kìy ə dzwùmì yə̀ we. U zəŋi taw kə ghu anə dzàŋ tə ghu tə̀dzə̀m

¹⁶U sə̀ŋì fyi yə̀ kətswuŋi awò ghu nə̀ ghu kə dzày nyìə̀ fyi dzə̀ wù wə̀ ù də̀ we.

¹⁷Ù kə ghî dzìy tə̀ i doʼò tsə anə ayiə yə Wè ntwùm ə̀ Kə̀zə̀ twoŋə Ìzayà kə twâ na nəniy anə ŋwàʼà k-a-zə̀ nə̀,

¹⁸“À yù də̌ wè kə̀fàʼ wam mə sây kə nəniy! Mə ŋge liə we anə fôŋ yam, mə kî kwe yə̀ zwày kam azoŋə̀ we. Ù kì nàʼa yə̀ nə̀ Zə̀kiy kî saʼa ŋwò aghù yə̀ ghu də wày aghee Dzû yìy anə isaʼ i tsitsi yiy.

¹⁹Ù kì bə̀d dzə̀ wày ayiə yiy, ù kì bwoʼ sòʼò way mbòŋ mìy, moo ani taw nə̀ dzə̀ anə tədzə̀lə tə̀ aghê zuw.

²⁰Ù kì zəŋi dzə̀ wày iyiə ìbɛbə yiy awò àghù yə̀ ghu də taw way, ù kì dè fòŋə̀ ìdzòŋə̀ yìy awò àghù yə̀ ghu də kwu way wù wə̀ ù də ani fày ghu. Ù kì kwoʼo nə̀ mwuli kiy azoŋə̀ ghu, zù kwùm a soŋə fə ù kì nîy bə̂ nəniy isaʼ i tsitsi yiy ù təm nyi kə.

²¹Aghû yə̀ ghu də̀ way aghee Dzû, ghu kiy kwu təŋ kə imôʼ yìy nə̀ ù kì zəŋə ŋwò kwab tə ayiə tiy awò ghu.”

²²Aghe àliy yiy dyaŋi nìy bə̀ wù ù fəbə̀ wìy akə̀lə̀ Yesù nə̀ u dzə̀ŋə̀ sòʼo wày aŋwòə usîy ù bɛbə wiy kə də azoŋə̀ we. U zəŋi taw kə we. U kaʼ yə̀ ani kòʼ, dzə̀ŋə̀ sòʼò.

²³Adzwə ə ŋge zwum aghû ate, ghu kaʼ ani bəb anə iwè nə̀, “À yù sì də̌ Wà Devìd wə̀ a lyimə nəniy we moo?”

²⁴Abù aghee Falàsî yìy zuw tsə ghii, ghu kaʼ ani dzày nə̀ dòŋ kə nsìy mə̀bɛbə̀ mìy twoŋə Bezebù ù mùə̀ azoŋə̀ we, zəŋə we nə̀ ù sì dzwumə fyiə nsìy mə̀ bɛbə̀ mìy azoŋə̀ àghè.

²⁵Yesù kə kwu ŋwô àyiə yə ghu moʼò nəniy anə fòŋ tə ghu, u dzày yə̀ a ghu nə, “Inaʼ yə i dzâw doʼò nəniy anə məŋkaʼa, ŋwà kwùnə̀ anə iwè, i way ani təmi lwùŋì. Isəd i ndaw yə soʼo i dzâw doʼò nəniy ŋwà anə iwè, i kî səàlə̀ dyòʼò ŋwò.

²⁶Abu Satàn kàmə̀ ŋwà kwùnə nə̀ ùwee u we wiy, à ki də nə̀ ù dzàw dòʼò ŋwò, isaʼ i we yiy də ani təmi mə̀yə?

²⁷Ghà dziy nə̀ à də Bezebù ù nyə̀ miə nə daʼa kiy ani dzwùm fyi nsìy mə̀bɛbə̀ mìy, aghû yə̀ ghu bwîy tsə̂ nəniy a dzəmə̀ ghà ghu dzwumə̀ fyiə nəniy nsìy mə̀bɛbə̀ mìy, ghu kwuni nìy bə̀ yə̀ daʼa kə ghu kiy ə? À kì də̀ kə ghu, ghu kî dè bə̂ nəniy â ghà nə̀ môʼ təli tiy way dzə tsitsi.

²⁸Abu mə kwuni dzwumə̀ fyiə nəniy nsìy mə̀bɛbə̀ mìy anə daʼa kə Zwày k-a-zə̀, à ki də nə̀ daʼa kə Zəkiy saʼa nəniy aghee we yiy ate kə mə bù azòŋə ghà.

²⁹Wù lìy wày dzə ani zù tsìy nyi kwoʼ yə̀ a ndàw wù wə̀ ù kwu nəniy daʼa kiy ù bii ŋwò fyi bə̀ ùfyiə, à mày kə nə̀ ù zù kwi kwù na tsə wù kə̀daʼa ù ghè wə̀, ù ki də ani nìy ŋwò mà kə ufyiə u we ùdzə̀m.”

³⁰Abu wù də taʼa way nə̀ mìə̀, ù ghî dzwə nə̀ mìə. Wù wə̀ ù də fìy wày miə ani zəŋi nə̀ aghê kəli tsə Kəzə̀, ù ghi zəŋə nə̀ ghu kə bû dzə̀ akə̀lə̀ Kə̀zə̀.

³¹À yù də ighe mə dzîy bə̂ â ghà nə̀, ayiə àbɛbə yə àdzə̀m aghee zəŋə nəniy, nə̀ àyiə àbɛbə yə aghee dzîy nəniy azòŋə Zə̀kìy, Zə̀kìy də ŋwô ani nìyzə̀. A kwuni bû wù wə̀ ù dzìy nəniy bɛ̀bə̀bɛ̀b tə ayiə tiy azoŋə̀ Zwàykə̀zwekiy, Zə̀kìy way dzə ani nìyzə̀ dzə̀ we ate anə ayiə ghè yə̀.

³²Wù wə̀ ù dzày nəniy bɛ̀bə̀bɛ̀b tə ayiə tiy awò Wà Wù, Zə̀kìy də̀ ŋwô ani nìyzə̀ ibɛb i ghà yə̀. Wù wə ù kwuni dzây nəniy bɛ̀bə̀bɛ̀b tə ayiə tiy azoŋə̀ Zwàykə̀zwekiy Zə̀kìy nî nìyzə̀ kòʼ dzə̀ wǎy wù ùghè wə̀, fə anə mbyi yə nə̀ anə mbyì ìfyiə̀ yə̀ ì dziy nam bû.

³³Utam ùdzoŋə̀ wìy fyiə bə̀ anə kàʼ fə̀ dzoŋə̀ fìy, utam ù bɛbə wiy fyiə bə̀ anə kàʼ fə̀ bɛbə fiy. Ghu koʼò kyilə fə̀kàʼ anə utam wə fə muə nəniy.

³⁴Ghà də yəə à də̀ zwə tə̀ bɛbə tiy! Ghà də ani dzày mə̀yə ayiə àdzoŋə̀ yìy nə̀ ghà də aghê àbɛbə? Aŋwòə ayiə yə a fyiə bə̂ anə idzwə a fyiə kwoʼo bə̀ anə fôŋ.

³⁵Aghê àdzoŋə̀ yìy zəŋə àyiə àdzoŋə̀ yìy aŋwòə ghu kwu fôŋ tə̀ dzoŋə̀ tìy. Aghê bɛbə kwuni zəŋə àyiə àbɛbə yiy bòʼ ìbɛb yə i də nəniy anə fòŋ tə ghu.

³⁶Mə dzîy nia bə̀ â ghà nə̀ ani bu ntsuk fə isaʼ aghê nî nyə̀ ntaŋ anə ayiə àkwo yə a fyiə bə̂ nəniy anə adzwə ghu.

³⁷À nì də̀ kə ayiə yiə̀ à dziy yiy Zə̀kìy nî də ani dzày nə̀ wò zwe ŋwò moo wò dzəə ŋwò â we ani saʼ wiy wô.

³⁸Aghee Falàsî àliy yiy nə̀ àghè àtyi de ulàŋ wìy, ghu mee a we nə, “A àtyi dè, ghè liə ani kòʼ dzə̀ kə̀tsəe nə̀ à wò twum bə̀ Kə̀zə̀.”

³⁹Yesù ə kwuni dzày yə̀ a ghu nə̀, “À də̀ yəə ghà də nəniy aghê àbɛbə nə̀ ghà liə way ani bɛmə, ghà dzîy nəniy nə̀ ghà liə ani kòʼ kə̀tsəe, mə tsəbə dè wày tsəe kə̀ lìy kiy, Zə̀kìy kî kwuni zəŋə tsə ŋwò nə̀ ghà kôʼ tsəe kə mòʼ. Tsəe kə ghà kə̀ kì dyòʼò yəə à də̌ dzòʼò àyiə yə a kə fyi nəniy nə̀ wè ntwùm ə̀ Kə̀zə̀ toŋə Dzonà.

⁴⁰Yəə Dzonà kə doʼò anə unìə̀ u itsi ì nê yìy mə̀ntsukə inti, à də̀ sòʼò ighəd Wà Wù nì dyoʼò soʼò a mbvə̀d.

⁴¹Ani buu ntsuk fə isaʼ, aghee inaʼ i Ninevèh ni saʼ wiy gha ule wə nyiə, aŋwòə ghu maa tu kyèmì ŋwò fyi bə̀ anə bɛb tə ghu anə ayiə yə Dzonà kə naʼà nəniy. Nyiə, wù wə̀ ù tsìy fyi nəniy Dzonà ù də̀ fəə nə̀ ghà. Ghà kwuni twe ani kyèmì ŋwò fyi bə̀ anə bɛb təli.

⁴²Nàʼtwùm ə̀ ìnaʼ i Shebà nì tyimə kə ani saʼ wiy aghû yə̀ nyiə nə̀ ŋə̀mə̀ tə̀ anə ntsuk fə isaʼ, aŋwòə ù kə loʼo ŋwò bə̀ ndaŋ kə dzəd ani ŋwa zuw utwab u Kəzə̀ awò Solomùn, ù kə də Dòŋ kə̀ twabə kiy. Mə dzîy bə̀ â ghà nə̀ wù lìy də̀ ŋwô nyiə ù tsìy fyi nəniy Solomùn, ghà kwuni twe ani zwuli ayiə we àdziy yiy.”

⁴³Abu usîy ùbɛbə wiy fyi tsə azoŋə̀ wù lìy, u làʼ ŋwò này yə̀ a mbvə̀n ə̀ kə̀sisi, khu tsə̀ loʼo kə u dziy muə̀ ate. Abù u kaw kê tsə nəniy,

⁴⁴u dzày tsə nə̀, “Mə kî zè dzwəŋə anə lòʼo kə mə kə fyi tsə nəniy ate.” Abù u dzwoŋi bû kòʼ tsə nə̀ ndàw ìghà yə̀ nam də̌ ìzwumə̀ yìy nə̀ ghu mə zwùbì na dzwàb,

⁴⁵u kàm zù kaw fəli tsə nsìy mə̀bɛbə̀ mìy ìnsèmbe ìn bɛb tsîy nəniy we ghu bù dòʼò dzwoŋi bə̀ azoŋə̀ wù ghè wə̀, wù ghè wə̀ ə kàm ba bɛb fyày mà yə̀ tsìy fyi tsə yəə ù kə bôʼ də tsə nəniy ate. À yù də̀ iyiə yə i nî fyiə nəniy nə̀ àghè àbɛbə yə nyiə nə̀ ŋə̀mə̀ tə̀.

⁴⁶Yesù kə namə dzìy ayiə awò àghù yìy, zə̂ we nə̀ àwizə̂ ə we yiy ghu zù bù təmi tsə anə ufə̀b u ndaw, dzìy nə̀ ghu liə ani dzə̀ŋì nə̀ we.

⁴⁷Wè lìy ə dzày yə̀ awò Yesù a we nə, “Zə̂ yiə̀, nə̀ Awizə̂ yiə̀ yìy də a bee, ghu liə ani dzə̀ŋì nə̀ wò.”

⁴⁸Yesù ə bəb tsə a ghu nə, “Zə̂ wam də ndiə, awizə̂ yamə də nə̀ ndìə̀?”

⁴⁹U dyaŋi sòʼ dè tsə tsə̀təndii tə we dzày tsə nə̀, “Kòʼo, zə̂ wam wə fəə nə̀ awizə̂ yamə!

⁵⁰Abu à də kə ndiə ù zəŋə nəniy ayiə yə Zə̀kìy liə nəniy ù ki də zə̂ wam nə̀ àwizə̂ yamə.”